్జ రాష్ట్రం పెనువిపత్తులో కూరుకుపోయే ప్రమాదం
్జ జగన్‌రెడ్డి దిగేనాటికి రూ.10 లక్షల కోట్లకు చేరనున్న అప్పులు
్జ చెల్లింపుల భారమే ఏడాదికి రూ.లక్ష కోట్లు
్జ ఆర్థిక అత్యవసర పరిస్థితి తప్ప కేంద్రానికి మరో మార్గంలేదు.
్జ సంక్షేమ పథకాలకన్నా సాక్షిలో యాడ్స్‌కే అధిక ప్రాధాన్యం
్జ పతనం అంచుల్లో వైసీపీ
్జ టీడీపీ పొలిట్‌బ్యూరో సభ్యులు, శాసనమండలి ప్రతిపక్షనేత యనమల రామకృష్ణుడు
అమరావతి: జగన్‌రెడ్డి అధికారం నుంచి దిగిపోయేనాటికి ఏపీ ప్రభుత్వ అప్పులు రూ.10 లక్షల కోట్లకు చేరనున్నట్లు టీడీపీ పొలిట్‌బ్యూరో సభ్యులు, శాసన మండలిలో ప్రతిపక్షనేత యనమల రామకృష్ణుడు తెలిపారు. ఏపీ ప్రజలను తస్మాత్‌ జాగ్రత్త! అని శుక్రవారం ఆయన ఒక ప్రటనలో హెచ్చరించారు. మళ్లీ అధికారంలోకి వచ్చే అవకాశం లేదని తెలిసిన జగన్‌రెడ్డి ఏపీని కోలుకోలేని దెబ్బ తీస్తున్నాడన్నారు. రాష్ట్రానికి పెట్టుబడులు రావడంలేదని, ఉపాధి కల్పన గుండు సున్నా అని, యువతలో అశాంతి నెలకొందని పేర్కొన్నారు. బాధిత వర్గాల ప్రజలే వైసీపీకి బుద్ధిచెప్పడం ఖాయన్నారు. జగన్‌రెడ్డి సృష్టించిన ఆర్థిక సంక్షోభం, వ్యవస్థల విధ్వం సంకారణంగా ఆంధ్రప్రదేశ్ సరిదిద్దలేని అప్పుల ఊబి లోకి కూరుకుపోయిందని ఆందోళన వ్యక్తం చేశారు. ఈ సంక్షోభం నుంచి బయటపడే దూరదష్టి, ప్రణాళికలు ఆయన వద్దలేవన్నారు. బహిరంగ మార్కెట్‌ అప్పులకు, కార్పొరేట్‌ రుణసేకరణకు కేంద్రం అడ్డుకట్ట వేయకపోతే, రాష్ట్రానికి పూడ్చలేని నష్టం వాటిల్లుతుందన్నది ప్రజాభిప్రాయమని పేర్కొన్నారు. ఏపిలో ఆర్థిక అత్యవసర పరిస్థితి విధింపు మినహా కేంద్రానికి మరో మార్గం కనిపించని పరిస్థితి నెలకొందన్నారు. కార్పొరేట్‌ బారోయింగ్స్‌, బడ్జెటేతర రుణాలను రాష్ట్రం అప్పులుగానే పరిగ ణిస్తామని, పార్లమెంటులో కేంద్రం ఇటీవలే చెప్పిన విషయాన్ని గుర్తు చేశారు. ఆంధ్రప్రదేశ్ ప్రభుత్వమే వాటి చెల్లింపులను రాష్ట్ర బడ్జెట్‌ నుంచే చేస్తుందని, ఇది రాజ్యాంగ ఉల్లంఘనగా పేర్కొంన్నట్లు తెలిపారు. ఈ చెల్లింపుల భారం రాష్ట్రంపైనే పడటం వల్ల ఆర్థికంగా దివాలాతీసే దుస్థితి వచ్చిందని ఆందోళన వ్యక్తం చేశారు. చేసిన అప్పులు తిరిగి చెల్లించడానికి మరిన్ని అప్పులు చేస్తుండటమే దీనికి కారణమని తెలిపారు.
జగన్‌రెడ్డి దిగిపోయేనాటికి రూ.10 లక్షల కోట్లకు చేరనున్న అప్పులు
జగన్‌రెడ్డి దిగిపోయే నాటికి బడ్జెటేతర అప్పులతో కలిపి ఆంధ్రప్రదేశ్ అప్పులు రూ.10లక్షల కోట్లకు చేరు కుంటాయని హెచ్చరించారు. ఈ అప్పుల కారణంగా చెల్లింపుల భారమే ఏడాదికి లక్ష కోట్ల రూపాయలు కానుందన్నారు. బడ్జెట్‌ అంచనాలు, మొత్తం వ్యయంలో వృద్ధి నత్తనడకన ఉంటే, తిరిగి చెల్లింపులు చాంతాడంత కానున్నట్లు హెచ్చరించారు. ఉదాహరణకి 2022-23 బహిరంగ మార్కెట్‌ అప్పులు తొలి 3 నెలల్లోనే రూ.38 వేల కోట్ల (బడ్జెట్‌లో పెట్టింది రూ.48 వేల కోట్లు) పైచిలుకుకు చేరడం ఆందోళనకరమన్నారు. ఈ అప్పుల బరితెగింపు పై కేంద్రం ఇంకెన్నాళ్లు రాష్ట్రాన్ని హెచ్చరిస్తుందని ప్రశ్నించారు. తాను మళ్లీ అధికారంలోకి వచ్చే అవకాశం లేదనే జగన్ రెడ్డి ఈవిధంగా రాష్ట్రాన్ని భవిష్యత్తులో కూడా తిరిగి కోలుకోలేని విధంగా దెబ్బ తీయాలని చూస్తున్నాడ న్నారు. రాష్ట్రాన్ని సుసంపన్నం చేయడం, ప్రజలను ఆర్థికంగా బలోపేతం చేయడంపై జగన్‌కు ఆసక్తి లేదని విమర్శించారు. ఆయనకు ఎంతసేపూ స్వలాభం, పార్టీ ప్రయోజనాలపైనే దృష్టి అని మండిపడ్డారు. వచ్చే ఎన్నికల్లో విచ్చలవిడిగా డబ్బు వెదజల్లి ప్రజాతీర్పును కాలరాసేందుకే జగన్ రెడ్డి అవినీతి కుంభకోణాలకు, అక్రమార్జనకు తెగబడ్డాడని ధ్వజమెత్తారు. జగన్ అవినీతి, అక్రమ సం పాదన నేలమాలిగలు వెలికితీసే పనిపై కేంద్రం దృష్టి పెట్టాలని కోరారు.
రాష్ట్రం పెనువిపత్తులో కూరుకుపోయే ప్రమాదం
భవిష్యత్తులో పేదల సంక్షేమానికి, రాష్ట్రాభివృద్ధికి నయాపైసా లేకుండా పెనువిపత్తులో రాష్ట్రం కూరుకుపోయే ప్రమాదం ఉందని హెచ్చరించారు. ఆకాశాన్నంటిన ఆర్థిక సంక్షోభానికి జగన్ రెడ్డిదే పూర్తి బాధ్యత అన్నారు. ఈ లెక్కాజమా లేని అప్పులు అగ్నికి ఆజ్యం పోస్తున్నట్లు తెలిపారు. దానికి తోడు ఇటీవలి మంత్రిమండలి మార్పు వైసీపీ కొంపలో కుంపటైందన్నారు. జగన్ అనుభవ రాహిత్యం, అహంభావం రాష్ట్రాన్ని అన్నిరంగాలలో అధ: పాతాళానికి దిగజార్చాయని, ప్రజా కంటక ప్రభుత్వంగా మార్చాయని, శ్రీలంక తరహాలోనే రాష్ట్ర ప్రజల్లో నిరాశానిస్పృహలు ప్రబలాయని తెలిపారు. ఆ దేశాధ్యక్షుడు కూడా ఇలాగే తన వైఫల్యాలను కప్పిపెట్టి, నిత్యావసరాల ధరలు ఆకాశాన్ని అంటించాడన్నారు. వైఎస్సార్‌ కాంగ్రెస్‌ పార్టీ పతనం అంచుల్లో ఉందని తెలిపారు. జగన్ పాలనతో ప్రజలంతా విసిగిపోయారన్నారు. నవరత్నాల పేరుతో దారుణంగా మోసగించిన జగన్ రెడ్డిని తిరిగి అధికార పీఠంపై కూర్చోబెట్టాలని ఎవరూ కోరుకోవడం లేదన్నారు. గత 3ఏళ్ల పాలనలో పేదరికం ప్రబలిందని, ధనికులు, పేదల మధ్య అంతరం బాగా పెరిగిపోయిందని, ఆర్థిక అసమానతలు పెరిగిపోయాయని ఆందోళన వ్యక్తం చేశారు. ఇతర రాష్ట్రాలతో పోలిస్తే, జగన్ డీబీఎఫ్‌ (ప్రత్యక్ష నగదు బదిలీ) పథకం ఒక ఫార్స్‌ గా మారిందని ఎద్దేవా చేశారు. ప్రత్యక్ష నగదు బదిలీలో ఏపీ 19వ స్థానంకు పడిపోయిందన్నారు. సంక్షేమ పథకాల అమలుకన్నా సాక్షిలో వాటి యాడ్స్‌ కే ప్రాధాన్యం ఇస్తున్నట్లు తెలిపారు. రాష్ట్రానికి పెట్టుబడులు రావడంలేదని, ఉపాధి కల్పన గుండుసున్నా అని, ఈ పరిణామంతో యువతలో అశాంతి ప్రబలుతోందని పేర్కొన్నారు. జగన్ రెడ్డి యువతను కూడా దారుణంగా మోసగించాడని మండిపడ్డారు. బాధిత వర్గాల ప్రజలే రాబోయే ఎన్నికల్లో వైసీపీకి తగిన బుద్ది చెబుతారని యనమల రామకృష్ణుడు తీవ్రస్థాయిలో హెచ్చరించారు.
