తిరుమల: తిరుమల శ్రీవారి అన్న ప్రసాదంలో నాణ్యత లో డొల్లతనం బయటపడిరది. తిరుమల వెంగమాంబ అన్నప్రసాదంలో నాణ్యత లేదంటూ భక్తులు నిరసన తెలిపారు. భక్తులకు వడ్డించిన అన్నం బాగోలేదంటూ సిబ్బందిపై మండిపడ్డారు. ఇలాంటి అన్నం పెడతారా అంటూ నిలదీశారు. ఉన్నతాధికారులు వచ్చి సమాధానం చెప్పాలని డిమాండ్‌ చేశారు. అయితే ఈ ఒక్కసారికి క్షమించి వదిలేయమని టీటీడీ సిబ్బంది భక్తులను కోరారు. భక్తులకు సర్దిచెప్పి పంపించేశారు.
స్పందించిన టీటీడీ ఛైర్మెన్‌…
వెంగమాంబ అన్నప్రసాద సముదాయంలో భక్తులకు వడ్డించిన అన్నప్రసాదంలో నాణ్యత లోపంపై టీటీడీ ఛైర్మన్‌ భూమన కరుణాకర్ రెడ్డి స్పందించారు. ఈ సందర్భంగా ఆయన మాట్లాడుతూ కొందరు భక్తులు అన్నప్రసాదం బాగోలేదని చెప్పిన విషయం తన దృష్టికి వచ్చిందన్నారు. బియ్యంలో నాణ్యత లోపంపై సమగ్ర విచారణ జరిపి బాధ్యులపై చర్యలు తీసుకుంటామని స్పష్టం చేశారు.
