అమరావతి(చైతన్యరథం): స్కిల్‌ డెవలప్‌మెంట్‌ కేసులో టీడీపీ అధినేత, అప్పటి ప్రతిపక్ష నేత చంద్రబాబు అక్రమ అరెస్ట్‌కు ఏడాది పూర్తయిన సందర్భంగా ఆ నాటి ఘటనను, తదనంతరం తాను చేపట్టిన నిజం గెలవాలి యాత్రను ఆయన సతీమణి నారా భువనేశ్వరి సోమవారం గుర్తు చేసుకున్నారు. ఈ మేరకు ఎక్స్‌లో పోస్ట్‌ పెట్టారు. ఎంతోమంది రాజకీయ నాయకులతో పోరాడిన మా ఆయన ప్రజా జీవితంలో.. మొట్ట మొదటిసారిగా ఆయన మీద ఎన్నో కుట్రలు చేసి, అరెస్టు చేసి, లేనిపోని అబద్ధాలు ఆడుతుంటే.. నిజం గెలవాలని జనాన్ని అర్థించాను. ఊరూ వాడా ఏకమై, ప్రపంచవ్యాప్తంగా వున్న వారంతా కదిలి వచ్చి నిజాన్ని గెలిపించారు. నిజాన్ని నిలబెట్టిన ప్రతి ఒక్కరికీ పేరు పేరునా నమస్కారాలు, కృతజ్ఞతలు.
చంద్రబాబు, లోకేష్‌ను చూస్తుంటే గర్వంగా ఉంది: బ్రాహ్మణి
చంద్రబాబు అక్రమ అరెస్ట్‌కు ఏడాది పూర్తయిన సందర్భంగా మంత్రి నారా లోకేష్‌ సతీమణి బ్రాహ్మణి ఎక్స్‌లో స్పందించారు. చంద్రబాబును ఆక్రమంగా అరెస్టు చేసి నారా లోకేష్‌ను కదలనీయకుండా పోలీసులను మోహరించినప్పుడు ఇక ప్రజలకు దిక్కెవ్వరు అని బాధపడ్డాం. ఆ అరెస్టును తట్టుకోలేక భావోద్వేగంతో ఎంతోమంది చనిపోతుంటే తల్లడిల్లిపోయాం. నిజమే గెలిచాక, తమ ప్రాణాలకంటే మిన్నగా ఆరాధించే ప్రజల అభిమాన రుణం తీర్చుకోడానికి నిత్యం కష్టపడుతున్న చంద్రబాబుని, లోకేష్‌ని చూస్తుంటే గర్వంగా అనిపిస్తుంది.
