ఇంత వరకు ఇవ్వని నిత్యావసరాలు
అరకొర పునరావాస కేంద్రాల్లో కాలంవెళ్లదీసిన బాధితులు
రైతులకు నష్టపరిహారం ఇవ్వండి
ముంపు బారిన పడిన ప్రతి కుటుంబానికి రూ.10 వేలు ఇవ్వండి
ప్రభుత్వ ప్రధాన కార్యదర్శికి టీడీపీ జాతీయ అధ్యక్షులు చంద్రబాబు లేఖ
అమరావతి: రాష్ట్రంలో వరద బాధితులను ఆదుకోవడంలో ప్రభుత్వం విఫలమైందని తెలుగుదేశం పార్టీ జాతీయ అధ్యక్షులు నారా చంద్రబాబు నాయుడు ధ్వజమెత్తారు. వరదబాధితులను ఆదుకోవాలని, నష్టపోయిన రైతులకు భరోసా కల్పించాలని ప్రభుత్వ ప్రధాన కార్యదర్శి సమీర్ శర్మకు సోమవారం ఆయన ఒక లేఖ రాశారు. ఆ లేఖ యథాతథంగా.. రాష్ట్రంలో గోదావరికి పెద్దఎత్తున సంభవించిన వరదల కారణంగా ప్రధానంగా తూర్పుగోదావరి, పశ్చిమగోదావరి, ఏలూరు, అల్లూరి సీతారామరాజు, డాక్టర్‌ బీఆర్‌ అంబేద్కర్‌ కోనసీమ, అనకాపల్లి జిల్లాల్లో పెద్ద ఎత్తున ఆస్తి, పంట నష్టం వాటిల్లింది. తినడానికి తిండిలేక, నిలువ నీడలేక, విద్యుత్ సరఫరా నిలిచి, పసి పిల్లలకు కనీసం పాలు కూడా లభించక ప్రజలు తీవ్రంగా అవస్థలు పడ్డారు. గోదావరి వరదలపై కేంద్ర జల కమిషన్(సీడబ్ల్యూసీ) హెచ్చరించినా ముందస్తు చర్యలు తీసుకోలేదు. కనీసం వరద ప్రభావంపై ప్రజలను అలెర్ట్ చెయ్యడం, తరలించడం కూడా చెయ్యలేదు. బాధితులకు భరోసా కల్పించి, వారిని ఆదుకోవడంలో ప్రభుత్వం విఫలమైంది. అరకొర పునరావాస కేంద్రాలు, అక్కడ కూడా కనీస వసతులు లేని కారణంగా ఏటిగట్లపైనే గుడారాలు వేసుకుని బిక్కుబిక్కుమంటూ బాధితులు కాలం వెళ్లదీశారు.
బాధితులకు అవసరమైన నిత్యావసర వస్తువులు, ఆహార పంపిణీలో కూడా ప్రభుత్వం విఫలమైంది. వరదల సమయంలో అవసరమైయిన నిత్యావసరాలు, ఇతర సామగ్రి సిద్ధం చేసుకోలేదు. దీంతో ప్రజలకు కష్టకాలంలో సాయం అందలేదు. వరదల అనంతరం రాకపోకలు, కరెంట్ సరఫరా పునరుద్దరణలో ప్రభుత్వం ప్రణాళికాబద్దంగా వ్యవహరించలేదు. ఇప్పటికీ అనేక గ్రామాల్లో విద్యుత్ సరఫరా మొదలు కాలేదు. 2020 నాటి వరదల సమయంలో పడవలు, ఆహారం, మంచినీరు తదితర ఏర్పాట్లకు సంబంధించి పాత బకాయిలు చెల్లించలేదని తెలిసింది. దీంతో పడవలు, ఆహారం అందివ్వడంలో కూడా ఇబ్బందులు ఎదురయ్యాయి. వరదలకు ముందే ఫ్లడ్‌ మెటీరియల్‌కు సంబంధించి టెండర్లు పిలవాల్సి ఉన్నా పట్టించుకోలేదు. ఉమ్మడి గోదావరి జిల్లాల్లోని లంకలు, పోలవరం విలీన మండలాల్లోని పలు గ్రామాలు 10 రోజుల పాటు వరద ముంపులోనే ఉండిపోయాయి.
బాధిత కుటుంబానికి 25 కిలోల బియ్యం, కందిపప్పు, బంగాళ దుంపలు, పామాయిల్, ఉల్లిపాయలు కేజీ చొప్పున ఇస్తామని ప్రభుత్వం ప్రకటించినా అది కార్యరూపం దాల్చలేదు. సహాయ శిబిరాల్లో ఉన్న ప్రతి కుటుంబానికి ఇవ్వాలన్న రూ.2వేల సాయం కూడా అందలేదు. పలు చోట్ల రూ.వెయ్యి చొప్పున మాత్రమే ఇచ్చారు. టీడీపీ ప్రభుత్వ హయాంలో తుఫాను బాధితులకు 50 కేజీల బియ్యం, అరకేజీ పంచదార, కేజీ చొప్పున కందిపప్పు, పామాయిల్, ఉల్లిపాయలు, బంగాళదుంపులు పంపిణీ చేయడం జరిగింది. ఎవరైనా మరణిస్తే బాధిత కుటుంబాలకు రూ.5 లక్షలు పరిహారం అందజేశాం. పొరుగున తెలంగాణలో నష్టపోయిన కుటుంబాలకు రూ.10 వేల చొప్పున పరిహారం ఇచ్చారు. రాష్ట్రంలో మాత్రం వెయ్యి, రెండువేల రూపాయలతోనే సరిపెట్టారు.
50 పైగా మండలాల్లో వరదల కారణంగా వరి, అరటి, బొప్పాయి, తమలపాకు, కూరగాయల తోటలు, కొబ్బరి చెట్లతో పాటు పలు ఉద్యాన పంటలు దెబ్బతిన్నాయి. గోదావరి వరదలతో నష్టపోయిన వారిని ప్రభుత్వం ఉదారంగా ఆదుకోవాల్సిన అవసరం ఉంది. 2014 హుదుద్ సమయంలో నాడు పరిహారం పెంచి సకాలంలో ప్రజలకు సాయం చేశాము. ఇప్పుడు పెరిగిన ఖర్చులు, పెరిగిన పెట్టుబడులు, నష్టాన్ని దృష్టిలో పెట్టుకుని ప్రజలకు మరింత సాయం చెయ్యాల్సి ఉంది.
1. ముంపు బారిన పడిన ప్రతి కుటుంబానికి రూ.10వేల ఆర్థిక సాయం అందించాలి.
2. దెబ్బతిన్న ఇంటికి తక్షణ సాయంగా రూ.50 వేలు ఇచ్చి, ప్రభుత్వమే ఉచితంగా ఇళ్లు నిర్మాణం చేయాలి.
3. మృతుల కుటుంబాలకు రూ.25 లక్షలు, గాయపడిన వారికి రూ.లక్ష ఇవ్వాలి
4. వరికి హెక్టారుకు రూ.25 వేలు ఇవ్వాలి.
5. ఆక్వాకు ఎకరాకు రూ.50 వేలు ఇవ్వాలి
6. తమలపాకు పంటకు ఎకరాకు రూ.50 వేలు
7. అరటి పంటకు ఎకరాకు రూ.40 వేలు ఇవ్వాలి.
8. మరణించిన ఆవు, గేదెలకు రూ.40 వేలు ఇవ్వాలి.
వరద బాధితులకు పైన కోరిన విధంగా సాయం అందించాలని నారా చంద్రబాబు నాయుడు కోరారు.
