విజయవాడ రూరల్: మాజీ రాష్ట్రపతి ఏపీజే అబ్దుల్ కలామ్ వర్థంతి సందర్భంగా ఆయన చిత్రపటానికి మాజీ మంత్రి దేవినేని ఉమామహేశ్వరరావు ఘనంగా నివాళి అర్పించారు. గొల్లపూడి టీడీపీ కార్యాలయంలో ఏపీజే అబ్దుల్ కలామ్ వర్ధంతి వేడుకలు ఘనంగా నిర్వహించారు. ఈ సందర్భంగా దేవినేని ఉమా మాట్లాడుతూ… సామాన్య కుటుంబంలో పుట్టి ఉన్నత శిఖరాలు అదిరోహించిన వ్యక్తి అబ్దుల్ కలామ్ అని గుర్తు చేశారు. భారతదేశ గౌరవాన్ని ప్రపంచ వ్యాప్తంగా తీసుకెళ్లిన మహోన్నత వ్యక్తి అబ్దుల్ కలామ్ అని కొనియాడారు. కృషి, పట్టుదలతో దేశం గర్వించే స్థాయికి అబ్దుల్ కలామ్ ఎదిగారన్నారు. అబ్దుల్ కలామ్ జీవితాన్ని నేటి యువత ఆదర్శంగా తీసుకోవాల్సిన అవసరం ఎంతైనా ఉందని ఆయన సూచించారు.
స్పేస్ టెక్నాలజీలో కానీ, అణుబాంబు టెక్నాలజీలో భారతదేశ కీర్తిని ప్రపంచానికి చాటి చెప్పిన మంచి మనిషి కలామ్ అని కొనియాడరు. పదవీవిరమణ చేసిన తరువాత కూడా అబ్దుల్ కలామ్ సేవలు దేశానికి అవసరమని గుర్తించి రాష్ట్రపతిని చేయడంలో చంద్రబాబు కీలక పాత్ర పోషించారని తెలిపారు. భారతదేశంలో ఎంత మంది రాష్ట్రపతులు వచ్చినా అబ్దుల్ కలామ్ లాంటి రాష్ట్రపతి ఇప్పటివరకూ రాలేదని… భవిష్యత్తులో రారని ఆయన పేర్కొన్నారు.
దేశంలోనే అత్యున్నత శాస్త్రవేత్త అబ్దుల్ కలామ్
ప్రతి ఒక్కరూ అబ్దుల్ కలామ్‌‌ను ఆదర్శంగా తీసుకోవాలి
