- పెట్టుబడులకు గమ్యస్థానంగా రాష్టం
- సీఎం బ్రాండ్‌ ఇమేజ్‌జే అందుకు కారణం
- రూ.30 లక్షల కోట్ల పెట్టుబడులు లక్ష్యం
- 20 లక్షలమందికి ఉద్యోగాలు, ఉపాధి
- ఆరు పాలసీలే.. సరికొత్త ప్రగతి చక్రాలు
- అమరావతి, పోలవరానికి నిధులు..
- రైల్వే, జాతీయ రహదారుల అభివృద్ధి
- రాష్ట్రంలో ఆస్తుల విలువ పెరుగుతోంది..
- 2029 నాటికి పేదలందరికీ పక్కా ఇళ్లు
- మీడియాతో గృహ నిర్మాణ మంత్రి కొలుసు
అమరావతి (చైతన్య రథం): ముఖ్యమంత్రి చంద్రబాబు బ్రాండ్‌ ఇమేజ్‌తో ఏపీ పెట్టుబడులకు గమ్యస్థానమైందని గృహ నిర్మాణ మంత్రి కొలుసు పార్థసారధి అన్నారు. దాదాపు రూ.30 లక్షల కోట్ల పెట్టుబడులను ఆకర్షించేలా, 20 లక్షలమందికి ఉద్యోగ, ఉపాధి అవకాశలు కల్పించే లక్ష్యంతో రాష్ట్ర ప్రభుత్వం ప్రకటించిన పరిశ్రమలు, ఎంఎస్‌ఎంఇ, పుడ్‌, గ్రీన్‌ఎనర్జీ, ప్రైవేటు పార్కులు, ఎలక్ట్రానిక్స్‌కు సంబంధించిన ఆరు నూతన పాలసీలవైపు దేశ విదేశీ పారిశ్రామికవేత్తలు ఆసక్తిగా చూస్తున్నారన్నారు. శుక్రవారం రాష్ట్ర సచివాలయంలో మీడియాతో మాట్లాడుతూ గత ప్రభుత్వ పాలనలో గాడితప్పిన వ్యవస్థలన్నింటినీ ట్రాక్‌లో పెడుతూ.. రాష్ట్రాన్ని అభివృద్దిపథంలో పరుగులు పెట్టించేందుకు సీఎం అహరహం కృషి చేస్తున్నారన్నారు. సీఎంగా బాధ్యతలు స్వీకరించడంతోనే పోలవరానికి నిధులను మంజూరు చేయించడంలో ఘన విజయాన్ని సాధించారన్నారు. వచ్చే రెండు మూడేళ్లలో పోలవరం పూర్తవుతుందన్న నమ్మకాన్ని ప్రజల్లో కల్పించారన్నారు. రాజధాని అమరావతి మొన్నటివరకూ మిథ్యగా మారిందని, చంద్రబాబు బాధ్యతలు స్వీకరించడంతోనే నిధులు సాధించి అమరావతి అభివృద్ది పనులు మొదలుపెట్టడం నూతనోత్సాహమేనని మంత్రి కొలుసు వ్యాఖ్యానించారు. రానున్న రెండు మూడేళ్లలో రాజధాని అమరావతి అంతర్జాతీయ ప్రమాణాలతో గొప్ప కేపిటల్‌ సిటీగా మారుతుందనే భరోసాని, విశ్వాసాన్ని ముఖ్యమంత్రి కల్పించారన్నారు. రాష్ట్ర ముఖ్యమంత్రి ప్రత్యేక చొరవతో రాష్ట్రంలో రైల్వే, జాతీయ రహదారుల అభివృద్ధికై కేంద్రంనుండి పెద్దఎత్తున నిధులు మంజూరు చేయించారన్నారు. రాష్ట్రంలో రైల్వే ప్రాజక్టుల అభివృద్ధికై రూ.9,138 కోట్లు, జాతీయ రహదారుల అభివృద్దికై రూ.6,280 కోట్లను రాష్ట్రానికి కేంద్రం మంజూరు చేసిందన్నారు. రాష్ట్రంలో చేపట్టిన అమరావతి, పోలవరం, రైల్వే, జాతీయ రహదారుల అభివృద్ది పనుల ఫలితంగా సామాజిక ఆర్థికాభివృద్ది ఎంతో గొప్పగా జరిగి భవిష్యత్తు ఎంతో ఉజ్వలంగా ఉంటుందనే ఆశాభావాన్ని మంత్రి వ్యక్తం చేశారు.
2029 నాటికి నిరుపేదలకు శాశ్వత ఇళ్లు
రాష్ట్రంలో ఏ నిరుపేదా తనకు ఇల్లు లేదనే మాట అనకుండా.. 2029 నాటికి నిరుపేదలందరికీ శాశ్వత గృహాలు నిర్మించాలని సీఎం ఆదేశించారన్నారు. ఆ ఆదేశాలకు అనుగుణంగా గృహ నిర్మాణ కార్యక్రమాలు పెద్దఎత్తున చేపడుతున్నట్లు మంత్రి తెలిపారు. ప్రధాన మంత్రి ఆవాస్‌ యోజన-2 మార్గదర్శకాలకు అనుగుణంగా 2025 నుంచి 2029 మధ్య కాలంలో రాష్ట్రంలో పెద్దఎత్తున శాశ్వత గృహాలను నిర్మించేందుకు చర్యలు తీసుకుంటున్నామన్నారు. పిఎంఏవై-2 క్రింద లబ్దిదారులకు మరింత మేలు కలిగే విధంగా యూనిట్‌ కాస్టును పెంచాలని, లబ్దిదారులకు ఎటువంటి గ్యారెంటీ లేకుండా మంజూరు చేసిన గృహాన్నే సెక్యూరిటీగా పెట్టుకుని బ్యాంకులు రుణాలిచ్చేలా చర్యలు తీసుకోవాలని సీఎం కేంద్రాన్ని కోరారన్నారు. ఒక వైపు అభివృద్ధి కార్యక్రమాలను పెద్దఎత్తున చేపట్టడంతో పాటు ప్రజా సంక్షేమ కార్యక్రమాలకూ పెద్దపీటవేస్తూ తమ ప్రభుత్వం ముందుకెళ్తుందని మంత్రి కొలుసు వ్యాఖ్యానించారు. సామాజిక భద్రతా పింఛన్లను రూ.3 వేల నుండి 4 వేలకు పెంచడం, ఈనెల 31 నుంచి మూడు ఉచిత గ్యాస్‌ సిలిండర్ల పథకాన్ని ప్రారంభించడం, గత ప్రభుత్వం రైతులకు ఎగ్గొట్టిన ధాన్యం బకాయిలను చెల్లించడం తదితర సంక్షేమ కార్యక్రమాలను తమ ప్రభుత్వం అత్యంత ప్రాధాన్యతతో అమలు చేస్తున్నట్లు చెప్పారు. అయితే వ్యక్తిగత కక్షలతో చెదురు మదురుగా రాష్ట్రంలో జరిగే దురదృష్ట సంఘటనలను ప్రభుత్వానికి ఆపాదిస్తూ బురదచల్లే విధంగా గత పాలకుడు ప్రయత్నించడం సరికాదన్నారు. రాష్ట్రంలో ఎటువంటి శాంతిభద్రతల సమస్యలు తలెత్తకుండా కట్టుదిట్టమైన చర్యలను ప్రభుత్వం తీసుకుంటుందన్నారు. రాష్ట్రంలో లక్షల ఎకరాల వ్యవసాయ, పట్టణ భూములు ఉన్నాయని, గత ప్రభుత్వ హయాంలో వాటి విలువ ఎంతో దిగజారి ఎన్నో లక్షల కోట్లను ప్రజలు నష్టపోయారన్నారు. అయితే ప్రస్తుత ముఖ్యమంత్రిపై ఉన్న విశ్వాసం, భరోసాతో రాష్ట్రంలో ఆస్తుల విలువలు భారీస్థాయిలో పెరిగాయని మంత్రి కొలుసు పార్థసారథి వ్యాఖ్యానించారు.
