అమరావతి(చైతన్యరథం): ఆంధ్రుల అభిమాన కథానాయకుడు నందమూరి బాలకృష్ణ తన యాభై ఏళ్ళ నట ప్రస్థానాన్ని విజయవంతంగా పూర్తిచేసుకున్న సందర్భంగా ముఖ్యమంత్రి చంద్రబాబు శుభాకాంక్షలు, అభినందనలు తెలియజేశారు. 50 ఏళ్ల క్రితం ఆగస్ట్‌ 30వ తేదీన విడుదలైన ‘తాతమ్మ కల’ చిత్రంతో చిత్ర పరిశ్రమలోకి అడుగు పెట్టిన బాలయ్య…ఇప్పటికీ అగ్రహీరోగా రాణిస్తూ, నేటి తరాన్ని కూడా అలరించే చిత్రాలతో బాక్సాఫీస్‌ రికార్డులు బద్దలు కొడుతున్నారు. తండ్రి ఎన్టీఆర్‌ పోషించిన పౌరాణిక పాత్రలతో పాటు అన్ని జానర్లలో నటించి తానేంటో చాటిచెప్పారు. కథానాయకుడిగానే కాకుండా ప్రజా నాయకుడిగా కూడా రాణిస్తున్న బాలకృష్ణ మరిన్ని రికార్డులను సృష్టించి, మరెన్నో మైలురాళ్లను అధిగమించి అన్‌ స్టాపబుల్‌ గా ముందుకు సాగాలని కోరుకుంటున్నట్టు సీఎం చంద్రబాబు ఎక్స్‌లో పోస్ట్‌ చేశారు.
