పాఠశాల స్థలాలు కబ్జా చేస్తే గూండా యాక్ట్‌ కింద కేసులు

కడప(చైతన్యరథం): పాఠశాలలు, ప్రభుత్వ ఆస్తుల కబ్జాకు పాల్పడే వ్యక్తులపై గూం డా యాక్ట్‌ కింద కేసులు పెడతామని ఉపముఖ్యమంత్రి పవన్‌కళ్యాణ్‌ హెచ్చరించారు. కడప జిల్లాలో పాఠశాలల ఆక్రమణలపై స్పెషల్‌ డ్రైవ్‌ నిర్వహించి బాధ్యులపై కఠిన చర్యలు తీసుకోవాలని అధికారులకు ఆదేశించారు. శనివారం కడప నగరం మద్రాస్‌ రోడ్డులోని మున్సిపల్‌ కార్పోరేషన్‌ హైస్కూల్‌లో నిర్వహించిన మెగా తల్లిదండ్రులు, ఉపా ధ్యాయుల ఆత్మీయ సమావేశంలో ఆయన పాల్గొన్నారు. మున్సిపల్‌ కార్పోరేషన్‌ పాఠశాల విద్యార్థులతో ముఖాముఖి సమావేశమయ్యారు. పాఠశాలలోని వంటశాల నవీకరణకు నిధుల కొరత ఉందన్న విషయం కలెక్టర్‌ ద్వారా తెలుసుకుని అందుకు అయ్యే ఖర్చు మొత్తం తన సొంత ట్రస్ట్‌ నుంచి అందజేస్తానని హామీ ఇచ్చారు. అనంతరం సమావేశం లో ప్రసంగించారు. విద్యార్థులకు సరైన చదువు ఇవ్వకపోతే సమాజం అభివృద్ధి చెందద న్నారు. పాఠశాలలు, విద్యార్థుల సమస్యల పరిష్కారంపై కూటమి ప్రభుత్వం చిత్తశుద్ధితో ఉందని తెలిపారు. ప్రభుత్వం వద్ద నిధులు లేకున్నా మనస్సు పెద్దదని, తమ దృష్టికి వచ్చిన ప్రతి సమస్య పరిష్కారానికి దారులు వెతుకుతున్నామని చెప్పారు.  విద్యార్థుల భవిష్యత్తును ముందుకు తీసుకువెళ్లడమే లక్ష్యంగా ఈ రోజు రాష్ట్రవ్యాప్తంగా ఒకేసారి 44 వేల పాఠశాలల్లో కోటి మంది విద్యార్థులు, తల్లిదండ్రులు పాల్గొనేలా ముఖ్యమంత్రి చంద్ర బాబు, విద్యాశాఖ మంత్రి లోకేష్‌ ఆధ్వర్యంలో మెగా టీచర్స్‌, పేరెంట్స్‌ సమావేశాలు ప్రభుత్వం ఏర్పాటు చేసిందని వివరించారు.

మహనీయులు పుట్టిన నేల రాయలసీమ

ఉపాధ్యాయులు, తల్లిదండ్రుల సమావేశానికి నేను కడప ఎంచుకోవడానికి కారణం  రాష్ట్రంలోనే అత్యధిక గ్రంథాలయాలతో వెలసిల్లిన ప్రాంతం ఇది. కడప చదువుల గడ్డ. అన్నమయ్య, వేమన, మొల్ల, పుట్టపర్తి నారాయణాచార్యులు, కేవీరెడ్డి, తరిమెల నాగిరెడ్డి, ఉయ్యాలవాడ నరసింహారెడ్డి వంటి మహనీయులు పుట్టిన నేల. రాయలసీమ అంటే వెనుకబాటు కాదు. అవకాశాలను ముందుండి నడిపించే ప్రాంతం. ఈ ప్రాంతానికి పూర్వవైభవం తెస్తాం. ప్రభుత్వ పాఠశాలలు బలపడాలని నేను కోరుకుంటాను. ప్రభుత్వ పాఠశాలు కార్పోరేట్‌ స్కూళ్లతో సమంగా అభివృద్ధి చెందాలి. అందుకు కేంద్రం స్కీములు, నిధులు ఉన్నాయి. వాటిని సద్వినియోగం చేసుకుంటే కార్పోరేట్‌ స్కూళ్లకు ధీటుగా ప్రభుత్వ పాఠశాలలను ముందుకు తీసుకువెళ్లవచ్చు. కేంద్ర ప్రభుత్వ నిర్దేశకత్వంలో 21వ శతాబ్దానికి భావి భారతపౌరులను అందించేలా ముందుకు వెళ్లాలి. మీ బిడ్డల భవిష్యత్తుకు బాటలు వేసేందుకు కూటమి ప్రభుత్వం చిత్తశుద్ధితో ఉంది. తల్లిదండ్రులు సమస్యలు మా దృష్టికి తీసుకువస్తే వాటిని తీర్చే బాధ్యత మేము స్వీకరిస్తాం.

 నా తల్లిదండ్రులు నాకు విలువలు నేర్పారు

మాదకద్రవ్యాల వ్యాప్తి విద్యార్థుల భద్రత పై ప్రభావం చూపుతోంది. రాష్ట్రవ్యాప్తంగా మాదక ద్రవ్యాల వ్యాప్తి భారీగా పెరిగిపోయింది. సోషల్‌ మీడియా విస్తృతి కూడా  ప్రభావం చూపుతోంది. పిల్లలు సోషల్‌ మీడియా తక్కువగా వాడేలా చూడాల్సిన బాధ్యత తల్లిదండ్రులపైనా ఉంది. స్మార్ట్‌ ఫోన్‌ను చదువు కోసం, అభివృద్ధి చెందడం కోసం వాడుతున్నారా లేక చెడు మార్గాల వైపు వెళ్లేందుకు వాడుతున్నారా అనేది గమనిస్తుం డాలి. దీంతో పాటు ఆడబిడ్డల భద్రత కూడా కీలకం. కర్నూలు జిల్లాలో స్కూలుకు వెళ్లి సుగాలి ప్రీతి అనే విద్యార్థిని అనుమానాస్పద స్థితిలో చనిపోయింది. చనిపోయి ఏళ్లు గడుస్తున్నా దోషులకు శిక్ష పడలేదు. కూటమి ప్రభుత్వం ఏర్పాటు అయ్యాక సుగాలి ప్రీతి కేసు విచారణ వేగవంతం చేశాం. ఆడబిడ్డల భద్రత కూటమి ప్రభుత్వం తీసుకుంటుంది. అలాగే ప్రతి స్కూల్లో సీసీ కెమెరాలు ఏర్పాటుపై కూడా ముఖ్యమంత్రి ఆలోచన చేస్తున్నా రు. సమస్యలు రాకుండా ఉండాలి అంటే తమ బిడ్డలు, పరిసర ప్రాంతాల్లో పరిస్థితుల పట్ల తల్లిదండ్రుల అప్రమత్తత కూడా అవసరం. తల్లిదండ్రుల ఆలోచనలకు అనుగుణం గానే పిల్లలు పెరుగుతారు. మీ బిడ్డలకు యోగి వేమన సంస్కారం నేర్పాలి. నా తల్లిదం డ్రులు చదువుకున్నది తక్కువే అయినా నాకు విలువలు నేర్పారు.

 టీచర్లకు అత్యధిక వేతనం ఇచ్చే రోజు రావాలి

విద్యార్థులు బాగా చదువుకోవాలి అంటే మంచి దేహదారుఢ్యంతో కూడిన ఆరోగ్యం ఉండాలి. విద్యార్థులకు సరైన పోషకాలు అందేందుకు ఏం చేయాలనే అంశంపై అధ్య యనం చేస్తాం. డొక్కా సీతమ్మ మధ్యాహ్న భోజన పథకాన్ని మరింత ముందుకు తీసుకు వెళ్లే విధంగా క్యాబినెట్‌లో చర్చిస్తాం. దేశం బాగుండాలి అంటే మనం పెట్టుబడి పెట్టాల్సింది కాంట్రాక్టర్ల మీద కాదు. అధ్యాపకులు మంచి విలువలు ఉన్న బోధన చేస్తే దేశం బలంగా ఉంటుంది. నా టీచర్‌ చెప్పిన పాఠాల వల్లే నాకు దేశానికి సేవ చేయాల న్న ఆసక్తి పెరిగింది. దేశంలో అత్యధిక వేతనం టీచర్లకు వచ్చే రోజు రావాలని మనస్ఫూ ర్తిగా కోరుకుంటాను. ఆ దిశగా ప్రయత్నం చేస్తాను. టీచర్లకు కూడా పౌష్టిక విలువలతో కూడిన ఆహారం అవసరం. తరగతి గదుల్లో పాఠాలు చెప్పడం ద్వారా వారు అలసిపో తుంటారు.

 టీచర్లే నిజమైన హీరోలు

నా హీరోలు నా టీచర్లు. హీరోలు సినిమాల్లో మాత్రమే ఉండరు. నిజమైన హీరోలు మన కళ్ల ముందే ఉంటారు. జాతీయస్థాయిలో కడప మున్సిపల్‌ స్కూల్‌ విద్యార్థినికి బ్రాంజ్‌ మెడల్‌ గెలిచే స్థాయికి తీసుకువెళ్లిన టీచర్‌ నిజమైన హీరో. సింహం గడ్డం గీసుకుంటుంది నేను గీసుకోను అని డైలాగులు సినిమాల్లో చెబితే వెనుక రీ రికార్డింగులు వస్తాయి. హీరో నడిచినా దానికి రీ రికార్డింగ్‌ ఉంటుంది. కానీ వనజీవి రామయ్య, దశ రథ్‌ మాంజీ వంటి వారు నడుస్తుంటే రీ రికార్డింగులు ఉండవు. కార్గిల్‌లో చనిపోయిన యుద్ధవీరులకు, టీచర్లకు రీ రికార్డింగులు ఉండవు. ఆ సైనికులు, టీచర్లే నిజమైన హీరో లు..వారిని గౌరవించాలి. మనం హీరోలను చూసుకోవాల్సింది సినిమాల్లో నటించే వారి లో కాదు టీచర్లలో హీరోలను చూసుకోవాలి.

  ప్రజా సమస్యల పరిష్కారంపై దృష్టి

కడపలో తాగునీటి సమస్యను ఎమ్మెల్యే మాధవి తన దృష్టికి తీసుకువచ్చారు. కడప లో ఇంత నీటి సమస్య ఉందని నేను అనుకోలేదు. ఈ ప్రాంతం నుంచి ఇద్దరు సీఎంలు అయినందున సమస్య తీరిపోయిందనుకున్నాను. ఉపాధి హామీ నిధులు కేవలం గ్రామా ల్లో అభివృద్ధికే నిర్ధేశించబడ్డాయి. పట్టణ ప్రాంతాలో తాగునీటి సమస్య పరిష్కారానికి అమృత్‌ స్కీము కింద అవకాశాలు ఉన్నాయి. వాటిని పరిశీలిస్తాం. 2014, 2019 మధ్య ఉద్దానం సమస్యను బయటకు తీసుకువస్తే ఆనాటి ముఖ్యమంత్రి చంద్రబాబు రూ.61 కోట్లతో ఉద్దానం ప్రాజెక్టును ముందుకు తీసుకువెళ్లారు. కూటమి ప్రభుత్వంలో పులివెం దుల తాగునీటి ప్రాజెక్టుకు రూ.45 కోట్లు ఇచ్చాం. తాగునీటి కోసం ఎక్కడా ఇబ్బంది రాకూడదన్నదే కూటమి ప్రభుత్వం లక్ష్యం. నీటి సమస్య తీర్చి కడప ప్రజలను ఆదుకుం టామని మాటిస్తున్నాను. తాగునీటి సమస్య తీర్చి మౌలిక సదుపాయాల పరిష్కారంపై దృష్టి సారిస్తాం.

 పాఠశాలల విలీనం సమస్యల పరిష్కారం దిశగా ఆలోచన

కడప మున్సిపల్‌ కార్పోరేషన్‌ హైస్కూల్‌ వంటశాల నవీకరణకు నిధుల అవసరం ఉందన్న విషయాన్ని కలెక్టర్‌ నా దృష్టికి తీసుకువచ్చారు. అందుకు ఎంత ఖర్చు అయితే అంత నా సొంత ట్రస్ట్‌ నుంచి నిధులు ఏర్పాటు చేస్తాను. ప్రతిభాపాటవాలు ప్రదర్శించిన విద్యార్థులు, అధ్యాపకులకు ప్రశంసా పత్రాలు, బహుమతులు అందించేందుకు నిధులు అవసరం అయితే సమకూర్చేందుకు సిద్ధంగా ఉన్నాను. గత ప్రభుత్వం ప్రభుత్వ పాఠశాలల విలీనం నిర్ణయం కారణంగా ఆడబిడ్డలు స్కూళ్లకు వెళ్లలేకపోతు న్నారన్న విషయం మా దృష్టికి వచ్చింది. కలెక్టర్ల సమావేశం నాటికి వారికి గ్రామాల ను కలుపుతూ వాహన సదుపాయం ఏర్పాటు చేసే అంశం మీద నిర్ణయం తీసుకుం టాం. కడప, రాయలసీమ తెగింపు ఉన్న బలమైన నేల. ఇక్కడ విద్యార్థులు ఇక్కడే చదువుకోవాలి..ఇక్కడే ఉద్యోగాలు రావాలి. మీకు ఏమైనా సమస్య లు ఉన్నా మా దృష్టికి తీసుకురండి. పరిష్కారానికి మేము కృషిచేస్తాం. ఇక్కడకు వచ్చిన విద్యార్థులందరికీ బంగారు భవిష్యత్తు ఉండాలి. అధ్యాపకులు, తల్లిదండ్రుల కలయికను మరింత ముందుకు తీసుకువెళ్లాలి అని పేర్కొన్నారు. ఈ కార్యక్రమంలో కడప ఎమ్మెల్యే రెడ్డప్పగారి మాధవిరెడ్డి, ఎమ్మెల్యేలు పుట్టా చైతన్యరెడ్డి, వరదరాజు లరెడ్డి, ఉపాధ్యాయ ఎమ్మెల్సీ ఎమ్‌.వి.రామచంద్రారెడ్డి, పంచాయతీరాజ్‌ గ్రామీణాభి వృద్ధి శాఖ డైరెక్టర్‌ కృష్ణతేజ, జిల్లా కలెక్టర్‌ శ్రీధర్‌ చెరుకూరి, ఎస్పీ వి.విద్యాసాగర్‌ నాయుడు, జాయింట్‌ కలెక్టర్‌ అతిధిసింగ్‌, ఇతర ఉన్నతాధికారులు పాల్గొన్నారు.