కొత్త పార్లమెంట్ భవనం ప్రారంభించుకోవడం దేశానికి గర్వకారణమని టీడీపీ అధినేత చంద్రబాబు అన్నారు. నూతన పార్లమెంట్ భవన ప్రారంభోత్సవంపై శుభాకాంక్షలు తెలుపుతూ టీడీపీ అధినేత చంద్రబాబు ట్వీట్ చేశారు. ప్రధాని నరేంద్ర మోదీకి, కేంద్ర ప్రభుత్వానికి నూతన పార్లమెంట్ భవన ప్రారంభంపై .. చంద్రబాబు శుభాకాంక్షలు తెలిపారు. కొత్త పార్లమెంట్ భవనం ప్రారంభించుకోవడం దేశానికి గర్వకారణం అని టీడీపీ అధినేత చంద్రబాబు అన్నారు.
కొత్త పార్లమెంట్ భవనంలో దేశానికి మలుపుతిప్పే నిర్ణయాలు తీసుకుంటారని ఆశాభావం వ్యక్తం చేశారు. పేదరిక నిర్మూలనకు అవసరం అయ్యే పాలసీల రూపకల్పనకు.. నూతనంగా నిర్మించిన.. పార్లమెంట్ వేదిక కావాలని చంద్రబాబు ఆకాంక్షించారు. భారతదేశం 100 ఏళ్ల స్వాతంత్ర్య దినోత్సవాలు జరుపుకునే నాటికి ఆర్థిక అసమానతలు లేని సమాజంగా తీర్చిదిద్దేలా పార్లమెంట్ లో నిర్ణయాలు జరగాలని చంద్రబాబు ఆకాంక్షించారు. స్వాతంత్ర్యం వచ్చి వందేళ్లయిన సందర్భంగా 2047 కల్లా దీన్ని సాధించాలన్నారు.
మే 28వ తేదీన ప్రధాని నరేంద్ర మోదీ కొత్త పార్లమెంట్ను ప్రారంభించనున్నారు. కొత్త పార్లమెంట్ సిద్ధమైపోయిందని, ఆత్మనిర్భర్ భారత్కి ఇది ప్రతీకగా నిలిచిపోతుందని గతవారమే లోక్సభ ఓ ప్రకటన చేసింది. 2020 డిసెంబర్ 10వ తేదీన ఈ నిర్మాణానికి శంకుస్థాపన చేశారు మోదీ. అయితే…కొవిడ్ కారణంగా పనులు ఆలస్యమయ్యాయి. 2021 జనవరిలో నిర్మాణం మొదలైంది. అహ్మదాబాద్కి చెందిన హెచ్ సీపీ డిజైన్ ప్లానింగ్ అండ్ మేనేజ్ మెంట్ ఈ బిల్డింగ్ని డిజైన్ చేసింది.
ప్రస్తుతం ఉన్న పార్లమెంట్ పక్కనే .. టాటా ప్రాజెక్ట్స్ ఈ నిర్మాణాన్ని చేసింది. పాత పార్లమెంట్లో లోక్సభలో 543 మంది, రాజ్యసభలో 250 మంది కూర్చునేందుకు వీలుండేది. అయితే..కొత్త పార్లమెంట్లో సీటింగ్ కెపాసిటీ పెంచారు. 888 మంది లోక్సభలో, 300 మంది రాజ్యసభలో కూర్చునేందుకు వీలుగా ఏర్పాట్లు చేశారు. కొత్త పార్లమెంట్ భవనాన్ని 64,500 చదరపు మీటర్ల విస్తీర్ణంలో నిర్మించారు. పాత భవనం డయామీటర్ 560 అడుగులు. అది కేవలం 24,281 చదరపు మీటర్ల విస్తీర్ణంలోనే ఉంది. ఇప్పుడీ విస్తీర్ణాన్ని భారీగా పెంచారు.
