- రూ.6 కోట్లు ఇస్తానని ప్రకటన
- ముంపునకు గురైన 400 పంచాయతీలకు రూ.4 కోట్లు
- తెలంగాణ ముఖ్యమంత్రి సహాయ నిధికి రూ. కోటి
- ఇప్పటికే ఏపీ ముఖ్యమంత్రి సహాయ నిధికి రూ. కోటి విరాళం ప్రకటన
- పంచాయతీ రాజ్‌ ఉద్యోగుల విరాళం రూ.14 కోట్లు
అమరావతి(చైతన్యరథం): రాష్ట్ర ఉపముఖ్యమంత్రి, పంచాయతీ రాజ్‌, గ్రామీణాభివృద్ధి శాఖ మంత్రి పవన్‌ కళ్యాణ్‌ మరోసారి తన పెద్ద మనసు చాటుకున్నారు. పవన్‌ ఇప్పటికే వరద బాధితుల సహాయార్థం ఆంధ్రప్రదేశ్ ముఖ్యమంత్రి సహాయ నిధికి కోటి రూపాయలు విరాళం ప్రకటించిన విషయం విదితమే. ఆ కోటి రూపాయలకు అదనంగా బుధవారం మరో ఐదు కోట్ల రూపాయల విరాళం ప్రకటించారు. వరద ముంపు బారిన పడ్డ 400 గ్రామ పంచాయతీలకు రూ. లక్ష చొప్పున రూ.4 కోట్లు వ్యక్తిగతంగా విరాళం ప్రకటించారు. ఈ నిధులను నేరుగా పంచాయతీ ఖాతాలకు పంపిస్తానని స్పష్టం చేశారు. ఇందుకు సంబంధించిన విధివిధానాలను పంచాయతీరాజ్‌ ముఖ్య కార్యదర్శి, డైరెక్టర్‌ తెలియచేస్తారని.. ఆ ప్రకారం వరద ముంపుతో ఉన్న పంచాయతీలకు విరాళాలు పంపిస్తానన్నారు.
అలాగే తెలంగాణ వరద బాధితులకు సంబంధించి తెలంగాణ ముఖ్యమంత్రి సహాయ నిధికి రూ. కోటి విరాళం ప్రకటించారు. ఆ రాష్ట్ర ముఖ్యమంత్రి రేవంత్‌ రెడ్డిని కలిసి ఈ మొత్తం అందజేస్తానని చెప్పారు.
ఉద్యోగుల భూరి విరాళం
పవన్‌ కళ్యాణ్‌ నేతృత్వంలోని పంచాయతీరాజ్‌ ఉద్యోగులు వరద బాధితులకు అండగా నిలిచారు. ముఖ్యమంత్రి సహాయనిధికి తమ ఒక్క రోజు జీతాన్ని విరాళంగా ప్రకటించారు. పంచాయతీరాజ్‌ జాయింట్‌ యాక్షన్‌ కమిటీ ప్రతినిధులు బుధవారం పవన్‌ కళ్యాణ్‌ని కలిసి 1.64 లక్షల మంది ఉద్యోగుల ఒక్క రోజు మూల వేతనం రూ. 14 కోట్లు, పంచాయతీ రాజ్‌ ఇంజనీరింగ్‌ విభాగం రూ. 75 లక్షలు, గ్రామీణ నీటి పారుదల శాఖ ఉద్యోగులు రూ. 10 లక్షలు ముఖ్యమంత్రి సహాయ నిధికి ఇస్తున్నట్లు లేఖలు అందచేశారు. ఉద్యోగులను ఉప ముఖ్యమంత్రి అభినందించారు
