- చేనేత వస్త్రాల అమ్మకాలే లక్ష్యం
- రాష్ట్ర బీసీ సంక్షేమ, చేనేత, జౌళిశాఖ మంత్రి సవిత వెల్లడి
విజయవాడ(చైతన్యరథం): చేనేత వస్త్రాల అమ్మకాలే లక్ష్యంగా రాష్ట్ర వ్యాప్తంగా చేనేత ఎగ్జిబిషన్‌లు ఏర్పాటు చేయనున్నట్లు రాష్ట్ర బీసీ సంక్షేమ, చేనేత, జౌళి శాఖల మంత్రి ఎస్.సవిత తెలిపారు. నగరంలోని మేరీస్‌ స్టెల్లా కాలేజీ ఆడిటోరియంలో ఏర్పాటు చేసిన చేనేత ఎగ్జిబిషన్‌ను సోమవారం ఆమె పరిశీలించారు. ఈ సందర్భంగా ఆమె ఎగ్జిబిషన్‌లో ప్రతి స్టాల్‌ వద్దకు వెళ్లి నేతన్నలను పలుకరించారు. ఏయే రాష్ట్రాల నుంచి వచ్చి స్టాళ్లు ఏర్పాటు చేశారు.. రోజూ ఎంత మేర అమ్మకాలు జరుగుతున్నాయి అని వివరాలు అడిగి తెలుసుకున్నారు. అనంతరం నిర్వహించిన విలేకరుల సమావేశంలో మంత్రి సవిత మాట్లాడారు. ఈ నెల ఏడో తేదీన గాంధీ బునకర్‌ మేళా పేరుతో చేనేత వస్త్ర ప్రదర్శనను ముఖ్యమంత్రి చంద్రబాబు నాయుడు ప్రారంభించారన్నారు. ఈ వస్త్ర ప్రదర్శన ఈ నెల 20 తేదీ వరకు నిర్వహించాలని తొలుత నిర్ణయించామని తెలిపారు. ప్రజల నుంచి వస్తున్న స్పందన చూసి ఎగ్జిబిషన్‌ను మరో వారం రోజుల పాటు పొడిగించనున్నట్లు మంత్రి తెలిపారు.
చేనేత వస్త్రాల అమ్మకాల్లో దళారుల ప్రమేయం లేకుండా, నేతన్నలకు మేలు కలగజేయాలన్నదే తమ ప్రభుత్వ ధ్యేయమన్నారు. చేనేత వస్త్రాల అమ్మకాలు మరింత పెరిగేలా రాష్ట్ర వ్యాప్తంగా చేనేత వస్త్ర ప్రదర్శనలు(ఎగ్జిబిషన్‌లు) నిర్వహించినున్నట్లు తెలిపారు. నేతన్నలకు శిక్షణ ఇచ్చి ఈ కామర్స్‌లో చేనేత వస్త్రాలు విక్రయించేలా చర్యలు తీసుకుంటున్నామన్నారు. నేతన్నలకు 365 రోజులు పని కల్పించడమే ఎన్డీయే ప్రభుత్వ లక్ష్యమన్నారు.
చీరలు కొనుగోలు చేసిన మంత్రి
ఎగ్జిబిషన్‌కు ప్రజల నుంచి వస్తున్న స్పందన చూస్తే ఆనందంగా ఉందని మంత్రి సవిత అన్నారు. రోజుకు రూ.20 లక్షల మేర అమ్మకాలు జరుగుతుండడాన్ని దృష్టిలో పెట్టుకొని మరో వారం రోజుల పాటు ఎగ్జిబిషన్‌ పొడిగిస్తున్నట్లు ప్రకటించారు. వస్త్ర ప్రదర్శనను పరిశీలించడానికి వచ్చిన మంత్రి సవిత చీరలు కొనుగోలు చేశారు. ఆప్కో స్టాల్‌ దగ్గర 2 చీరలు, చీరాల స్టాల్‌ దగ్గర డ్రెస్‌ మెటీరియల్‌ కొనుగోలు చేశారు. చేనేత జౌళి శాఖ కమిషనర్‌ రేఖారాణి కూడా చీరలు కొనుగోలు చేశారు.
వస్త్ర ప్రదర్శన అద్భుతం
వస్త్ర ప్రదర్శనకు వచ్చిన కొనుగోలు దారులతో మంత్రి సవిత ముచ్చటించారు. వస్త్ర ప్రదర్శన వల్ల మేలు కలిగిందా..అన్న మంత్రి ప్రశ్నకు కొనుగోలు దారులు సంతృప్తి వ్యక్తం చేశారు. ఈ ప్రదర్శన వల్ల నాణ్యమైన వస్త్రాలు కొనుగోలు చేసే అవకాశం కలిగిందని ఆనందం వ్యక్తం చేశారు. ప్రజల నుంచి వస్తున్న స్పందన బాగుందని, ఇకపై మరిన్ని చేనేత వస్త్ర ప్రదర్శనలు నిర్వహించనున్నామని మంత్రి సవిత తెలిపారు.
సాంస్కృతిక ప్రదర్శనలు తిలకించిన మంత్రి
కొనుగోలుదారులకు, నేతన్నలకు ఆహ్లాదం కలిగించేలా రోజూ ఆడిటోరియం ఆవరణలో సాంస్కృతిక కార్యక్రమాలు నిర్వహిస్తున్నారు. ఈ నేపథ్యంలో చేనేత ప్రదర్శనను పరిశీలించడానికి మంత్రి సవిత సోమవారం సాయంత్రం నిర్వహించిన సాంస్కృతిక కార్యక్రమాలను తిలకించారు. అనంతరం పలువురు కళాకారులను సత్కరించారు. ఈ కార్యక్రమంలో చేనేత జౌళి శాఖ కమిషనర్‌ రేఖారాణి, ఆప్కో ఎండీ పవన్‌ మూర్తి, జేడీ కన్నబాబు, తదితరులు పాల్గొన్నారు.
