మదనపల్లె ఫైళ్ళ దహనం సంఘటనలో..ఎంతటివారున్నా వదిలేది లేదు

అమరావతి(చైతన్యరథం):అన్నమయ్య జిల్లా మదనపల్లె సబ్‌ కలక్టర్‌ కార్యాలయంలో రెవెన్యూ రికార్డులు, దస్త్రాల దహనం కేసులో ఎంతటి వారున్నా వదిలిపెట్టేది లేదని రాష్ట్ర రెవెన్యూ, రిజిస్ట్రేషన్లు, స్టాంపుల శాఖల మంత్రి అనగాని సత్యప్రసాద్‌ స్పష్టం చేశారు. సోమవారం రాష్ట్ర సచివాలయంలో ముఖ్యమంత్రి చంద్రబాబు నాయుడు రెవెన్యూ శాఖపై సమీక్ష నిర్వహించారు. అనంతరం మంత్రి సత్యప్రసాద్‌ మీడియా సమావేశంలో ఆ వివరాలను వెల్లడిరచారు. మదనపల్లి సంఘటనపై ప్రభుత్వం వెంటనే స్పందించి రెవెన్యూ శాఖ ప్రత్యేక ప్రధాన కార్యదర్శి ఆర్పీ సిసోడియాను మూడు రోజుల పాటు అక్కడే ఉంచి పూర్తి స్థాయి విచారణ చేయించగా ఆయన విచారణ నివేదికను సోమవారం ప్రభుత్వానికి సమర్పించారని చెప్పారు. ఈ సంఘటనకు సంబంధించి ఇప్పటికే గత ఆర్డీఓ సహా ప్రస్తుత ఆర్డీఓను, ఒక సీనియర్‌ అసిస్టెంట్‌ ను సస్పెండ్‌ చేశామన్నారు.ఈ సంఘటన విద్యుత్‌ షార్టు సర్క్యూట్‌ వల్ల జరిగింది కాదని కుట్రపూర్వకంగానే జరిగిందని ఇప్పటి వరకూ జరిగిన విచారణను బట్టి తెలుస్తోందని, ఇంకా పూర్తి విచారణ జరుగుతోందని దీనితో సంబంధం ఉన్న ఎంతటి వారినైనా వదిలిపెట్టే ప్రసక్తి లేదని మంత్రి అనగాని సత్యప్రసాద్‌ పునరుద్ఘాటించారు.

జిల్లాల్లో రెవెన్యూ శాఖ అధికారుల పర్యటనలు.

మదనపల్లెలో మాజీ మంత్రి పెద్దిరెడ్డి అనుచరుల బాధితులు భారీగా వందల సంఖ్యలో తరలి వచ్చి ఫిర్యాదులు ఇచ్చారని అదే విధంగా వైసీపీ నేతలు, రాష్ట్ర వ్యాప్తంగా భూఅక్రమాలకు పాల్పడ్డారని వాటన్నిటిపైనా విచారణ జరిపిస్తామని చెప్పారు. ముఖ్యంగా ఉమ్మడి చిత్తూరు, విశాఖ, నెల్లూరు, ప్రకాశం జిల్లాల్లో ఎక్కువ భూదందాలు జరిగాయని, వ్యవస్థల మీద నమ్మకం కలగాలి అంటే ప్రభుత్వం సత్వర చర్యలు తీసుకోవాల్సి ఉంటుందని సీఎం చంద్రబాబు స్పష్టం చేశారన్నారు. ముందుగా నాలుగు ప్రాంతాల్లో రెవెన్యూ శాఖ ప్రత్యేక ప్రధాన కార్యదర్శి ఆర్పీ సిసోడియా, సిసిఎల్‌ఏ జి.జయలక్ష్మితో పాటు ఇతర అధికారులు పర్యటిస్తారని ఆతదుపరి మిగతా జిల్లాల్లోను పర్యటించి భూఅక్రమాలకు సంబంధించి ప్రజల నుండి ఫిర్యాదులు స్వీకరిస్తారని చెప్పారు. అదే విధంగా గత ప్రభుత్వం ప్రవేట్‌ వ్యక్తులకు దోచిపెట్టిన భూములను అవసరాలకు వాడకుండా దుర్వినియోగం చేస్తే ఆయా కేటాయింపులు రద్దు చేసే అంశంపై కూడా సీఎం సమీక్షించినట్టు తెలిపారు.

మదనపల్లి లాంటి సంఘటనలు పునరావృతం కాకుండా రెవెన్యూ శాఖను పూర్తిగా ప్రక్షాళన చేయాల్సిన అవసరం ఉందని ముఖ్యమంత్రి సమీక్షలో స్పష్టం చేశారని ఆ దిశగా త్వరలో తగిన చర్యలు తీసుకుంటామని మంత్రి సత్య ప్రసాద్‌ పేర్కొన్నారు. నేరాలు జరగ కుండా చూడడంతో పాటు నేరాలు చేసిన వారిని సకాలంలో శిక్షించడం కూడా ముఖ్యమని అందుకే భూ కబ్జాల నియంత్రణకు గుజరాత్‌ తరహా చట్టాన్ని తీసుకురావటంపై అధ్యయనం చేస్తున్నట్టు తెలిపారు.

కొత్త పట్టాదార్‌ పాస్‌ పుస్తకాలు.

త్వరలో రాజముద్ర,క్యూఆర్‌ కోడ్‌ తో కూడిన కొత్త పట్టాదార్‌ పాస్‌ పుస్తకాలను రైతులకు అందిస్తామని రెవెన్యూ మంత్రి సత్య ప్రసాద్‌ వెల్లడిరచారు. ఆ క్యూఆర్‌ కోడ్‌ ను స్కాన్‌ చేస్తే ఆ పొలం వివరాలతో పాటు ఆ పొలానికి దారి చూపే విధానం తెస్తామని చెప్పారు.

అసైండ్‌ భూముల అక్రమాలపై సమగ్ర లెక్కలు

గత ప్రభుత్వంలో చుక్కల భూముల విషయంలో అనేక అక్రమాలు జరిగాయని ఒక మెమో ద్వారా అధికారాలు మార్చి అక్రమాలకు ఊతమిచ్చారని మంత్రి చెప్పారు. సంస్కరణల పేరుతో కొత్త చట్టాలు తెచ్చి అక్రమాలకు పాల్పడిన విధానంపై కూడా సీఎం సమీక్షించినట్టు వివరించారు. అసైండ్‌ భుములు సామాన్యుల నుండి రాజకీయ నేతల చేతుల్లోకి వెళ్ళాయని, ఈ విషయంలో చాలా అక్రమాలు జరిగాయని, కొత్త చట్టం మూలంగా పేదలకు మంచి జరగకపోగా రాజకీయనేతలు లబ్ది పొందారని తెలిపారు. ఎస్సీల చేతుల నుండి భూములు ఎక్కడికి వెళ్ళాయని దానిపై పూర్తి నివేదకలు సిద్ధం చేయాలని, 22ఎలో ఎన్ని పెట్టారు.. ఎన్ని తీసేశారు.. ఎన్ని చోట్ల అటువంటి లావాదేవీలు జరిగాయనే దానిపై సమగ్ర లెక్కలు సిద్ధం చేయాలని సీఎం ఆదేశించారని మంత్రి సత్య ప్రసాద్‌ చెప్పారు.

అంతేగాక పేదల ఇళ్ళ స్థలాల విషయంలో ఆ భూమి లావాదేవీలు ఎప్పుడు జరిగాయి, ప్రభుత్వం కొనడానికి ముందు ఆభూమి ఎవరి దగ్గర ఉంది తర్వాత ఎవరు కొన్నారు, అక్కడ అసలు ఆ భూమి ధర ఎంత ఉంది, ప్రభుత్వానికి ఎంతకు అమ్మారు అనే వివరాలు పూర్తిగా సేకరించాలని సీఎం ఆదేశించినట్టు రెవెన్యూ మంత్రి చెప్పారు.

రీసర్వేపై గ్రామ సభలు

గత ప్రభుత్వ హయాంలో 7 వేల గ్రామాల్లో భూముల రీసర్వే చేశారని అవి వాస్తవంగా జరిగాయా లేదా అనే దానిపై గ్రామ సభలు ద్వారా పున:సమీక్ష చేస్తామని మంత్రి సత్యప్రసాద్‌ స్పష్టం చేశారు