- ప్రతిపక్ష హోదా కోసం స్పీకర్‌కు లేఖ రాయడం సిగ్గుచేటు
- కనీస అవగాహన లేకుండా ప్రతిపక్ష నేత హోదా కోరడం హేయం
- ఆ హోదా ఇస్తేనే అసెంబ్లీకి వస్తాననటం దారుణం
- ఇకనైనా జగన్‌ అధికార భ్రాంతి నుండి బయటకు రావాలి
- కడప ఎమ్మెల్యే మాధవి రెడ్డి ధ్వజం
అమరావతి(చైతన్యరథం): మాజీ సీఎం జగన్‌ రెడ్డి జనాలకు మొఖం చూపించుకోలేక కుయుక్తులకు తెరలేపాడని.. ప్రతిపక్ష హోదా ఇవ్వాలంటూ స్పీకర్‌కు లేఖ రాయటం సిగ్గుచేటని కడప ఎమ్మెల్యే ఆర్‌ మాధవిరెడ్డి ధ్వజమెత్తారు. మూడు సార్లు ఎమ్మెల్యేగా గెలిచిన, ఒకసారి ఎంపీ, ఒకసారి సీఎంగా పనిచేసిన జగన్‌ రెడ్డికి అసెంబ్లీ రూల్స్‌పై కనీస అవగాహన లేదని విమర్శించారు. సిగ్గులేకుండా ప్రతిపక్ష హోదా అడుగుతున్నారంటూ మండిపడ్డారు. అధికారం ఉంటేనే అసెంబ్లీలోకి అడుగుపెడతారా? సీఎం అయితేనే గాని జగన్‌ రెడ్డి అసెంబ్లీలోకి రారా? అసెంబ్లీకి వచ్చి నియోజకవర్గ సమస్యలపై గళమెత్తకుంటే నిన్ను ఎమ్మెల్యేగా గెలిపించిన నియోజకవర్గ ప్రజలకు ఏమని సమాధానం చెబుతావ్‌ జగన్‌ రెడ్డి అని మాధవిరెడ్డి ప్రశ్నించారు. మంగళగిరిలోని టీడీపీ జాతీయ కార్యాలయంలో ఆమె బుధవారం మీడియా సమావేశంలో మాట్లాడుతూ జగన్‌ రెడ్డి ప్రతిపక్ష హోదా కోసం స్పీకర్‌ కు లేఖ రాయడం చూస్తే ఆయనకు రాజ్యంగంపై ఎటువంటి అవగాహన లేదని స్పష్టం అవుతోందన్నారు.
ప్రధాన ప్రతిపక్షంగా గుర్తింపు పొందేందుకు మొత్తం సభ్యుల్లో 10 శాతం సీట్లు ఉండాల్సిన అవసరం లేదని లేఖరాయడమే దీనికి ఉదాహరణ. రూల్‌ నెంబర్‌.56, క్లాజ్‌ సీ లో మొత్తం సభ్యుల్లో పదో వంతు ఉంటేనే ప్రతిపక్ష హోదా వస్తుందని స్పష్టంగా పేర్కొన్నారు. ప్రజలకు మొఖం చూపించే ధైర్యం లేకే జగన్‌ రెడ్డి రకరకాల కుయుక్తులు పన్నుతున్నారు. ప్రతిపక్ష హోదాకు 10 శాతం సభ్యులు ఉండాల్సిన అవసరం లేదనడం జగన్‌ రెడ్డి దిగజారుడు తనానికి నిదర్శనం. జగన్‌ రెడ్డి ప్రజల కోసం పనిచేయకుండా అధికారం ఉంటేనే పనిచేస్తాననడం దారుణమని మాధవి రెడ్డి తప్పుబట్టారు.
ఉమ్మడి రాష్ట్రంలో 1994లో 26 సీట్లు గెలవడంతో కాంగ్రెస్‌ ఎమ్మెల్యే జనారన్థన్‌ రెడ్డికి ప్రతిపక్ష హోదా ఇవ్వలేదు. ప్రమాణ స్వీకారంలో ఆయనను అక్షర క్రమంలోనే పిలిచారు. కానీ నేడు టీడీపీ మాత్రం.. మాజీ ముఖ్యమంత్రిగా జగన్‌ రెడ్డిని గౌరవించి మంత్రులు ప్రమాణ స్వీకారం చేసిన వెంటనే ఆయన చేత ప్రమాణం చేయించింది. ఆ ఇంగితం కూడా జగన్‌ రెడ్డి చూపించడంలేదు. 2014 నుండి 19 వరకు పార్లమెంట్‌లో కాంగ్రెస్‌ కు తగినన్ని సీట్లు రాకపోవడంతో ప్రతిపక్ష హోదా ఇవ్వలేదు, ఇది భారత రాజ్యాంగం ప్రకారం ఉన్న నిబంధన. ఇన్ని రోజులు రాజారెడ్డి రాజ్యాంగం నడిపిన జగన్‌ రెడ్డికోసం భారత రాజ్యాంగం మార్చి కొత్త రాజ్యంగం రాస్తేనే అసెంబ్లీకి వస్తానని చెప్పడం సిగ్గుచేటని మాధవి రెడ్డి విమర్శించారు.
దొంగ నాటకాలు
స్పీకర్‌ ఎన్నిక రోజు వైసీపీ నేతలు ఒక్కరు కూడా అసెంబ్లీకి రాలేదు. దాచుకోవడం, దోచుకోవడానికి తప్ప ప్రజా సేవకోసం వచ్చిన పార్టీ వైసీపీ కాదని ప్రజలు గమనించారు. లేఖ రాసి సానుభూతి కొట్టేసి జనాల్లోకి వెళ్లడానికి జగన్‌ నాటకాలు ఆడుతున్నారు. నియోజకవర్గాల్లో ఉన్న సమస్యలను ఏనాడు జగన్‌ రెడ్డి పట్టించుకున్న పాపాన పోలేదు. ఆరుగురు శాసన సభ్యులను లాగేస్తే టీడీపీ ప్రతిపక్ష హోదాను కోల్పోతుందని అప్పట్లో పేర్ని నానితో అనిపించిన మాటలు రికార్డుల్లో ఉన్న విషయం జగన్‌రెడ్డి మరచిపోయారా? ఆ రోజు టీడీపీలోని ఎమ్మెల్యేలను లాక్కుని మా పార్టీకి ప్రతిపక్ష హోదా లేకుండా చేయాలని చూసిన మీరు ఈ రోజు ప్రతిపక్ష హోదా కోసం పాకులాడుతూ.. ఏ మొఖం పెట్టుకుని మాట్లాడుతున్నారు? నాడు ప్రతిపక్షంలో ఉన్న మేము ప్రజల సమస్యలపై పోరాడామని మాధవి రెడ్డి గుర్తుచేశారు.
నేడు కుంటి సాకులతో జగన్‌ రెడ్డి అసెంబ్లీకి వెళ్లకుండా కుయుక్తులు పన్నడం ప్రజలు గమనిస్తున్నారు. అధికారం ఉంటేనే జగన్‌ రెడ్డి అసెంబ్లీలోకి వస్తారా? ప్రజలు మీకు ఓట్లు వేసింది ఎందుకు ? మీ నియోజకవర్గ ప్రజల సమస్యలు మీకు పట్టవా? 11 సీట్లు ఇచ్చి బుద్ది చెప్పినా మారరా? ఇకనైనా జగన్‌ అధికార భ్రాంతి నుండి బయటకు వచ్చి ప్రజల సమస్యలను పట్టించుకోవాలి. జగన్‌ పాలనలో నష్టపోని వర్గమంటూ ఎవరూ లేరు. అందుకే జగన్‌ రెడ్డిపై దాడులు చేస్తున్నారు. అందుకే కట్టుకున్న ప్యాలెస్‌ లకు భారీ కంచెలు పెట్టుకుంటున్నాడని మాధవి రెడ్డి అన్నారు.
