నర్సీపట్నం(చైతన్యరథం): అనకాపల్లి జిల్లా నర్సీపట్నంలోని ఎన్టీఆర్‌ ప్రభుత్వ ఆసుపత్రికి పూర్వవైభవం తీసుకురావటం తన ధ్యేయమని శాసనసభ స్పీకర్‌ చింతకాయల అయ్యన్నపాత్రుడు అన్నారు. జిల్లా కలెక్టర్‌ విజయ్‌ కృష్ణన్‌ ఆధ్వర్యంలో నర్సీపట్నంలోని ఏరియా ఆస్పత్రిలో బుధవారం జరిగిన సమీక్షా సమావేశంలో అయ్యన్న పాత్రుడు పాల్గొన్నారు. ఈ సందర్భంగా ఆయన మాట్లాడుతూ ఈ ఏరియా ఆస్పత్రి తన మానస పుత్రిక అన్నారు. దీన్ని చెడగొట్టేందుకు ప్రయత్నం చేస్తే సహించేది లేదంటూ భావోద్వేగంతో మాట్లాడారు. ఆస్పత్రిలో రోగులకు సేవ చేయడం వైద్యులకు దేవుడిచ్చిన వరమని, దీనిని అందరూ సద్వినియోగం చేసుకోవాలన్నారు. ఆసుపత్రి అభివృద్ధి కోసం గతంలో తన హయాంలో చేపట్టిన ప్రాజెక్టుల గురించి వివరించారు. లిఫ్ట్‌, మొబైల్‌ బ్లడ్‌బ్యాంక్‌, ఆర్థోపెడిక్‌ ఎక్స్‌-రే, డయాలసిస్‌ యూనిట్‌, తదితర సౌకర్యాలు కల్పించామన్నారు.
గత ఐదు సంవత్సరాల కాలంలో పాలకులు ఈ ఆస్పత్రిని పట్టించుకోలేదన్నారు. ఇక్కడ సౌకర్యాలు లేకపోవడంతో పెద్ద సంఖ్యలో గర్భిణులను ప్రైవేట్‌ ఆసుపత్రులకు పంపించే దుస్థితి నెలకొందన్నారు. 2018లో ఈ ఆసుపత్రిలో నెలకు 500 ప్రసవాలు జరిగేవి, ఇప్పుడు ఎన్ని జరుగుతున్నాయని ఆస్పత్రి సూపరిండెంట్‌ డాక్టర్‌ నీలవేణిని స్పీకర్‌ ప్రశ్నించారు. కొత్త ఎమ్మెల్యే ప్రమాణ స్వీకారం చేసి మూడు నెలలైనా ఇప్పటికీ ఆసుపత్రి అభివృద్ధి కమిటీ వేయకపోవడంపై కూడా ప్రశ్నించారు. ఇక్కడికి వచ్చిన రోగులను ప్రైవేటు ఆస్పత్రులకు పంపించడంపై అభ్యంతరం వ్యక్తం చేశారు. మొబైల్‌ బ్లడ్‌బ్యాంక్‌ ద్వారా గత ఐదు సంవత్సరాల కాలంలో ఎన్ని యూనిట్ల రక్తం సేకరించారో తెలియజేయాలన్నారు.
ఆస్పత్రి సిబ్బంది డబ్బులు వసూలు చేస్తున్నారనే ఆరోపణలపై ఎందుకు చర్యలు తీసుకోలేదని ప్రశ్నించారు. సేవల నిర్వహణలో లోపాలపై శ్రద్ధ వహించాలని, ప్రైవేటు ఆంబులెన్స్‌లకు ప్రత్యేక ధర నిర్ణయించాలని సూచించారు. ఆయుష్‌ హాస్పిటల్‌ పూర్తయి ఐదు సంవత్సరాలు అవుతున్నా ఎందుకు నిరుపయోగంగా ఉంచారని ప్రశ్నించారు. హాస్పటల్‌లో శస్త్రచికిత్సలకు కావలసిన పరికరాలు, మరొక ఆరో వాటర్‌ ప్లాంట్‌ సమకూర్చుతానని స్పీకర్‌ హామీ ఇచ్చారు.
కలెక్టర్‌ విజయ్‌ కృష్ణన్‌ మాట్లాడుతూ, ఆస్పత్రికి కొత్త అంబులెన్స్‌ మంజూరు చేస్తామని హామీ ఇచ్చారు. పాముకాటు కేసులను ఏ కారణం చేత ప్రైవేటు ఆస్పత్రికి పంపించారో విచారించి తక్షణమే చర్యలు తీసుకోవాలని సంబంధిత అధికారులను ఆదేశించారు. ఈ సమీక్ష సమావేశంలో డీసీహెచ్‌ ఎస్ శంకర్‌ ప్రసాద్‌, ఆర్డీవో జయరాం, జనసేన ఇన్‌చార్జి సూర్యచంద్ర పాల్గొన్నారు.
