- ముందస్తు బెయిల్‌ పిటిషన్లు కొట్టేసిన హైకోర్టు
- వెంటనే నరసరావుపేటలో అదుపులోకి తీసుకున్న పోలీసులు
- పరారీలోనే సోదరుడు వెంకట్రామిరెడ్డి
నరసరావుపేట: పల్నాడు జిల్లా మాచర్ల వైసీపీ మాజీ ఎమ్మెల్యే పిన్నెల్లి రామకృష్ణారెడ్డి ఎట్టకేలకు అరెస్టయ్యారు. ఎన్నికల సమయంలో పాల్పడిన నేరాలకు సంబంధించి హైకోర్టు తాత్కాలిక ఉపశమనం నేపథ్యంలో పిన్నెల్లి ఇంతకాలం అరెస్టు కాకుండా తప్పించుకున్నారు. పిన్నెల్లి ముందస్తు బెయిల్‌ పిటిషన్లను హైకోర్టు బుధవారం కొట్టివేయడంతో పోలీసులు వెంటనే ఆయనను నరసరావుపేటలో అరెస్ట్‌ చేసి పల్నాడు జిల్లా ఎస్పీ కార్యాలయానికి తరలించారు.
గత మే 13న పోలింగ్‌ రోజు మాచర్ల నియోజకవర్గంలో పిన్నెల్లి రెచ్చిపోయారు. రెంటచింతల మండలం పాల్వాయిగేటు పోలింగ్‌ కేంద్రంలో ఈవీఎంను ధ్వంసం చేశారు. బయటకు వస్తున్న సమయంలో చెరుకూరి నాగశిరోమణి అనే మహిళ నిలదీయటంతో ఆమెను తీవ్రంగా హెచ్చరిస్తూ దుర్భాషలాడారు. దీనిపై రెంటచింతల పోలీసులు 506, 509 సెక్షన్ల కింద కేసు నమోదు చేశారు. ఈవీఎం ధ్వంసం చేయడాన్ని అడ్డుకోబోయిన టీడీపీ ఏజెంట్‌ నంబూరి శేషగిరిరావుపై దాడి చేశారు. దీనిపై ఎమ్మెల్యే, మరో 15 మందిపై సెక్షన్‌ 307, 147, 148, 120బీ, 324, రెడ్‌ విత్‌ 149 ఐపీసీ కింద రెంటచింతల పోలీసు స్టేషన్‌లో కేసు నమోదైంది. తనను చంపేయాలని వైసీపీ శ్రేణుల్ని పిన్నెల్లి ఉసిగొల్పినట్టు శేషగిరిరావు ఫిర్యాదు చేశారు. ఈ కేసులో రామకృష్ణారెడ్డిని ఏ-1గా చేర్చారు. దాడి చేసిన ఎమ్మెల్యే అనుచరులు చింతా సుబ్బారావు, మరికొందరిని కేసులో చేర్చారు.
మే 14న పిన్నెల్లి, ఆయన తమ్ముడు వెంకట్రామిరెడ్డి అనుచరులతో కలిసి కారంపూడిలో అలజడి సృష్టించారు. రౌడీమూకలతో టీడీపీ కార్యాలయంపై దాడిచేశారు. టీడీపీ సానుభూతిపరులపై దాడులు చేస్తూ ఆస్తుల విధ్వంసానికి పాల్పడ్డారు. అడ్డుకోబోయిన సీఐ నారాయణస్వామిపై దాడిచేయడంతో ఆయన గాయపడ్డారు. దీనిపై వీఆర్వో ఫిర్యాదు మేరకు పిన్నెల్లి రామకృష్ణారెడ్డి, పిన్నెల్లి వెంకట్రామిరెడ్డి మరికొందరిపై సెక్షన్‌ 307, 332, 143, 147, 324, 149 సెక్షన్ల కింద కేసు నమోదుచేశారు. ఈ కేసులకు సంబంధించి తనను అరెస్టు చేస్తారనే భయంతో పిన్నెల్లి అజ్ఞాతంలోకి వెళ్లిపోయారు. ఆ తర్వాత హైకోర్టులో బెయిల్‌ పిటిషన్‌ దాఖలు చేయగా జూన్‌ 4వరకూ అరెస్టు వద్దని హైకోర్టు ఆదేశించింది.
జూన్‌ 4న ఎన్నికల ఓట్ల లెక్కింపు సందర్భంగా ఏజెంట్ల నియామకానికి ఇబ్బంది లేకుండా ఆయనకు అరెస్ట్‌ నుంచి మినహాయింపు ఇచ్చింది. అయితే నంబూరి శేషగిరిరావు దీనిపై సుప్రీింకోర్టులో పిటిషన్‌ వేశారు. పిన్నెల్లిని అరెస్టు చేయకపోవటంపై సుప్రీంకోర్టు ఆగ్రహం వ్యక్తం చేసింది. హైకోర్టు వెంటనే తగిన ఆదేశాలు ఇవ్వాలని చెప్పింది. హైకోర్టులో పిన్నెల్లి బెయిల్‌ పిటిషన్‌ ఆ తర్వాత విచారణకు వచ్చినా తీర్పు రిజర్వ్‌ చేసి ఉంచారు. బుధవారం బెయిల్‌ పిటిషన్లు కొట్టివేస్తూ హైకోర్టు ఆదేశాలు జారీ చేసింది. మొత్తం నాలుగు కేసుల్లోనూ అరెస్టు నుంచి రక్షణ కల్పించేందుకు హై కోర్టు నిరాకరించింది. గతంలో ఇచ్చిన మధ్యంతర ఉత్తర్వులను రద్దు చేసింది. నాలుగు పిటిషన్లను న్యాయస్థానం కొట్టివేయడంతో పిన్నెల్లిని పోలీసులు అరెస్టు చేసి ఎస్పీ కార్యాలయానికి తరలించారు. అక్కడి నుంచి నరసరావుపేట ప్రాంతీయ ఆసుపత్రికి తీసుకెళ్లి వైద్య పరీక్షలు నిర్వహించారు.
పరారీలోనే పిన్నెల్లి సోదరుడు వెంకట్రామిరెడ్డి
కాగా ఈ కేసుల్లో నిందితుడిగా ఉన్న పిన్నెల్లి సోదరుడు వెంకట్రామిరెడ్డి అప్పటి నుంచి పరారీలో ఉన్నారు. అయితే పోలీసులు అతడిని ఎందుకు అరెస్ట్‌ చేయలేకపోయారని టీడీపీ ప్రశ్నిస్తోంది. పోలీసు శాఖలో కొంతమంది దిగువ స్థాయి అధికారులు ఇస్తున్న సమాచారంతోనే వెంకట రామిరెడ్డి తప్పించుకు తిరుగుతున్నారనే విమర్శలు వస్తున్నాయి.
