- ఆదాయాన్నిబట్టి స్థాయీ వర్గీకరణ
- ఇక..‘వన్‌ ఫ్యామిలీ-వన్‌ ఎంటర్‌ప్రెన్యూర్‌’
- ఎంఎస్‌ఎంఈలుగా స్వయం సంఘాలు
- ముఖ్యమంత్రి చంద్రబాబు ఆదేశం
అమరావతి (చైతన్య రథం): ‘వన్‌ ఫ్యామిలీ- వన్‌ ఎంటర్‌ప్రెన్యూర్‌’ లక్ష్యానికి అనుగుణంగా రాష్ట్రంలోని స్వయం సహాయక సంఘాలు ఆర్ధిక పురోగతి సాధించేలా చూడాలని సీఎం చంద్రబాబు సెర్ప్‌, మెప్మా అధికారులను ఆదేశించారు. ఇందుకోసం అన్ని ఎస్‌హెచ్‌జీలను, వాటి ఆదాయ ఆర్జనబట్టి ఐదు కేటగిరీలుగా విభజించాలని సూచించారు. ఏడాదికి రూ.లక్షకన్నా తక్కువ ఆదాయం వచ్చే గ్రూపును ‘నాన్‌ లాక్‌పతి’గా, రూ.లక్ష నుంచి రూ.10 లక్షలు వరకు ‘లాక్‌పతి’, రూ.10 లక్షలుపైన సంపాదిస్తే ‘మైక్రో’, రూ.50 లక్షలుకన్నా అధికంగా ఆదాయం వస్తే ‘స్మాల్‌’, రూ.కోటి కన్నా ఎక్కువ ఆర్జిస్తే ‘మీడియం’ కేటగిరీలుగా విభజించాలన్నారు. అలాగే వ్యవసాయం, పరిశ్రమలు, సేవారంగంవారీగా ఆదాయ వివరాలు ఉండాలన్నారు. మంగళవారం సచివాలయంలోని తన కార్యాలయంలో ముఖ్యమంత్రి సెర్ప్‌, మెప్మా అధికారులతో సమీక్షా నిర్వహించి పలు సూచనలు చేశారు.
లక్ష ఎంఎస్‌ఎంఈ రిజిస్ట్రేషన్లు లక్ష్యం
స్వయం సహాయక సంఘాలను ఎంఎస్‌ఎంఈలుగా రిజిస్ట్రేషన్‌ చేసే కార్యక్రమాన్ని వేగవంతం చేయాలని, తద్వారా కేంద్ర ప్రభుత్వం వివిధ పథకాల కింద అందించే ప్రోత్సాహకాలతో ఆయా సంఘాలకు లబ్ది చేకూరుతుందని ముఖ్యమంత్రి అన్నారు. ఈ ఆర్ధిక సంవత్సరంలో కనీసం లక్ష ఎంఎస్‌ఎంఈ రిజిస్ట్రేషన్లు అయినా చేయాలన్నారు. డ్రోన్‌ దీదీ పథకాన్ని స్వయం సహాయక సంఘాలు సద్వినియోగం చేసుకునేలా అవగాహన కల్పించాలన్నారు. అలాగే ఈ`కామర్స్‌ ప్లాట్‌ఫామ్‌లను వినియోగించుకుని ఆర్ధికంగా బలోపేతమయ్యేలా స్వయం సహాయక బృంద సభ్యులకు శిక్షణ అందించాలని సూచించారు. ఎస్‌హెచ్‌జీ సభ్యుల తలసరి ఆదాయం రాష్ట్ర తలసరి ఆదాయంకన్నా చాలా తక్కువ ఉందని, దీనిపై దృష్టిపెట్టి వారి ఆదాయమార్గాలు మెరుగు పరిచేలా ఆలోచన చేయాలని ముఖ్యమంత్రి చంద్రబాబు ఆదేశించారు.
