- వంద రోజుల్లో 5 నూతన పాలసీలు
- 4 ప్రాంతాల్లో కొత్త ఇండస్ట్రియల్‌ క్లస్టర్లు
- పరిశ్రమలకు మరిన్ని ప్రోత్సాహకాలు
- మరలిపోయిన ఇన్వెస్టర్లతో సంప్రదింపులు
- మల్లవల్లి వాడలో భూ ధరల తగ్గింపుపై యోచన
- పరిశ్రమల శాఖను సమీక్షించిన సీఎం చంద్రబాబు
అమరావతి (చైతన్య రథం): వచ్చే 100 రోజుల్లో కొత్తగా 5 పాలసీలు రూపొందించాలని పరిశ్రమల శాఖ అధికారులను ముఖ్యమంత్రి చంద్రబాబు ఆదేశించారు. కొత్త ఇండస్ట్రీయల్‌ పాలసీ, ఎంఎస్‌ఎంఇ పాలసీ, ఫుడ్‌ ప్రాసెసింగ్‌ పాలసీ, ఎలక్ట్రానిక్‌, ఐటీ అండ్‌ క్లౌడ్‌ పాలసీ, టెక్స్‌టైల్‌ పాలసీలు తేవాలన్నారు. అత్యుత్తమ పాలసీలద్వారా పెట్టుబడుల ఆకర్షణకు అనువైన వాతారవణం కల్పించాలని అధికారులను ఆదేశించారు. రాష్ట్రంలో పరిశ్రమల ఏర్పాటు, తీసుకురావాల్సిన కొత్త పాలసీలపై ముఖ్యమంత్రి చంద్రబాబు సంబంధిత శాఖ అధికారులతో గురువారం విస్తృత సమీక్ష నిర్వహించారు. గత పదేళ్లలో పెట్టుబడుల కోసం వివిధ సందర్భాల్లో చేసుకున్న ఒప్పందాలు, వాటి ప్రస్తుత పరిస్థితిపై అధికారులను ఆరా తీశారు. ఈ సందర్భంగా ముఖ్యమంత్రి మాట్లాడుతూ కొత్త పాలసీలు రూపొందించే సమయంలో `రాష్ట్రాన్ని గ్రీన్‌ హైడ్రోజన్‌, గ్రీన్‌ ఎనర్జీ హబ్‌గా చెయ్యాలనే లక్ష్యాన్ని దృష్టిలో పెట్టుకోవాలన్నారు.
అదేవిధంగా కొత్తగా నాలుగు పారిశ్రామిక క్లస్టర్లపై ప్రతిపాదనలు సిద్ధంచేసి కేంద్ర అనుమతులు పొందాలని సీఎం సూచించారు. కుప్పం, మూలపేట, చిలమత్తూరు, దొనకొండ లేదా పామూరులో కొత్త క్లస్టర్లు ఏర్పాటు చేయాలని.. ఈమేరకు ప్రక్రియ ప్రారంభించాలని సీఎం ఆదేశించారు. ఆయా క్లస్టర్లలో ఎలక్ట్రానిక్స్‌, ఫార్మా, ఫుడ్‌ ప్రాసెసింగ్‌, హార్డ్‌ వేర్‌ సంస్థల ఏర్పాటుకు కృషి చేయాలని ఆదేశించారు. అలాగే కృష్ణపట్నం, నక్కపల్లి, ఓర్వకల్లు, కొప్పర్తి నోడ్స్‌ ప్రోగ్రస్‌పై చర్చించారు. నక్కపల్లిలో రూ.11,542 కోట్లతో ఏర్పాటు చేసే బల్క్‌ డ్రగ్‌ పార్క్‌, రూ.60 వేల కోట్లతో ఏర్పాటయ్యే ఎన్టీపీసీ గ్రీన్‌ హైడ్రొజన్‌ హబ్‌, ప్రస్తుతం చర్చలు జరుపుతున్న బీపీసీఎల్‌ ప్రాజెక్టుల స్థితిగతులపై అధికారులతో సీఎం చంద్రబాబు సమీక్షించారు.
గత తెలుగుదేశం ప్రభుత్వ హయాంలో రూ.16 లక్షల కోట్ల పెట్టుబడులపై ఒప్పందాలు చేసుకోగా… తరువాత వచ్చిన ప్రభుత్వం అనుసరించిన విధానాల కారణంగా పారిశ్రామికవేత్తలు వెనక్కి వెళ్లిపోయారని సీఎం అన్నారు. పారిశ్రామికవేత్తలను ఇబ్బందులు పెట్టడం, రాజకీయ వేధింపులకు గురిచేయడంతో కంపెనీలు పెట్టుబడుల ఒప్పందాలను రద్దు చేసుకున్నాయని… కొత్త కంపెనీలు కూడా రాలేదని సీఎం వ్యాఖ్యానించారు. మళ్లీ పారిశ్రామికవేత్తల్లో నమ్మకం కల్పించాల్సిన అసవరం ఉందన్నారు. పారిశ్రామిక అవసరాల కోసం తీసుకున్న భూములను ఇతర అవసరాలకూ వినియోగించారని ఈ సందర్భంగా ముఖ్యమంత్రి చంద్రబాబు దృష్టికి అధికారులు తీసుకొచ్చారు.
వివిధ ప్రాంతాల్లో పరిశ్రమల కోసం సేకరించిన భూముల్లో 1,382 ఎకరాలను ఇళ్ల పట్టాలకు తీసుకున్నారని అధికారులు తెలిపారు. పేదలకు ఇళ్లు ఇచ్చేందుకు అసవరమైన స్థలం సేకరించి ఇవ్వాల్సి ఉన్నా… పరిశ్రమలకు ఇచ్చే స్థలాలు ఇచ్చేశారని వివరించారు. గత తెలుగుదేశం ప్రభుత్వ హయాంలో పరిశ్రమలకు 66 శాతం ప్రోత్సాహకాలు కల్పిస్తే… వైసీపీ హయాంలో 34 శాతం మాత్రమే ఇచ్చారని వివరించారు. దీనిపై సీఎం చంద్రబాబు స్పందిస్తూ.. పారిశ్రామిక ప్రోత్సాహకాలిచ్చే అంశాన్ని పరిశీలిద్దామన్నారు. తద్వారా పెట్టుబడులకు ఆస్కారం ఏర్పడుతుందని అభిప్రాయపడ్డారు.
2014 -2019 కాలంలో 64 ఇండస్ట్రియల్‌ పార్కుల ద్వారా 14,125 ఎకరాలు అందుబాటులోకి తెస్తే…. 2019 -2024 మధ్య కేవలం 31 పార్కులు అందుబాటులోకి తెచ్చారన్నారు. ఇలాంటి పరిణామాలతో పారిశ్రమికవేత్తలు, పెట్టుబడిదారులు నమ్మకం కోల్పోయారని సీఎం వ్యాఖ్యానించారు. నాడు ఒప్పందాలు చేసుకుని వైసీపీ ప్రభుత్వ విధానాల కారణంగా వెనక్కిమళ్లిన వారితో సంప్రదింపులు జరపాలని, అవసరమైతే తానూ మాట్లాడుతానని ముఖ్యమంత్రి అన్నారు. ఇప్పటికే పనులు ప్రారంభించిన ప్రాజెక్టులను వేగవంతం చేయాలని సీఎం సూచించారు. తద్వారా ఏడాదికాలంలో లక్ష కోట్ల పెట్టుబడులకు సంబంధించిన ప్రాజెక్టులు పూర్తి చేసి 1,36,260 మందికి ఉపాధి కల్పించాలని సూచించారు. ఉమ్మడి కృష్ణాజిల్లా మల్లవల్లి పారిశ్రామిక వాడలో భూముల రేట్లు తగ్గించి…పెట్టుబడులకు ఊతమివ్వాలని సీఎం ఆదేశించారు. వైసీపీ ప్రభుత్వం దీన్ని పూర్తిగా వివాదాల్లోకి నెట్టేసి నిర్వీర్యం చేసిందని ముఖ్యమంత్రి చంద్రబాబు వ్యాఖ్యానించారు.
