అమరావతి(చైతన్యరథం): గత నాలుగు రోజులుగా వరద సహాయక చర్యల్లో నిర్విరామంగా పాల్గొంటున్న సీఎం చంద్రబాబుపై త్రిదండి రామానుజ చిన్నజీయర్‌ స్వామి ప్రశంసలు కురిపించారు. వరద బాధితులను ఆదుకునేందుకు ముఖ్యమంత్రి చంద్రబాబు శ్రమిస్తున్న తీరును అభినందించారు. వరద బాధితుల కోసం చంద్రబాబు చేపడుతున్న సహాయక చర్యలు, అర్ధరాత్రి వేళ కూడా ముంపు ప్రాంతాల్లో తిరిగే ఆయన ఓపిక తమకు ఆశ్చర్యాన్ని కలిగిస్తున్నాయన్నారు. ఇలాంటి విపత్కర సమయంలో ముఖ్యమంత్రి చంద్రబాబు యువకుల కంటే ఉత్సాహంగా పనిచేస్తున్నారని కొనియాడారు.
సమయాన్ని వ్యర్థం చేయకుండా, అనేక సహాయక చర్యలు చేపడుతూ ప్రజలకు ఆపన్నహస్తం అందిస్తుండడం సంతోషదాయకమని పేర్కొన్నారు. ఆయన మరింత ఆరోగ్యంగా ఉండాలని, ఇలాంటి కార్యక్రమాలు చేయగలిగే శక్తి భగవంతుడు ఇవ్వాలని కోరుకుంటున్నాం. గతంలో విశాఖపట్నంలో హుద్‌హుద్‌ తుపాను తీవ్ర ప్రభావం చూపినప్పుడు, ఎంత శీఘ్రగతిన పునరుద్ధరణ చేశారో, ఈసారి విజయవాడ పరిసర ప్రాంతాలను కూడా అంత వేగంగా పునరుద్ధరిస్తున్నారని చిన్నజీయర్‌ స్వామి వివరించారు.
