- పరిశుభ్రంగా గ్రామాలు, పట్టణాలు
- స్వయంసమృద్ధి దిశగా అన్న క్యాంటీన్లు
- టీటీడీ తరహాలో కార్పస్‌ ఫండ్‌కు కృషి
- కలెక్టర్ల సదస్సులో సీఎం చంద్రబాబు
అమరావతి (చైతన్య రథం): రాష్ట్రంలో ఏ మున్సిపాల్టీలో చెత్త కనపడటానికి వీల్లేదని ముఖ్యమంత్రి చంద్రబాబు కలెక్టర్లను ఆదేశించారు. సచివాలయంలో జరిగిన కలెక్టర్ల సదస్సులో మాట్లాడుతూ పట్టణాలు, గ్రామాలు పరిశుభ్రంగా ఉండేలా చర్యలు తీసుకోవాలన్నారు. అంటువ్యాధుల పట్ల శ్రద్ద కనబరచాలన్నారు. క్రమం తప్పకుండా నీటి పరీక్షలు నిర్వహించడంతోపాటు, దోమల బెడద నివారణకు డ్రోన్‌ సహకారం తీసుకోవాలని సూచించారు. రాష్ట్రంలో అన్న క్యాంటీన్లు స్వయం సమృద్ధితో నిర్వహించేలా చర్యలు తీసుకోవాలన్నారు. భక్తులిచ్చిన విరాళాలతో రూ.వెయ్యి కోట్ల కార్పస్‌ ఫండ్‌ ఏర్పాటుచేసి టీటీడీ నిత్యాన్నదానం నిర్వహిస్తోందన్నారు. అలాగే అన్న క్యాంటీన్లు కూడా దాతలనుంచి విరాళాలు సేకరించి స్వయంసమృద్ధి సాధించేలా ప్రణాళికలు రూపొందించాలని సూచించారు. దాతలకు స్ఫూర్తి కలిగించేలా కార్యక్రమాన్ని ఏవిధంగా ముందుకు తీసెకెళ్తే బాగుంటుందో వినూత్న ఆలోచనలతో అధికారులు ముందుకు రావాలని కోరారు.
స్వచ్ఛ భారత్‌ యూసీ సర్టిఫికెట్లు ఇవ్వండి
స్వచ్ఛ భారత్‌ నిర్వహణలో ఒకప్పుడు మనం ముందున్నామని, కాని గత ఐదేళ్లలో పథకం కింద రాష్ట్రానికి కేంద్రమిచ్చిన నిధులు ఏమయ్యాయో తెలీని పరిస్థితి నెలకొందన్నారు. ఢల్లీికి వెళ్తే కేంద్రం చేసే ప్రధాన ఫిర్యాదు ఏంటంటే స్వచ్ఛ భారత్‌కు మేంఇచ్చిన డబ్బులకు ఇప్పటి వరకు యుటిలైజేషన్‌ సర్టిఫికేట్‌ ఇవ్వలేదు అంటున్నారని, జిల్లా కలెక్టర్లు వెంటనే యుటిలైజేషన్‌ సర్టిఫికెట్లు ఇచ్చేలా తమ తమ జిల్లాలో చర్యలు తీసుకోవాలని ఆదేశించారు. చెత్తనుంచి సంపద సృష్టించవచ్చని తాను ఏనాడో చెప్పానని, ఇప్పుడు ఎన్నో ప్రైవేటు సంస్థలు చెత్తను విద్యుత్తుగా మార్చి మనకు డబ్బులు చెల్లించడానికి ముందుకొస్తున్నాయని, దాన్ని సమర్థవంతంగా వినియోగించుకోవాలన్నారు. అన్ని మున్సిపాల్టీల్లో చెత్త సేకరించి, దానినుంచి విద్యుత్తు తయారీ దిశగా అడుగులు వేయాలన్నారు. దీనికోసం గతంలో తాము ప్రవేశపెట్టిన పద్ధతులను పునరుద్ధరించాలని సూచించారు.
అమరావతిలో పీపీపీ విభాగం
రహదారుల నిర్వహణ పీపీపీ విధానంలో ప్రవేటు సంస్థలకు అప్పగించే అంశాన్ని పరిశీలించాలని ముఖ్యమంత్రి అధికారులకు సూచించారు. దీనివల్ల ఆ రహదారిని వారు సమర్థవంతంగా నిర్వహించడమే కాకుండా రోడ్డు మీద గుంతలు పడినా ఎప్పటికప్పుడు ఆ గుంతలను పూడ్చి మరమ్మతులు చేస్తారన్నారు. పబ్లిక్‌ ప్రైవేట్‌ పార్టనర్షిప్‌కు ఆకాశమే హద్దన్నారు. అమరావతిలో ప్రత్యేకించి ఒక పీపీపీ విభాగం ఏర్పాటు చేస్తున్నామని, జిల్లాల్లో పీపీపీ మోడల్‌లో ఏదైనా పని చేయాలంటే ఈ విభాగాన్ని సంప్రదించి వారినుంచి సలహాలు సూచనలు కూడా పొందవచ్చని తెలిపారు. పేదలకు రూ.25 లక్షల ఆరోగ్య బీమా కల్పిస్తామని ఎన్నికల్లో మాటిచ్చామని, ఆ దిశగా ఆరోగ్య బీమా నిర్వహణ దేశంలోనే బెస్ట్‌ మోడల్‌గా ఉండాలన్నారు. నాడు తాము వైద్యరంగంలో పీపీపీ మోడల్‌లో చేపట్టిన చర్యలో భాగంగా మెడ్‌ టెక్‌ ఏర్పాటు చేస్తే, అదిప్పుడు దేశంలోనే నెంబర్‌వన్‌గా ఉందన్నారు. అధికారులందరూ వినూత్న ఆలోచనలతో పనిచేయాలని అంటూనే.. సంక్షోభం అనేది ఒక అవకాశంగా సీఎం చంద్రబాబు అభివర్ణించారు.
