మీ కష్టాలు చూసి చలించిపోయా

• అందుకే పింఛన్‌ పెంపు ఏప్రిల్‌ నుంచే వర్తింపజేశా
• ఆర్థిక సమస్యలున్నా పింఛన్‌ పెంపుపై నిర్ణయం
• ప్రజల ఆకాంక్షలు నెరవేర్చడమే ప్రథమ కర్తవ్యం
• రాష్ట్ర ప్రజలకు సీఎం చంద్రబాబు బహిరంగ లేఖ

అమరావతి: ప్రజల ఆశలు, ఆకాంక్షలు నెరవేర్చడమే తమ ప్రథమ కర్తవ్యమని ముఖ్యమంత్రి చంద్రబాబు నాయుడు స్పష్టం చేశారు. ఈ మేరకు రాష్ట్ర ప్రజలకు శనివారం చంద్రబాబు బహిరంగ లేఖ రాశారు. ప్రజలు ఎన్నో ఆశలతో తమను గెలిపించారన్నారు. వారి ఆకాంక్షలు నెరవేర్చడమే తమ ధ్యేయమన్నారు. మీ అందరి మద్దతుతో రాష్ట్రంలో ప్రజా ప్రభుత్వం ఏర్పడిరది. మీకు అండగా నిలుస్తూ, సంక్షేమం చూసే ప్రజా ప్రభుత్వం కొలువుదీరింది. మీ ఆశలు, ఆకాంక్షలను నెరవేర్చడమే తక్షణ కర్తవ్యం. ఎన్నికలకు ముందే మ్యానిఫెస్టోలో చెప్పినట్లు పెన్షన్‌ను ఒకేసారి రూ. 1000 పెంచాం. ఇకపై రూ.4000 పెన్షన్‌ ఇస్తాం. దివ్యాంగులకు పింఛన్‌ రూ.6 వేలు ఇస్తున్నందుకు సంతోషంగా ఉంది. జులై 1 నుంచే పెంచిన పింఛన్లు ఇంటి వద్దే అందిస్తాం. 65,18,496 మంది పింఛన్‌ లబ్దిదారులకు జూలై 1వ తేదీ నుంచే పెంచిన పింఛన్లు ఇంటి వద్ద అందిస్తాం.

కొత్త ప్రభుత్వం ముందు అనేక ఆర్థిక సమస్యలు ఉన్నాయి. ప్రజా సంక్షేమం కోసం ప్రభుత్వం ఏర్పడిన తొలి రోజు నుంచే ప్రజలకు మంచి చేసే నిర్ణయాలు తీసుకున్నాం. పింఛన్ల పెంపు వల్ల ప్రభుత్వంపై నెలకు అదనంగా రూ.819 కోట్ల భారం పడుతుంది. అయినప్పటికీ ప్రజా శ్రేయస్సు కోసం ఈ నిర్ణయం వెంటనే అమల్లోకి తీసుకొచ్చాం. ఎన్నికల సమయంలో వికృత రాజకీయాల కోసం ఆ నాటి అధికార పక్షం మిమ్మల్ని పెన్షన్‌ విషయంలో ఎంతో క్షోభకు గురిచేసింది. ఆ మూడు నెలలు మీరు పింఛన్‌ అందుకోవడానికి పడిన కష్టాలు చూసి నేను చలించిపోయా. మండుటెండలో, వడగాల్పుల మధ్య మీరు పడిన అగచాట్లు చూశా. అందుకే ఏప్రిల్‌ నెల నుంచే పింఛన్‌ పెంపును వర్తింపచేస్తానని మాటిచ్చాం. ఏప్రిల్‌, మే, జూన్‌ నెలలకు కూడా పెంపును వర్తింప చేసి అందిస్తున్నాం. నెలకు రూ.1000 చొప్పున మూడు నెలలకు పెంచిన రూ.3000, జూలై నెల పింఛన్‌ రూ.4000 కలిపి మొత్తం రూ.7000 మీ ఇంటికి తెచ్చి ఇస్తున్నామని సీఎం చంద్రబాబు స్పష్టం చేశారు.

ఎన్టీఆర్‌ పేరుతో పెన్షన్ల పంపిణీ
సంక్షేమ పాలకుడు, సామాజిక పెన్షన్‌ విధానానికి ఆద్యుడు స్వర్గీయ ఎన్టీఆర్‌ పేరును పెన్షన్ల కార్యక్రమానికి పెట్టాం. ఎన్టీఆర్‌ భరోసా పేరుతో ఇకపై మీ ఇంటి వద్దకొచ్చి సామాజిక పెన్షన్ల పంపిణీ జరుగుతుంది. పెరిగిన పెన్షన్‌తో మీకు ఆర్థిక స్వావలంబన, భరోసా లభిస్తుందని ఆశిస్తున్నాం. ప్రజా భద్రత మా బాధ్యత. ప్రజలు సంతోషంగా, ఆరోగ్యంగా ఉండాలని కోరుకుంటున్నాం. ఎప్పుడూ మంచి చేయాలని చూసే ప్రజా ప్రభుత్వాన్ని ఆశీర్వదించాలని కోరుకుంటున్నానని లేఖలో చంద్రబాబు కోరారు.