- జగన్‌ ఐదేళ్లలో చేయలేని అభివృద్ధి కేవలం 5 నెలల్లో చేశాం
- దమ్ముంటే చర్చకు రండి
- రాష్ట్ర ఆర్థిక వ్యవస్థను జగన్‌ నాశనం చేశారు
- మంత్రులు సవిత, కొండపల్లి శ్రీనివాస్‌ ధ్వజం
పెనుకొండ (చైతన్యరథం): జగన్‌ పాలన అంతా అప్పులమయమేనని, ఐదేళ్లలో వైసీపీ చేయని అభివృద్ధి కూటమి ప్రభుత్వం కేవలం 5 నెలల కాలంలోనే చేసి చూపించిందని రాష్ట్ర మంత్రులు ఎస్‌ సవిత, కొండపల్లి శ్రీనివాస్‌ స్పష్టం చేశారు. సీఎం చంద్రబాబు అంటేనే పెద్ద బ్రాండ్‌ అని, ఇందుకు రాష్ట్రానికి తరలొస్తున్న వేల కోట్ల రూపాయల పెట్టుబడులే నిదర్శమన్నారు. గత ఐదు నెలల కాలంలో జరిగిన అభివృద్ధిపై చర్చకు సిద్ధమని జగన్‌కు మంత్రి సవిత సవాల్‌ విసిరారు. గడిచిన 5 ఏళ్లలో వ్యవస్థలన్నీ నిర్వీర్యమైపోయాయని, ఆర్థిక వ్యవస్థ తీవ్రంగా దెబ్బతిందని మంత్రి కొండపల్లి శ్రీనివాస్‌ ఆవేదన వ్యక్తంచేశారు. ఉమ్మడి అనంతపురం జిల్లాలోని పెనుకొండలో ఎంఎస్‌ఎంఈల ఏర్పాటుపై సోమవారం నిర్వహించిన సమీక్షా సమావేశానికి రాష్ట్ర ఎంఎస్‌ఎంఈ, సెర్ప్‌, ఎన్నారై సాధికారత, సంక్షేమ సంబంధాల శాఖల మంత్రి కొండపల్లి శ్రీనివాస్‌ విచ్చేశారు. ఈ సందర్భంగా ఆయన… రాష్ట్ర బీసీ సంక్షేమ శాఖ మంత్రి సవితను మర్యాదపూర్వకంగా కలిశారు. అనంతరం నిర్వహించిన సభలో మంత్రులు మాట్లాడారు. ముందుగా మంత్రి సవిత మాట్లాడుతూ, రాష్ట్రాభివృద్ధే ధ్యేయంగా సీఎం చంద్రబాబు పాలన సాగిస్తున్నారన్నారు.
ముఖ్యంగా యువతకు 20 లక్షల ఉద్యోగ, ఉపాధి అవకాశాలు కల్పించాలన్న లక్ష్యంతో స్వయం ఉపాధి రుణాలు అందజేసి ఎంఎస్‌ఎంఈలు, యూనిట్లు ఏర్పాటు చేయనున్నామన్నారు. ప్రతి ఇంటి నుంచి ఒక వ్యాపార వేత్తను తయారు చేయడమే లక్ష్యంగా ప్రణాళికలు అమలు చేస్తున్నామన్నారు. జగన్‌ ఐదేళ్ల పాలన అంతా అప్పులమయమేనని మంత్రి సవిత మండిపడ్డారు. జగన్‌ ఐదేళ్ల కాలంలో చేయలేని అభివృద్ధిని సీఎం చంద్రబాబునాయుడు కేవలం 5 నెలల కాలంలోనే చేసి చూపించారన్నారు. సంక్షేమానికి కూడా ప్రాధాన్యమిస్తూ.. ఎన్నికల్లో ఇచ్చిన హామీలను అమలు చేస్తున్నారన్నారు. అవ్వతాతలకు పెన్షన్‌ను రూ.3 వేల నుంచి రూ.4 వేలకు, దివ్యాంగులకు రూ.6 వేలకు పెంచామన్నారు. ఉచిత ఇసుకతో పాటు, మహిళలకు మూడుగ్యాస్‌ సిలిండర్లు అందజేస్తున్నామన్నారు. అన్న క్యాంటీన్లు తిరిగి ఏర్పాటు చేశామని, జగన్‌ తీసుకొచ్చిన చీకటి చట్టం ల్యాండ్‌ టైటిల్‌ యాక్డు రద్దు చేశామని తెలిపారు.
పారిశ్రామిక హబ్‌గా సీమ
రాయలసీమను పరిశ్రమల హబ్‌గా రూపుదిద్దుతున్నామని మంత్రి సవిత తెలిపారు. ఇందుకోసం సీఎం చంద్రబాబు, మంత్రి నారా లోకేష్‌ రేయింబవళ్లు కృషి చేస్తున్నారన్నారు. సీఎం చంద్రబాబు అంటేనే ఓ బ్రాండ్‌ అని…ఆయన పరిపాలన దక్షత చూసి ఎందరో పారిశ్రామికవేత్తలు పెట్టుబడులు పెట్టడానికి ముందుకొస్తున్నారని తెలిపారు. గత టీడీపీ ప్రభుత్వంలో పెనుకొండలో ఏర్పాటు చేసిన కియా పరిశ్రమ నేడు వేలాది మందికి ఉపాధి కల్పిస్తోందన్నారు. త్వరలో ఎంఎస్‌ఎంఈలు ఏర్పాటు చేసి యువతకు మరింత ఉపాధి కల్పించనున్నామని తెలిపారు. ఎంతో రాజకీయ అనుభవం కలిగిన కుటుంబం నుంచి మంత్రి కొండపల్లి శ్రీనివాస్‌ వచ్చారని మంత్రి సవిత కొనియాడారు.
రాష్ట్ర ఆర్థిక వ్యవస్థను నాశనం చేసిన జగన్‌
గత ఐదేళ్ల జగన్‌ పాలనలో రాష్ట్ర ఆర్థిక వ్యవస్థ పూర్తిగా నాశనమైపోయిందని మంత్రి కొండపల్లి శ్రీనివాస్‌ ఆవేదన వ్యక్తంచేశారు. సీఎం చంద్రబాబు దానిని తిరిగి గాడిలో పెడుతున్నారన్నారు. రాష్ట్రంలో ఎంఎస్‌ఎఈ యూనిట్లు నెలకొల్పి, యువతకు ఉపాధి కల్పించనున్నట్లు తెలిపారు. ఆయా ప్రాంతాల్లో అవసరాలకనుగుణంగా ఎంఎస్‌ఎంఈ యూనిట్లు నెలకొల్పనున్నట్లు తెలిపారు. ఉమ్మడి అనంతపురం జిల్లాలో సూక్ష్మ, చిన్నతరహా పరిశ్రమల ఏర్పాటుకు అధిక ప్రాధాన్యమిస్తున్నామన్నారు. డ్వాక్రా సంఘాల ద్వారా వ్యాపారాల నిర్వహణకు ప్రణాళికలు సిద్ధం చేశామన్నారు. ఈ ప్రాంత యువతకు, మహిళలకు మేలు చేయాలన్న లక్ష్యంతో సీఎం చంద్రబాబు ఉన్నారన్నారు. అర్హులైన వారందరికీ పెన్షన్లు ఇవ్వనున్నట్లు మంత్రి శ్రీనివాస్‌ తెలిపారు. అనంతరం మంత్రులు సవిత, శ్రీనివాస్‌ లను కూటమి నాయకులు ఘనంగా సత్కరించారు. ఈ కార్యక్రమంలో పలువురు టీడీపీ నాయకులు, కార్యకర్తలు పాల్గొన్నారు.
