- వైసీపీ అసమర్థ విధానాలకు ‘అసర్‌’ అక్షరసాక్ష్యం
- జగన్‌ ప్రగల్పాలే తప్ప.. ఫలితాలు శూన్యం
- వైసీపీ విధానాలపై సీడాప్‌ ఛైర్మన్‌ ఆగ్రహం
- కూటమి పాలనలోనే ‘విద్య’కు ప్రాధాన్యమని వ్యాఖ్య
అమరావతి (చైతన్య రథం): వైసీపీ ప్రభుత్వం విద్యారంగాన్ని పూర్తిగా భ్రష్టుపట్టించిందని చెప్పడానికి కేంద్రం విడుదల చేసిన అసర్‌ నివేదికే సాక్ష్యమని సీడాప్‌ చైైర్మన్‌ దీపక్‌ రెడ్డి వ్యాఖ్యానించారు. మంగళగిరిలోని తెలుగుదేశం పార్టీ కేంద్ర కార్యాలయంలో బుధవారం ఏర్పాటు చేసిన విలేఖరుల సమావేశంలో దీపక్‌ రెడ్డి మాట్లాడుతూ… ‘వైసీపీ ప్రభుత్వం విద్యారంగాన్ని పూర్తిగా దెబ్బతీసింది. అందుకు కేంద్రం విడుదల చేసిన అసర్‌ నివేదికే సాక్ష్యం. వైసీపీ ప్రభుత్వం విద్యార్థుల జీవితాలతో ఆడుకుంది. ఇటీవల విడుదలైన అసర్‌ నివేదికను పరిశీలిస్తే.. దేశం మొత్తం ప్రభుత్వ పాఠశాలల్లో చదివే మూడో తరగతి చిన్నారుల్లో రెండోతరగతి పాఠ్యపుస్తకాలనైనా తడబడకుండా చదివే సామర్థ్యం 2022లో 16.3శాతం ఉంటే, 2024నాటికి 23.4 శాతానికి చేరింది. అందుకు భిన్నంగా మన రాష్ట్రంలో మూడో తరగతిలో ఉండి రెండో తరగతి పుస్తకాలు చదవడం వచ్చిన విద్యార్థులు 2018లో 22.6 శాతం ఉంటే.. 2024లో 14.7 శాతానికి తగ్గారు. ఇది జగన్‌రెడ్డి పాలన డొల్లతనం. కేంద్రం విడుదల చేసిన అసర్‌ నివేదిక ఈ విషయాలను స్పష్టం చేసింది’ అన్నారు. ఐదో తరగతి చదువుతూ రెండో తరగతి పుస్తకాలు చదవడం వచ్చిన వాళ్లు 2018లో 57.1 శాతం ఉంటే, 2024లో 37.5 శాతానికి తగ్గారని అసర్‌ నివేదిక వెల్లడిరచిందన్నారు. ప్రతి ఏటా డీఎస్సీ నిర్వహించి ఉపాధ్యాయ పోస్టులు భర్తీ చేస్తానని హామీనిచ్చి వైసీపీ ప్రభుత్వం నిరుద్యోగులను మోసం చేసిందని, ఐదేళ్లలో ఒక్క ఉపాధ్యాయ నియామకం కూడా జరపలేదని దుయ్యబట్టారు. ఉపాధ్యాయులు తనకు సహకరించడం లేదని, సీపీఎస్‌ రద్దు చేయాలని పదేపదే అడగడంతో వారిపై ఉన్న అక్రోశాన్ని వెళ్లగక్కేందుకు జీఓ-117ను జగన్మోహన్‌రెడ్డి అస్త్రంగా వాడాడని దీపక్‌రెడ్డి ఆగ్రహం వ్యక్తం చేశారు. రాష్ట్రవ్యాప్తంగా 4,234 ప్రాథమిక పాఠశాలలను ఉన్నత, ప్రాథమికోన్నత పాఠశాలల్లో విలీనం చేసి టీచర్లను, విద్యార్థులను ఇబ్బంది పెట్టారని గుర్తు చేశారు.
రాష్ట్రంలో ఎంతో చరిత్ర కలిగిన ఎయిడెడ్‌ విద్యా వ్యవస్థను వైసీపీ నాశనం చేసిందని, జగన్‌రెడ్డి ఒక్క నెలకూడా సకాలంలో టీచర్లకు జీతాలు ఇవ్వలేదని దీపక్‌రెడ్డి గుర్తు చేశారు. ‘అధికారంలోకి రాగానే ఇంగ్లీష్‌ మీడియం అన్నాడు. తరువాత సీబీఎస్‌ఈ, తరువాత బైజూస్‌, టోఫెల్‌, ఐబీ….. ఇలా విద్యార్థులతో, ఉపాధ్యాయులతో ఆటలాడుకున్నాడు. రాష్ట్రంలో ఏకోపాధ్యాయ స్కూల్స్‌ లేకుండా చేస్తామని, ప్రతి బడికీ ఇద్దరు ఉపాధ్యాయులను నియమిస్తామని చెప్పి మోసం చేశాడని దుయ్యబట్టారు. నాడు నేడు పనుల పర్యవేక్షణ బాధ్యతలు అప్పగించి ప్రధానోపాధ్యాయులపై ఒత్తిడి తెచ్చాడని, కోడిగుడ్లను గుత్తేదారు సకాలంలో బడికి సరఫరా చేయనిచోట విద్యార్ధులకు గుడ్డుపెట్టలేదని ప్రధానోపాధ్యాయులకు షోకాజ్‌ నోటీసులు ఇచ్చాడంటూ వైసీపీ అనుసరించిన తప్పుడు విధానాలను ఎండగట్టారు. మద్యం షాపుల వద్ద ఉపాధ్యాయులను కాపలా పెట్టి వారిని అవమానపరిచాడంటూ, చంద్రబాబు ఆధ్వర్యంలో కూటమి ప్రభుత్వం 90మంది ఎస్టీ యువతను కొత్తగా ఉపాధ్యాయులుగా నియామకం చేసిందని గుర్తు చేశారు. జూనియర్‌ కాలేజీల్లో 700మంది సిబ్బంది సేవలు పునరుద్ధరించిందని, 476 ప్రభుత్వ జూనియర్‌ కాలేజీలలో 3619 మంది కాంట్రాక్టు లెక్చరర్ల సేవలను పునరుద్ధరించిన విషయాన్ని గుర్తు చేశారు. ప్రభుత్వ మెడికల్‌ కాలేజీల్లో 488 అసిస్టెంట్‌ ప్రొఫెసర్‌ పోస్టులను కూటమి ప్రభుత్వం భర్తీ చేసిందని, ఇంటర్‌ కాలేజీ విద్యార్ధులకూ ఉచిత పుస్తకాలు, బ్యాగులు పథకం పునరుద్ధరించిందన్నారు. ‘ఎన్టీఆర్‌ విద్యోన్నతి పథకం పునరుద్ధరించింది.
ప్రభుత్వ జూనియర్‌ కళాశాలలో ఐఐటీ, నీట్‌కి శిక్షణ ప్రారంభించింది. ‘సాల్ట్‌’ ద్వారా టీచర్స్‌కి శిక్షణనిచ్చి విద్యా వ్యవస్థను మెరుగుపరచిందన్నారు.
ముఖ్యమంత్రి చంద్రబాబు, విద్యా మంత్రి లోకేష్‌లు విద్యారంగంపై ప్రత్యేక దృష్టి పెట్టారని దీపక్‌రెడ్డి వివరించారు. కూటమి ప్రభుత్వం విద్యావ్యవస్థపై రివ్యూ జరుపుతోంది. వచ్చే నేషనల్‌ సర్వేలో ఖచ్చితంగా ఆంధ్ర విద్యారంగంలో ముందంజలో ఉండటం ఖాయమన్న నమ్మకాన్ని వ్యక్తం చేశారు. నిజంగా పనిచేసే తత్వమున్న ప్రభుత్వం కూటమి ప్రభుత్వమని, మాటలు చెప్పి ప్రజల్ని మోసం చేసిన ప్రభుత్వం వైసీపీ ప్రభుత్వమని.. రెండు ప్రభుత్వాల మధ్య తేడా నేడు కనబడుతోందన్నారు. గతంలో బాగా చేశామని చెప్పుకున్న వైసీపీ ప్రభుత్వం పిల్లల భవిష్యత్తుతో ఆడుకుందని, భవిష్యత్తును అగమ్యగోచరంలోకి నెట్టిందని ఆగ్రహం వ్యక్తం చేశారు. విద్యాశాఖలోని నిధులను నాడు నేడు పథకం పేరిట దోచుకున్నారని, వైసీపీ భ్రష్టవిధానాలకు అసర్‌ నివేదిక నిదర్శనమన్నారు. ఐదేళ్లు మాటలతో గడిపేసి.. విద్యా ప్రమాణాలను గత వైసీపీ ప్రభుత్వం దిగజార్చిందన్నారు. విద్యా మంత్రి లోకేష్ ఆధ్వర్యంలో విద్యా వ్యవస్థలో మార్పు కనబడుతోందని, రాబోయే కాలంలో నేషనల్‌ లెవల్‌లో ఒక బెస్ట్‌ స్టేట్‌గా తీర్చిదిద్దేందుకు కృషి జరుగుతోందని దీపక్‌రెడ్డి వివరించారు.
