- కేంద్ర మంత్రి కుమారస్వామి స్పష్టీకరణ
- ప్లాంట్ పరిరక్షణపై సీఎం చంద్రబాబు, మంత్రి లోకేష్ పలుమార్లు మాట్లాడారు
- ప్లాంట్పై ప్రధాని మోదీ ప్రత్యేక శ్రద్ధ
- 2030లోపు 300 మిలియన్ టన్నుల స్టీల్ ఉత్పత్తి లక్ష్యం
విశాఖపట్నం (చైతన్యరథం): విశాఖ స్టీల్ ప్లాంట్ను ప్రైవేటీకరణ చేయబోమని, ప్లాంట్ను పునర్నిర్మిస్తామని కేంద్ర ఉక్కుశాఖ మంత్రి హెచ్డీ కుమారస్వామి స్పష్టం చేశారు. విశాఖ స్టీల్ ప్లాంట్ ప్రతినిధులు, అధికారులు, కార్మిక సంఘాల ప్రతినిధులతో గురువారం వేర్వేరుగా కుమారస్వామి భేటీ అయ్యారు. అనంతరం మరో కేంద్ర మంత్రి భూపతిరాజు శ్రీనివాసవర్మ, రాష్ట్ర మంత్రి సత్యకుమార్ యాదవ్, ఎంపీలు శ్రీభరత్, కలిశెట్టి అప్పలనాయుడు, టీడీపీ రాష్ట్ర అధ్యక్షుడు, ఎమ్మెల్యే పల్లా శ్రీనివాసరావులతో కలిసి కుమారస్వామి మీడియాతో మాట్లాడారు.
విశాఖ ఉక్కుకు ఎంతో ఘనమైన చరిత్ర ఉంది. ఈ పరిశ్రమ కోసం ఎన్నో ఉద్యమాలు జరిగాయి. విశాఖ ఉక్కు పరిశ్రమ సాధనకు జరిగిన ఉద్యమంలో సుమారు 30 మంది మరణించారు. పరిశ్రమ ప్రారంభంలో ఉత్పత్తి బాగా ఉండేది. 2013-14 వరకు ఉక్కు పరిశ్రమ పనితీరు బాగానే ఉంది. 2014లో నవరత్న హోదా కూడా సాధించింది. ఉక్కు ఉత్పత్తి పెంచాలని నిర్ణయించినప్పటి నుంచి నష్టాల్లోకి వెళ్లింది. కేంద్ర మంత్రి అయ్యాక స్టీల్ప్లాంట్పై ఎన్నో సమీక్షలు చేశా. ఉక్కు ఉత్పత్తిలో చైనా మొదటి స్థానంలో ఉండగా.. రెండో స్థానంలో భారతదేశం ఉంది. ఉక్కు ఉత్పత్తిలో మనదేశం అగ్రస్థానంలోకి రావాలని ప్రధానమంత్రి నరేంద్రమోదీ లక్ష్యంగా పెట్టుకున్నారు. ప్రస్తుతం విశాఖ స్టీల్ప్లాంట్కు రూ.35వేల కోట్ల అప్పు ఉంది. 2030లోపు 300 మిలియన్ టన్నుల స్టీల్ ఉత్పత్తి సాధించాలని ప్రధాని మోదీ లక్ష్యం నిర్దేశించారు. విశాఖ స్టీల్ప్లాంట్పై ప్రధాని ప్రత్యేక శ్రద్ధ చూపిస్తున్నారు. స్టీల్ప్లాంట్ను విజయవంతంగా నడిపించేందుకు ఆర్థిక ప్యాకేజీ ప్రకటించాం. ప్యాకేజీని సమర్ధంగా వినియోగించేలా రోడ్ మ్యాప్పై కసరత్తు చేస్తున్నాం. స్టీల్ ప్లాంట్ను మళ్లీ నెంబర్ వన్ చేయడంలో ఖచ్చితంగా సక్సెస్ అవుతాం. కార్మికుల సమస్యలను 3 నెలల్లో కొలిక్కి తెస్తాం. కార్మికుల ప్రయోజనాలకు ఎలాంటి భంగం కలిగించబోం. ఈ ఏడాదిలో పూర్తిస్థాయిలో ఉక్కు ఉత్పత్తి సాధన లక్ష్యంగా పెట్టుకున్నాం. సెయిల్లో విలీనం కంటే ముందు విశాఖ ప్లాంట్ పరిరక్షణకు ప్రాధాన్యం ఇస్తున్నామని మంత్రి కుమారస్వామి పేర్కొన్నారు.
సీఎం చంద్రబాబు, మంత్రి లోకేష్లపై ప్రశంసలు
సీఎం చంద్రబాబు, మంత్రి లోకేష్లపై కేంద్రమంత్రి కుమారస్వామి ప్రశంసల వర్షం కురిపించారు. ఆంధ్ర డైనమిక్ సీఎం చంద్రబాబు, యంగ్ లీడర్ లోకేష్ అని అభివర్ణించారు. సీఎం చంద్రబాబు, మంత్రి లోకేష్ కలిసి విశాఖ ప్లాంట్ పరిరక్షణ కోసం తీవ్రంగా ప్రయత్నించారన్నారు. ఎన్నో సార్లు స్టీల్ ప్లాంట్ విషయంపై తనతో వారు చర్చించారని చెప్పారు. ప్లాంట్ను ఎలా పరిరక్షించాలనే అంశంపై పలుమార్లు తనతో మాట్లాడారని గుర్తుచేశారు. స్టీల్ ప్లాంట్ ప్రైవేటుపరం కాకుండా చూడాలని, చంద్రబాబు ఇచ్చిన మాట ప్రకారం పునరుజ్జీవ ప్యాకేజీ ప్రకటించాలని, మంత్రి నారా లోకేష్ చాలా సార్లు తనను కోరారని తెలిపారు. చివరకు ప్రధానమంత్రి నరేంద్ర మోదీ అందరి విజ్ఞప్తి మేరకు ప్యాకేజీకి అంగీకరించారని కేంద్రమంత్రి కుమారస్వామి తెలిపారు.
ప్యాకేజీని సద్వినియోగం చేసుకోవాలి: కేంద్ర మంత్రి శ్రీనివాసవర్మ
కేంద్ర ప్రభుత్వం రూ.11,440 కోట్ల ప్యాకేజీ ప్రకటించటంతో విశాఖ స్టీల్ ప్లాంట్ను సమర్థవంతంగా నడపడంపై అన్ని వర్గాలతో సమావేశమయ్యామని కేంద్ర ఉక్కు శాఖ సహాయ మంత్రి భూపతిరాజు శ్రీనివాస వర్మ తెలిపారు. సమష్టి కృషితో ప్లాంట్ ప్రైవేటీకరణ కాకుండా అపామని చెప్పారు. ప్యాకేజీని సద్వినియోగం చేసుకొని ప్లాంట్ను నడుపుకోవాలని సూచించారు. సీఎం చంద్రబాబు ఢల్లీి వచ్చినపుడు కేంద్ర ఆర్థిక మంత్రి నిర్మల సీతారామన్తో సమావేశమై చర్చించారని అన్నారు. కార్మికులకు భరోసా ఇచ్చేందుకు ప్యాకేజీ దోహదం చేస్తుందని శ్రీనివాస వర్మ పేర్కొన్నారు.
