- పెద్దిరెడ్డి అరాచక సామ్రాజ్యంగా పుంగనూరు
- ప్రతిపక్ష ప్రచార వాహనాల ధ్వంసం, కార్యకర్తలపై దాడులు నిత్యకృత్యం
- అక్కడి డీఎస్పీ రాజగోపాల్‌రెడ్డి పోలీసు అధికారిగా అనర్హుడు
- టీడీపీ ఓటర్లను బెదిరిస్తున్న అర్మ్‌డ్‌ రిజర్వ్‌ డీఎస్పీ సుధాకర్‌
- టీడీపీపై కక్ష కట్టినట్లుగా వ్యవహరిస్తున్న చిత్తూరు ఆర్వో అరుణ
- ఇండిపెండెంట్లకు గాజుగ్లాసు గుర్తు కేటాయించకుండా రిజర్వ్‌ చేయాలి
- సీఈఓకు టీడీపీ నేత వర్ల రామయ్య ఫిర్యాదు
అమరావతి(చైతన్యరథం): రాష్ట్రంలో, ముఖ్యంగా పుంగనూరు నియోజకవర్గంలో శాంతిభద్రతలు దారుణంగా దిగజారిపోయాయని, ప్రతిపక్షాలపై దాడులు, అరాచకాలు జరుగుతున్నా పోలీసు యంత్రాంగం మాత్రం చోద్యం చూస్తోందని రాష్ట్ర ఎన్నికల ప్రధాన అధికారి (సీఈఓ) ముకేష్‌కుమార్‌ మీనాకు తెలుగుదేశం పార్టీ జాతీయ ప్రధాన కార్యదర్శి వర్ల రామయ్య ఫిర్యాదు చేశారు. అధికార పార్టీకి తొత్తుల్లా వ్యవహరిస్తున్న చిత్తూరు అసిస్టెంట్‌ రిటర్నింగ్‌ అధికారిణి అరుణ, రాజ్‌భవన్‌ అర్మ్‌డ్‌ రిజర్వ్‌ డీఎస్పీలపై కూడా ఎన్నికల సంఘానికి ఫిర్యాదు చేశారు. గాజు గ్లాసు గుర్తును ఎవరికి కేటాయించకుండా రిజర్వ్‌ చేయాలని సీఈఓను వర్ల రామయ్య కోరారు. అనంతరం నిర్వహించిన విలేకరుల సమావేశంలో వర్ల రామయ్య మాట్లాడుతూ…రాష్ట్రంలో ప్రస్తుతం నెలకొన్న పరిస్థితులను ఎన్నికల కమిషన్‌కు వివరించామన్నారు. ముఖ్యంగా శాంతిభద్రతలు నశించిపోయిన పుంగనూరు నియోజకవర్గ పరిస్థితులను రాష్ట్ర ఎన్నికల ప్రధాన అధికారికి తెలియపరిచాం. పరిస్థితులు కాస్త అటూ ఇటూ అయితే ముఖ్యమంత్రి అవుదామని పెద్దిరెడ్డి రామచంద్రారెడ్డి ఉబలాటపడుతున్నాడు. పుంగనూరును ప్రత్యేక సామ్రాజ్యంగా చేసుకున్నాడు. పుంగనూరు నియోజకవర్గానికి డీజీపీ, సీఎస్‌లకు సంబంధమే లేనట్లుగా ఉంది. కానిస్టేబుల్‌ దగ్గర నుంచి డీఎస్పీ వరకు అక్కడున్న అధికారులందరూ పెద్దిరెడ్డి మనుషులే. పెద్దిరెడ్డి ఏమి చెబితే వారు అదే చేస్తారు. శాంతిభద్రతలన్నీ కూడా పెద్ద్దిరెడ్డి ఆధీనంలోనే ఉన్నాయని మండిపడ్డారు.
పుంగనూరు డీఎస్పీని తొలగించాలి
పుంగనూరులో టీడీపీ, ప్రతిపక్ష ప్రచార రథాలు తిరగడానికి వీళ్లేదన్నట్లు పెద్దిరెడ్డి, అతని అనుచరులు వ్యవహరిస్తున్నారు. ప్రచార రథాలు తగలబెడుతున్నా, నాయకులు, కార్యకర్తలపై దాడులు చేస్తున్నా పోలీసులు మాత్రం చోద్యం చూస్తున్నారు. ఎన్నికల ప్రచారం చేస్తున్న బీసీవై పార్టీ అధినేత రామచంద్రయాదవ్‌పై దాడులు చేస్తే పోలీసులు మాత్రం తమాషా చూస్తున్నట్లు వ్యవహరించారు. ప్రాణాలు అరచేతిలో పెట్టుకొని బీసీవై పార్టీ నాయకులు పారిపోయారు. ఇన్ని ఘోరాలు, అరాచకాలు జరుగుతుంటే ఎన్నికల కమిషన్‌, డీజీపీ, ఎస్పీ ఏమి చేస్తున్నారు? ఎన్నికల సజావుగా నిర్వహించాలనే ఆలోచన ఎన్నికల కమిషన్‌కు ఉంటే కానిస్టేబుల్‌ నుంచి డీఎస్పీ వరకు అందరినీ తీసేసి కేంద్రబలగాలను పెట్టాలి. రాష్ట్ర పోలీసు విభాగానికి సంబంధించిన అధికారులెవ్వరూ పుంగనూరు నియోజకవర్గంలో ఉండకూడదు. ఎన్నికలు అయ్యేంతవరకు కూడా వారిని వీఆర్‌లో పెట్టాలి. లేదంటే ఉత్తరాంధ్ర నుంచి పోలీసులను పుంగనూరుకు తీసుకువచ్చి ఈ 15 రోజులు బాధ్యతలు నిర్వర్తించేలా ఆదేశాలు ఇవ్వాలి. నాలుగు వాహనాలు ధ్వంసం చేస్తే పుంగనూరులో ఏమీ జరగలేదు, ఏదో రెండు రాళ్లు వేశారు అని వీడియో చూపిస్తూ అక్కడి డీఎస్పీ రాజగోపాల్‌ రెడ్డి చెప్పడం హాస్యాస్పదం. డీఎస్పీ ప్రదర్శించిన వీడియో కూడా ఎమ్మెల్యే ఫోన్‌ నుంచే మీడియాకు వెళ్ళింది. పెద్దిరెడ్డి ఏమి చెబితే అది చేయడానికే డీఎస్పీ ఉన్నాడు. ఇటువంటి డీఎస్పీ విధుల్లో ఉంటే పోలీసు వ్యవస్థకే సిగ్గు చేటు. కాబట్టి డీఎస్పీ రాజగోపాల్‌ రెడ్డిని సస్పెండ్‌ చేయాలని వర్ల డిమాండ్‌ చేశారు.
బెదిరిస్తున్న డీఎస్పీ
రాజ్‌ భవన్‌లో విధులు నిర్వహిస్తున్న ఆర్మ్‌డ్‌ రిజర్వుడ్‌ డీఎస్పీ సుధాకర్‌, అతని తమ్ముడు పొన్నూరులో అరాచకాలు చేస్తున్నాడు. తెలుగుదేశం పార్టీకి ఓటు వేస్తే మా అన్న అధికారాన్ని ఉపయోగించుకొని మీ అంతు చూస్తానంటూ డీఎస్పీ తమ్ముడు పొన్నూరులో ఓటర్లను భయభ్రాంతులకు గురిచేస్తున్నాడు. నా అధికారాన్ని ఉపయోగించి అక్రమ కేసులు బనాయిస్తానని డీఎస్పీ బెదిరిస్తున్నాడు. ఈ విషయాన్ని కూడా ఎన్నికల కమిషన్‌ దృష్టికి తీసుకువెళ్లి, ఆయనపై చర్యలు తీసుకోవాలని కోరాం.
రాజకీయాల్లోకి రాకమునుపు నుంచి చిత్తూరు నియోజకవర్గ ఎన్డీఏ అభ్యర్ధి గురజాల జగన్మోహన్‌ ఎన్నో సేవా కార్యక్రమాలు చేస్తున్నారు. అయితే సేవా కార్యక్రమాలు చేయకూడదంటూ చిత్తూరు అసిస్టెంట్‌ రిటర్నింగ్‌ అధికారి అరుణ అడ్డు పడటంతో జగన్మోహన్‌ హైకోర్టుకు వెళ్ళారు. ప్రజాసేవ చేస్తుంటే తప్పేముందని అరుణను హైకోర్టు చివాట్లు పెట్టింది. ఆ విషయాన్ని మనస్సులో పెట్టుకొని నియోజకవర్గంలో టీడీపీ జెండానే కనపడకుండా ఉండేలా అరుణ వ్యవహరిస్తున్నారు. ఇటువంటి అధికారులు ఎన్నికల విధుల్లో ఉంటే ఎన్నికలు సజావుగా సాగవు. కనుక ఏకపక్షంగా వ్యవహరిస్తున్న అసిస్టెంట్‌ రిటర్నింగ్‌ అధికారి అరుణను ఎన్నికల విధులకు దూరంగా పెట్టాలని వర్ల అన్నారు.
గాజుగ్లాసు గుర్తును రిజర్వ్‌ చేయాలి
ఎన్డీఏ కూటమిలోని జనసేన పార్టీ ఎక్కడ పోటీ చేస్తే అక్కడ గాజుగ్లాసు గుర్తు కేటాయించాలని హైకోర్టు ఆదేశాలిచ్చిన విషయం తెలిసిందే. జనసేన పోటీ చేయని స్థానాల్లో కొంతమంది ఆర్వోలు పిలిచి మరీ గాజుగ్లాసు గుర్తును ఇండిపెండెంట్‌ అభ్యర్థులకు కేటాయిస్తున్నారు. దుర్మార్గపు బుద్ధులతో అడ్డదారులు తొక్కైనా అధికారం నిలబెట్టుకోవాలని ప్రయత్నిస్తున్న జగన్‌ రెడ్డి.. ఇండిపెండెంట్లకు గాజుగ్లాసు గుర్తు ఇప్పించేలా కుట్ర పన్నారు. ఆ కుట్రలో కొంతమంది ఆర్వోలు కూడా భాగస్వాములయ్యారు. గాజుగ్లాసును ఎవ్వరికీ కేటాయించవద్దని, గాజుగ్లాసు గుర్తును రిజర్వ్‌లో పెట్టాలని సీఈఓను కోరాం. నిజంగా జగన్‌ రెడ్డికి దమ్ముంటే శాంతియుత వాతావరణంలో ఎన్నికలు జరిగేలా చూడాలి. గెలుస్తామనే నమ్మకం ఉంటే గాజుగ్లాసు గుర్తుకు ఇంతలా భయపడాలా? ప్రజాక్షేత్రంలో ఎన్డీఏతో తలపడే ధైర్యం లేకనే జగన్‌రెడ్డి కుట్రలు పన్నుతున్నాడు. నుదిటికి దొంగ ప్లాస్టర్లు వేసుకొని గులకరాయి డ్రామా ఆడినంత మాత్రాన ప్రజలు జగన్‌ రెడ్డి మాయలో పడలేదు. ఎన్డీఏ కూటమిని ప్రజలు కోరుకుంటున్నారు. ఇకనైనా వైసీపీ నాయకులు మాయమాటలు చెబుతూ దొడ్డి దారులు తొక్కడం మానాలని వర్ల రామయ్య హెచ్చరించారు.
ఎన్నికల కమిషన్‌ను కలిసిన వారిలో వర్ల రామయ్యతో పాటు మాజీ ఎమ్మెల్సీ ఏఎస్‌ రామకృష్ణ, తెదెపా ఎస్సీ సెల్‌ రాష్ట్ర ఉపాధ్యక్షుడు కోడూరి అఖిల్‌, గుంటూరు మిర్చి యార్డ్‌ మాజీ చైర్మన్‌ మన్నవ సుబ్బారావు, తదితరులు ఉన్నారు.
