- ప్రపంచస్థాయి ప్రమాణాలతో ఏర్పాటుకు కసరత్తు
- ఎకో సిస్టమ్‌, విధివిధానాలపై అధ్యయనం చేయండి
- వర్సిటీల ర్యాంకింగ్స్‌ మెరుగుదలకు చర్యలు
- అకడమిక్‌ ఎక్సెలెన్స్‌, ఫ్యాకల్టీ డెవలప్‌మెంట్‌పై దృష్టి
- ఉన్నత విద్యాశాఖ అధికారులకు మంత్రి లోకేష్‌ ఆదేశం
అమరావతి (చైతన్య రథం): ఏపీని ఆర్టిఫిషియల్‌ ఇంటిలిజెన్స్‌ హబ్‌గా తీర్చిదిద్దాలన్నది ప్రభుత్వ ధ్యేయమని, ఇందులో భాగంగా ప్రతిష్టాత్మక గ్లోబల్‌ యూనివర్సిటీని ఏర్పాటు చేస్తామని రాష్ట్ర విద్య, ఐటీ, ఎలక్ట్రానిక్స్‌ శాఖల మంత్రి నారా లోకేష్‌ ప్రకటించారు. రాష్ట్రంలో హయ్యర్‌ ఎడ్యుకేషన్‌ విభాగం పనితీరు, ర్యాంకింగ్‌ మెరుగుదల, ఇంటిగ్రేటెడ్‌ యూనివర్సిటీ మేనేజ్‌మెంట్‌ సిస్టమ్‌ ఏర్పాటు తదితర అంశాలపై బుధవారం అధికారులతో మంత్రి లోకేష్‌ సమీక్షించారు. ఈ సందర్భంగా మాట్లాడుతూ ఏఐ వర్సిటీని రాష్ట్రంలో ఎక్కడ ఏర్పాటు చేయాలి, ఎకోసిస్టమ్‌, ఇతర అంశాలపై అధ్యయనం చేయాల్సిందిగా అధికారులను ఆదేశించారు. ఏఐ వర్సిటీ ద్వారా ఎడ్యుకేషన్‌, హెల్త్‌ కేర్‌, గవర్నెన్స్‌ తదితర 16 రంగాల్లో సమర్థవంతమైన సేవలు అందించే ఆస్కారం ఉంటుందన్నారు.
విద్యారంగానికి సంబంధించి అధునాతన ఏఐ టెక్నాలజీ ద్వారా కేజీ నుంచి పీజీ వరకు విద్యార్థులకు స్టూడెంట్‌ పాస్‌పోర్టు ఇచ్చేలా ఫ్రేమ్‌వర్క్‌ రూపొందించాలని సూచించారు. దీనిద్వారా విద్యార్థుల అటెండెన్స్‌తోపాటు వారి తెలివితేటలను అంచనా వేసి, మెరుగుపర్చడానికి ఆస్కారమేర్పడుతుందని అన్నారు. ఇప్పటికే విద్యా సంవత్సరం మొదలైన నేపథ్యంలో, వచ్చే ఏడాదినుంచి యూనివర్సిటీలు, డిగ్రీ కళాశాలల్లో అకడమిక్‌ క్యాలెండర్‌ పక్కాగా అమలు చేయాలని ఆదేశించారు. పర్ఫార్మెన్స్‌ ఇండికేటర్స్‌ సమీక్షిస్తూ మెరుగైన ఫలితాల సాధనకు రూట్‌మ్యాప్‌ సిద్ధం చేయాల్సిందిగా సూచించారు. రాష్ట్రంలో ఫీజుల నియంత్రణకు ఏర్పాటైన హయ్యర్‌ ఎడ్యుకేషన్‌ రెగ్యులేటర్‌ మానిటరింగ్‌ కమిషన్‌ చేపడుతున్న చర్యలపై చర్చించారు.
అకడమిక్‌ ఎక్సెలెన్స్‌, ఫ్యాకల్టీ డెవలప్‌మెంట్‌పై దృష్టిసారించి, ర్యాంకింగ్‌ మెరుగుదలకు పకడ్బందీ చర్యలు చేపట్టాలన్నారు. ర్యాంకింగ్స్‌ విషయంలో ఆంధ్రా యూనివర్సిటీ, వెంకటేశ్వర యూనివర్సిటీ, జేఎన్‌టీయు (కాకినాడ) మాత్రమే సంతృప్తికర పనితీరు కనబరుస్తున్నాయని అన్నారు. పీజీ విద్యార్థులకు ఫీజు రీయింబర్స్‌మెంట్‌ బకాయిలపై సమగ్ర నివేదిక ఇవ్వాలని కోరారు. యూనివర్సిటీల్లో పరిశోధనలు పెరగాల్సి ఉందని, పరిశ్రమ అనుసంధానిత ఇంటర్న్‌షిప్‌, అప్రెంటీస్‌షిప్‌లు విద్యార్థులకు ఉద్యోగ, ఉపాధి అవకాశాలు కల్పించే విధంగా తీర్చిదిద్దాలన్నారు. విద్యార్థులు కులధృవీకరణ పత్రాల విషయంలో తీవ్ర ఇబ్బందులు ఎదుర్కొంటున్నారని, త్వరలో ఆ సమస్యకు శాశ్వత పరిష్కారం చూపుతామని మంత్రి లోకేష్‌ హామీ ఇచ్చారు. యూనివర్సిటీల్లో విసీల నియామక ప్రక్రియ మొదలుపెట్టాలని
అధికారులను మంత్రి ఆదేశించారు.
ఆర్జెయూకెటిలను రాజకీయాలకు అతీతంగా విద్యారంగ నిపుణులతో మెరుగ్గా తీర్చిదిద్దుతామన్నారు. సమర్థవంతమైన నిర్వహణ కోసం నిపుణులతో ఎక్స్‌పర్ట్‌ కమిటీ నియామకం, ఇంటిగ్రేటెడ్‌ యూనివర్సిటీ మేనేజ్‌మెంట్‌ సిస్టమ్‌ ఏర్పాటు ద్వారా సమీకృత సేవలు అందించడం, అప్రెంటీస్‌ ఎంబడెడ్‌ డిగ్రీ ప్రోగ్రామ్‌ పనితీరు తదితర అంశాలపై మంత్రి లోకేష్‌ సమీక్షించారు. సమావేశంలో ఉన్నతవిద్య కార్యదర్శి సౌరబ్‌గౌర్‌, హయ్యర్‌ ఎడ్యుకేషన్‌ ఇన్‌చార్జి చైర్మన్‌ రామ్మోహన్‌ రావు, కాలేజ్‌ ఎడ్యుకేషన్‌ కమిషనర్‌ పోలా భాస్కర్‌, స్కిల్‌ డెవలప్‌మెంట్‌ వీసీ అండ్‌ ఎండి గణేష్‌కుమార్‌ పాల్గొన్నారు.
