.దేవినేని ఉమా సమక్షంలో టీడీపీలో చేరిన పలువురు వైసీపీ కార్యకర్తలు
మైలవరం: మైలవరం నియోజకవర్గంలో వైసీపీకి గట్టి షాక్ తగిలింది. మాజీ మంత్రి దేవినేని ఉమామహేశ్వరరావు ఆధ్వర్యంలో జూపూడి మాజీ వైస్ సర్పంచ్తో సహా పలువురు టీడీపీలో చేరారు. వారికి టీడీపీ కుండువా కప్పి పార్టీలోకి ఆహ్వానించారు. గడిచిన ప్రభుత్వానికి, ప్రస్తుత ప్రభుత్వానికి బేరీజీ వేసుకుని చూస్తే నక్కకు నాగలోకానికి ఉన్నంత తేడా ఉందని, తెలుగుదేశంపార్టీ బతికితేనే మనకు మనుగడ ఉంటుందని నమ్మి తెలుగుదేశంపార్టీలో చేరినట్లు జూపూడి వైసీపీ మాజీ ఉప సర్పంచ్ నీలం సురేష్ అభిప్రాయపడ్డారు. ఈ సందర్భంగా దేవినేని ఉమామహేశ్వరరావు మాట్లాడుతూ… గడిచిన మూడున్నరేళ్లలో రాష్ట్రంలో ఒక్క అభివృద్ధి కార్యక్రమం కూడా జరగలేదని, తన అవగాహన రాహిత్యంతో ప్రతి శాఖ, ప్రతి సంస్థను అప్పుల కుప్పగా మార్చేశారని అన్నారు. తన అవకతవకల నుంచి జనాల దృష్టి మళ్లించేందుకు ‘బటన్ నొక్కుడు’ పేరిట సంక్షేమ పథకాలను ఇప్పుడే కొత్తగా అమలు చేస్తున్నట్లు జగన్ కథలు చెబుతున్నారని అన్నారు. జగన్రెడ్డి అనాలోచిన నిర్ణయాలతో అమరావతిని నాశనం చేశాడని, ఫలితంగా చదువుకున్న యువత పక్క రాష్ట్రాలకు తరలిపోవాల్సి వచ్చిందన్నారు. చంద్రబాబు దూరదృష్టితో ఆనాడు అమరావతి ప్రాంతాన్ని రూపొందించారని, కానీ నేడు అమరావతి అభివృద్ధి పూర్తిగా ఆగిపోయిందన్నారు. వైసీపీ పాలనలో రాష్ట్రంలోని అన్ని వర్గాల వారు అనేక ఇబ్బందులు పడుతున్నారని, ఏ ఒక్కరూ సంతోషంగా లేరన్నారు. చిత్ర, విచిత్రమైన పన్నులతో ప్రజల నడ్డి విరుస్తున్న జగన్కు ప్రజలే తగిన గుణపాఠం చెప్పాలన్నారు. గోదావరి వరద బాధితుల్ని ఆదుకోవడంలో ప్రభుత్వం పూర్తిగా విఫలమైందని, కనీసం పాల ప్యాకెట్ గానీ, కేజీ బియ్యం గానీ ఇచ్చిన దాఖలాలు లేవన్నారు. రాష్ట్రం తిరిగి అభివృద్ధి చెందాలంటే అది టీడీపీతోనే సాధ్యమని, వచ్చే ఎన్నికల్లో పార్టీని గెలిపించాలని దేవినేని ఉమామహేశ్వరరావు కోరారు. ఈ కార్యక్రమంలో పలువురు టీడీపీ నేతలు, కార్యకర్తలు పాల్గొన్నారు.
