నేటి నుంచి మూడు రోజులు కుప్పంలో చంద్రబాబు పర్యటన

టీడీపీ అధినేత నారా చంద్రబాబునాయుడు గురువారం నుంచి మూడు రోజులపాటు సొంత కుప్పం నియోజకవర్గంలో పర్యటించనున్నారు. గురువారం (28వ తేదీ) ఉదయం 9.30 గంటలకు హైదరాబాద్‌ బేగంపేట విమానాశ్రయం నుండి బయలుదేరి 10.40 గంటలకు బెంగళూరు లోని హెచ్‌ఏఎల్‌ విమానాశ్రయానికి చేరుకుంటారు. ఆక్కడ నుండి రోడ్డు మార్గంలో 12.20 గంటలకు హోస్‌కోటే రోడ్డులోని వైట్‌ఫీల్డ్స్‌, కాటమనాలూరులోని కేఎంఎం రాయల్‌ కన్వెన్షన్‌ సెంటర్‌కు చేరుకుని బెంగళూరు టీడీపీ ఫోరమ్‌ సమావేశంలో పాల్గొంటారు. ఈ సమావేశం అనంతరం రోడ్డు మార్గంలో కుప్పం నియోజకవర్గంలోని గుడుపల్లి బస్టాండ్‌ సెంటర్‌కు మధ్యాహ్నం 3.45కు చేరుకుంటారు. అక్కడ బహిరంగ సభలో పాల్గొని సాయంత్రం 5.30కి కుప్పంలోని టీడీపీ ఆఫీసుకు వెళతారు. స్థానిక పార్టీ నాయకులతో సమావేశం అనంతరం రాత్రి 7.30 గంటలకు పీ మనోహర్‌ నివాసానికి వెళ్లి, అక్కడనుండి 8.10 గంటలకు కుప్పం ఆర్‌ అండ్‌ బీ గెస్ట్‌హౌస్‌కు వెళ్లి విశ్రాంతి తీసుకుంటారు.

శుక్రవారం (29వ తేదీ) ఉదయం 11.30 గంటలకు బయలుదేరి 12.00 గంటలకు శాంతిపురం ఎన్టీఆర్‌ సర్కిల్‌లో జరిగే బహిరంగసభలో పాల్గొంటారు. మధ్యాహ్నం 2.30 గంటలకు శాంతిపురం లక్ష్మీ ధియోటర్‌లో జరిగే కార్యక్రమంలో పాల్గొంటారు. ఈ సందర్భంగా ఇతర పార్టీల నుంచి పలువురు టీడీపీలో చేరతారు. అనంతరం 3.00 గంటలకు రామకుప్పం పోలీసుస్టేషన్‌ సెంటర్‌లో జరిగే బహిరంగసభలో పాల్గొంటారు. అక్కడనుండి 5.00 గంటలకు కుప్పంలోని ఎంఎం ఫంక్షన్‌హాలుకు చేరుకుని, జనసేన నాయకులతో సమావేశమవుతారు. అనంతరం 6.00 గంటలకు కుప్పంలోని బీసీఎన్‌ గ్రాండ్‌ హోటల్‌లో టీడీపీ నాయకులతో సమావేశమై, రాత్రి 8.15 గంటలకు కుప్పం ఆర్‌ అండ్‌ బీ గెస్ట్‌ హౌస్‌కు చేరుకుంటారు.

శనివారం (30వ తేదీ) మధ్యాహ్నం 12.20 గంటలకు కుప్పం పీఈఎస్‌ మెడికల్‌ కళాశాల సమీపంలోని కురుబ భవన్‌కు చేరుకుని శ్రీకనకదాస విగ్రహాన్ని ఆవిష్కరించి, సభలో పాల్గొంటారు. 2.35 గంటలకు కుప్పంలోని అన్న క్యాంటీన్‌ను సందర్శిస్తారు. తరువాత కుప్పంలోని పెద్దపులి గంగమ్మ గుడిలో అమ్మవారిని దర్శించుకుంటారు. కొద్దిసేపు బాబు ష్యూరిటీ`భవిష్యత్‌కు గ్యారెంటీ కార్యక్రమంలో పాల్గొని, 3.30 గంటలకు కుప్పం మసీదును సందర్శిస్తారు. అక్కడ ప్రార్థనలు, మైనారిటీ నేతలతో సమావేశం అనంతరం సాయంత్రం 4.30 గంటలకు కుప్పంలోని మల్లనూర్‌ బస్టాండ్‌ సెంటర్‌కు చేరుకుని బహిరంగసభలో పాల్గొంటారు. 5.40 గంటలకు అక్కడ నుండి రోడ్డు మార్గంలో బయలుదేరి రాత్రి 8.00 గంటలకు బెంగళూరు హెచ్‌ఏఎల్‌ విమానాశ్రయానికి చేరుకుని, 9.15 గంటలకు బేగంపేట విమానాశ్రయానికి చేరుకుని, 9.35 గంటలకు జూబ్లీహిల్స్‌లోని నివాసానికి చేరుకుంటారు.