ధర్మానిదే విజయం..పొత్తుదే గెలుపు..కూటమిదే పీఠం

• పొత్తుకు దుర్గమ్మ ఆశీస్సులు
• మోదీ పాంచజన్యం పూరిస్తారు
• చిటికెన వేలంత జగన్‌రెడ్డిని తరిమేస్తారు
• జగన్‌ పాలన మొత్తం అవినీతి, అరాచకం, దోపిడీలే
• శాంతిభద్రతలు, పారిశ్రామిక ప్రగతి శూన్యం
• బొప్పూడి ప్రజాగళం సభలో పవన్‌ కళ్యాణ్‌

చిలకలూరిపేట(చైతన్యరథం): రాబోయే ఎన్నికల్లో పొత్తుదే గెలుపు, ధర్మానిదే విజయం కూటమిదే అధి కారం అని జనసేన అధినేత పవన్‌ కళ్యాణ్‌ ఉద్ఘాటిం చారు. చిలకలూరిపేట సమీపంలోని బొప్పూడి వద్ద ఆదివారం టీడీపీ`జనసేన`బీజేపీ కూటమి ఉమ్మడిగా నిర్వహించిన ప్రజాగళం సభలో పవన్‌ మాట్లాడుతూ పితృదేవతల ముక్తి కోసం పరితపిస్తూ వారి వారసులు హిమాలయ పర్వత శ్రేణుల్లో ఉన్న గంగోత్రి కోసం ఎలా ఎదురుచూస్తున్నారో ప్రధానమంత్రి నరేంద్రమోదీ రాక కోసం రాష్ట్రం ఎదురుచూసిందన్నారు. అభివృద్ధి లేమి, అప్పులతో ఆంధ్ర ప్రజానీకం కుంగిపోతోంది. అవినీతి, దాష్టీకం, దోపిడీలతో ఆంధ్ర ప్రజానీకం నలిగి పోతోంది. అప్రజాస్వామిక విధానాలతో కొట్టుమిట్టాడు తున్న ఆంధ్ర ప్రజానీకానికి ప్రధానమంత్రి నరేంద్ర మోదీ రాక గంగమ్మ తల్లి హిమాలయాల నుంచి భూమి మీదకు వచ్చి సేదతీర్చినట్లుగా ఉంది. మన ప్రియతమ ప్రధానమంత్రి నరేంద్ర మోదీ రాక, ఈ ఎన్డీఏ పునర్‌ కలయిక 5 కోట్ల మంది ప్రజలకు ఎంతో ఆనందాన్ని ఇచ్చిందని పవన్‌ అన్నారు.

దుర్గమ్మ ఆశీస్సులతో ఘనవిజయం సాధిస్తాం
దేశ ప్రజల ఆశీస్సులతో మోదీ ముచ్చటగా మూడో సారి ప్రధానమంత్రి కాబోతున్నారు. హ్యాట్రిక్‌ కొట్ట బోతున్న నరేంద్రమోదీకి ఆంధ్ర రాష్ట్ర ప్రజల తరపు నుంచి, ఎన్డీఏ కూటమిలో భాగస్వాములైన మూడు పార్టీలు టీడీపీ-జనసేన-బీజేపీ తరపున అభినందన లు. 2014లో తిరుపతి బాలాజీ, వేంకటేశ్వరస్వామి సాక్షిగా ఈ పొత్తు మొదలైంది. ఈ రోజు ఇక్కడ 2024లో బెజవాడ కనకదుర్గమ్మ సాక్షిగా ఈ పొత్తు వేరే రూపం తీసుకోబోతోంది. ఆ దుర్గమ్మ తల్లి పొత్తును స్వయంగా ఆశీర్వదిస్తోంది. ఆంధ్రుల రాజధాని అమ రావతి దేదీప్యమానంగా వెలగాలని, దానికి నేను అండగా ఉన్నానని మోదీ ఇక్కడకు వచ్చారు. మన కష్టాలకు భుజం కాయడానికి ఐదు కోట్ల మంది ప్రజల కోసం నేనున్నానని వచ్చిన మోదీకి మరొక్కసారి ఘన స్వాగతం పలుకుదాం. 2014లో తిరుపతి బాలాజీ ఆశీస్సులతో ఎన్డీఏ విజయాన్ని సాధించి, ప్రభుత్వాన్ని స్థాపించింది. 2024లో దుర్గమ్మ ఆశీస్సులతో మొదలు పెట్టాం, గతానికి ఘన విజయం సాధించబోతున్నాం. ఎన్డీఏ ప్రభుత్వాన్ని స్థాపిస్తున్నాం. బిడ్డలకు అండగా ఉండే దుర్గమ్మ తల్లి మనకు ఒక్క ముద్ద ఎక్కువగానే పెడుతుంది. ఆ తల్లి ఆశీస్సులతో ప్రభుత్వాన్ని స్థాపి స్తామని పవన్‌ అన్నారు.

నిత్యం అవినీతి జపం
మోదీ దేశాన్ని డిజిటల్‌ భారత్‌గా చేస్తే.. ఇక్కడున్న వైసీపీ ప్రభుత్వం మాత్రం అవినీతి జపం చేస్తోంది. దేశంలో అవినీతి తగ్గించేందుకు మోదీ చర్యలు చేప డితే, ఏపీలో మాత్రం బ్లాక్‌మనీకి గేట్లు తెరిచారు. సంపూర్ణ మద్యపాన నిషేధం చేస్తానని అధికారంలోకి వచ్చిన వ్యక్తి నేడు సారా వ్యాపారిగా మారిపోయారు. ఐదేళ్లలో రూ.1,13,580 కోట్ల మద్యం విక్రయాలు జరిగితే, అధికారికంగా మాత్రం రూ. 84,050 కోట్లు మాత్రమే చూపిస్తున్నారు. 10వేల కోట్ల జీఎస్టీ ఎగవేసి అవినీతికి పాల్పడ్డారు. అలాగే బినామీ కంపెనీ జేపీ వెంచర్స్‌ పేరు మీద ఐదేళ్లలో ఇసుక ద్వారా రూ.40 వేల కోట్లు దోచుకున్నారు. ఈ అవినీతిని ప్రశ్నించిన వారిని నిర్దాక్షిణ్యంగా చంపేస్తున్నారని పవన్‌ ధ్వజమెత్తారు.

శాంతి, భద్రతలు శూన్యం
ఏపీలో లా అండ్‌ ఆర్డర్‌ లేదు. గంజాయి, డ్రగ్‌ కేపిటల్‌ ఆఫ్‌ ఇండియాగా మార్చేశారు. ఇటీవల రాజ్య సభలో హోంశాఖ సహాయమంత్రి అజయ్‌కుమార్‌ మిశ్రా ఓ ప్రశ్నకు సమాధానం చెబుతూ.. 2019-21 మధ్య ఏపీలో 30,196 మంది మహిళలు అదృశ్య మయ్యారని తెలిపారు. 7918 మంది 18 ఏళ్ల లోపు యువతులు, 22,278 మంది 18 ఏళ్లు దాటిన మహిళలు అదృశ్యమైతే జగన్‌ ప్రభుత్వంలో కనీస స్పందన లేదని పవన్‌ ఆగ్రహం వ్యక్తం చేశారు.

పారిపోతున్న పరిశ్రమలు
విదేశాల నుంచి వివిధ సంస్థలు భారత్‌లో పెట్టుబడులు పెట్టేందుకు వస్తుంటే ఏపీనుంచి మాత్రం ఉన్నవి పారిపోతున్నాయి. రూ. 2,200 కోట్ల పెట్టుబడి పెట్టేందుకు వచ్చిన లులూ సంస్థ వెనక్కి వెళ్లిపోయింది. అమర్‌రాజా, ఫ్రాంక్లిన్‌ టెంపుల్టన్‌, రిలయన్స్‌ వెనక్కి వెళ్లిపోయాయి. 2019లో పారిశ్రామిక ప్రగతి 10.24 శాతం ఉండగా నేడు మైనస్‌ 3 శాతానికి పడిపోయిందని పవన్‌ చెప్పారు.

జగన్‌రెడ్డిని తరిమికొడతారు
జగన్‌ అరాచక పాలనలో ప్రతిపక్ష నాయకులపై దాడులు చేశారు. బీజేపీ కార్యకర్తలపైనా దాడులకు పాల్పడ్డారు, పొట్టల్లో పేగులు చీల్చారు. సొంత బాబాయ్‌ వైౖఎస్‌ వివేకాను కిరాతంగా చంపేసిన హంతకులకు జగన్‌రెడ్డి మద్దతుగా ఉన్నాడు. జగన్‌ హయాంలో టీడీపీ అధినేత చంద్రబాబును ఇబ్బంది పెట్టారు. నన్ను కూడా అనేక పర్యాయాలు అడ్డుకున్నారు.

ఈ అరాచక ప్రభుత్వం పోవాలి. డబ్బులు ఎక్కువై జగన్‌ అరాచకానికి అడ్డూ అదుపూ లేకుండా పోయింది. రావణాసురుడు కూడా అదేవిధంగా అనుకుని, అహంకారంతో విర్రవీగాడు. చివరికి నార చీర కట్టుకున్న సీతమ్మ తల్లి కోపంతో హతమయ్యాడు. జగన్‌ రాష్ట్రాన్ని రావణకాష్టం చేశాడు. అయోధ్యకే రాముడిని తీసుకువచ్చిన మోదీ ఇక్కడున్నారు. చిటికెన వేలంత జగన్‌ రెడ్డిని ఇంటికి పంపడం ఆయనకు కష్టమేం కాదు. ఎన్నికల కురుక్షేత్ర యుద్ధంలో నరేంద్రమోదీ పాంచజన్యాన్ని పూరించి జగన్‌ రెడ్డిని తరిమికొడతారు.