- ఉద్యోగుల జీతాలు, పెన్షన్లు కూడా 1నే అందించాం
- పనిచేయించుకోవటమే కాదు..ఉద్యోగుల సంక్షేమం కూడా పట్టించుకుంటాం
- రాష్ట్ర పునర్నిర్మాణంలో ఉద్యోగుల పాత్ర కీలకం
- కలిసి పనిచేసి రాష్ట్ర భవిష్యత్‌ను మారుద్దామని పిలుపు
అమరావతి(చైతన్యరథం): లబ్ధిదారులకు ఇళ్లవద్దనే ఎన్టీఆర్‌ భరోసా పింఛన్ల పంపిణీ తీరుపై ముఖ్యమంత్రి చంద్రబాబు సంతృప్తి వ్యక్తం చేశారు. 1వ తేదీనే ఇంటి వద్ద రూ. 2,737 కోట్లతో 64 లక్షల మందికి పెంచిన పింఛన్ల పంపిణీ చేయటం ఎంతో సంతృప్తినిచ్చింది.. గతంలో ఎన్నడూ లేని విధంగా ఒక్క రోజులో రికార్డు స్థాయిలో 97.54 శాతం పింఛన్లు అందించాం.. వృద్దులు, దివ్యాంగులు, ఇతర లబ్ధిదారుల ఆర్థిక భద్రత మా బాధ్యత. పెరిగిన పింఛను ఆ పేదల జీవితాలకు భరోసా కల్పిస్తుంది. ఈ కార్యక్రమంలో భాగస్వాములు అయిన ప్రభుత్వ ఉద్యోగులు, అధికారులకు అందరికి మనస్ఫూర్తిగా అభినందనలు తెలుపుతున్నామని సీఎం చంద్రబాబు అన్నారు.
ప్రభుత్వ ఉద్యోగులు అంటే…ప్రభుత్వంలో భాగం. ప్రజలకు ఏ మంచి చెయ్యాలన్నా వారే కీలకం. అలాంటి వర్గానికి కూడా 1వ తేదీనే జీతాలు అందజేశాం. రిటైర్డ్‌ ఉద్యోగులకు పెన్షన్‌ చెల్లించాం. ఆర్థిక ఇబ్బందులు ఉన్నా…. అనేక సమస్యలు ఉన్నా రూ. 5300 కోట్లు విడుదల చేసి వారికి దక్కాల్సిన జీతం 1 తేదీనే చెల్లించాం. రాష్ట్ర పునర్నిర్మాణ కార్యక్రమంలో ఉద్యోగులు, అధికారుల పాత్ర ఎంతో కీలకం. ఉద్యోగులతో పని చేయించుకోవడమే కాదు వారి సంక్షేమం చూసే, గౌరవం ఇచ్చే ప్రభుత్వం కూటమి ప్రభుత్వం. కలిసి కష్టపడదాం… రాష్ట్ర భవిష్యత్తును మారుద్దాం అని ఉద్యోగులను సీఎం చంద్రబాబు పిలుపు ఇచ్చారు.
