అమరావతి: చంద్రబాబు బయట ఉంటే ఎన్నికల్లో ఎదుర్కొనే దమ్ము లేక, ఆయనను జైల్లో పెట్టి ఎన్నికలు వెళ్లాలని జగన్‌ భావిస్తున్నారని టీడీపీ పొలిట్‌ బ్యూరో సభ్యుడు సోమిరెడ్డి చంద్ర మోహన్‌రెడ్డి విమర్శించారు. అందుకే ఒకదాని వెంట మరొకటి అక్రమ కేసులు బనాయిస్తున్నారని విమర్శించారు. మద్యం, ఇసుక అక్రమ దందాలో వేల కోట్ల రూపాయలు దోచేసిన జగన్‌ రెడ్డి, ఈ అంశాల్లో సీబీఐ, ఈడీలు తన అక్రమాలపై విచారణ చేయడానికి ముందే అవే అంశాల్లో చంద్రబాబును బద్నాం చేద్దామని జగన్‌ కుట్ర పన్నారన్నారు. జగన్‌ హయాంలో జరిగిన మద్యం కుంభకోణంపై పురందేశ్వరి మాట్లాడిన వెంటనే చంద్రబాబుపై మద్యం కేసు పెట్టారు. వైసీపీ చేస్తోన్న ఇసుక కుంభకోణం గురించి రెండు రోజుల క్రితం పురంధేశ్వరి మాట్లాడితే ఇసుక కేసు కూడా పెడతారనుకున్నా.. అలాగే పెట్టారు. జగన్‌ చేస్తున్న అక్రమాలపై ఈడీ, సీబీఐల విచారణను పురంధేశ్వరి కోరితే.. జగన్‌ సీఐడీని రంగంలోకి దించారు. జగన్‌ ప్రభుత్వం చేసే కుంభకోణాలపై పురంధేశ్వరి కేంద్రానికి ఫిర్యాదు చేస్తుండడంతో జగన్‌లో భయం పట్టుకుంది.
సీబీఐ, ఈడీలు ఎప్పుడు వస్తాయో తెలీదు కానీ.. సీఎం జగన్‌ తన చేతిలో ఉన్న సీఐడీ ద్వారా చంద్రబాబుపై కేసు లు పెట్టిస్తున్నారు. చంద్రబాబు సహా మాజీ మంత్రులందర్నీ జైలుకు పంపుతా మని వైకాపానేతలు చెబుతూనే ఉన్నారు. ఏపీలో జగన్‌ బూటు కాలి కింద ప్రజా స్వామ్యం చచ్చిపోతోంది. దేశ చరిత్రలో గతంలో ఎన్నడూ లేనంత స్థాయిలో ఏపీలో మద్యం కుంభకోణం జరిగింది. జగన్‌.. వైకాపా నేతలు ఏట్లో పోయే ఇసుకను కూడా దోచేశారు. మేం ఉచితంగా ఇసుక సరఫరా చేస్తే.. మాపై కేసులు పెడతారా? దోపిడీ సొమ్మును జగన్‌ ట్రక్కుల్లో తరలించుకుని వెళ్తుంటే.. సీబీఐ, ఈడీలు ఏం చేస్తున్నాయని గురువారం ఒక ప్రకటనలో పోమిరెడ్డి ప్రశ్నించారు.
మద్యం, ఇసుక దందాలపై టీడీపీ పోరాడుతుంటే.. ఆ అంశాలపైనే చంద్రబాబుపై కేసులా: సోమిరెడ్డి
చంద్రబాబును జైల్లో ఉంచి ఎన్నికలకు వెళ్లేలా జగన్‌ కుట్రలు
