- 1500 బస్సులు..రూ.15 కోట్ల ఖర్చు…ఇదీ జగన్‌ సభల తీరు
- ఇంత డబ్బు ఎక్కడినుంచి వచ్చింది?
- 42 ఏళ్ల టీడీపీ ఏనాడూ ఆస్తులు పోగేసుకోలేదు…ప్యాలెస్‌లు, బంగ్లాలు కట్టుకోలేదు
- రాష్ట్రం కోసం పోరాడుతున్న టీడీపీకి విరాళాలిచ్చి సాయం చేయండి
- tdpforandhra.com వెబ్‌సైట్‌ను ఆవిష్కరించిన చంద్రబాబు
- తన వంతుగా రూ.99,999లు ఆన్‌లైన్‌ ద్వారా విరాళం
అమరావతి (చైతన్యరథం): ఐదేళ్ల పాలనలో రాష్ట్రంలో బాగుపడిరది జగన్మోహన్‌ రెడ్డి ఒక్కడేనని టీడీపీ అధినేత చంద్రబాబు నాయుడు విమర్శించారు. ఒక్కో రోజుకు 1500 బస్సులు..రూ.15 కోట్ల ఖర్చుతో జగన్‌ సభలు జరుగుతున్నాయని ఇంత డబ్బు ఎక్కడి నుండి వచ్చిందని ప్రశ్నించారు. జగన్‌ ఏమైనా వ్యవసాయం చేశారా…వ్యాపారం చేశారా అని నిలదీశారు. బస్సు యాత్ర సాగేటప్పుడు ఐప్యాక్‌ టీంను పెట్టుకుని పెయిడ్‌ ఆర్టిస్టులతో మానవీయ కోణంలో డ్రామాలు ఆడిస్తున్నారన్నారు. పార్టీకి విరాళలందించేందుకు గాను tdpforandhra.com వెబ్‌సైట్‌ను మంగళవారం ఆవిష్కరించారు. విరాళాల కోసం ప్రజలకు విజ్ఞప్తి చేసిన చంద్రబాబు…తన వంతుగా రూ.99,999లు ఆన్‌లైన్‌ ద్వారా చెల్లించారు. అనంతరం చంద్రబాబు మాట్లాడుతూ….రాష్ట్రాన్ని జగన్‌ రివర్స్‌గేర్‌ లో నడిపిస్తున్నారన్నారు. టీడీపీ ఘనచరిత్ర కలిగిన పార్టీ అని, 42 ఏళ్లు అనుభవం ఉందన్నారు. రాజకీయాల్లోకి ధనవంతులు, భూస్వాములు కాకుండా..విద్యావంతులు రావాలి..నీతివంతులతో సామాజిక న్యాయం కోసం టీడీపీ ముందుకు వెళ్లిందన్నారు. చదువుకున్న వారిని ఎమ్మెల్యే, ఎంపీలుగా చేశాం.
విలువలతో రాజకీయాలు చేశాం. ఇప్పటికీ కొన్ని జిల్లాల్లో మా పార్టీకి కార్యాలయాలు లేవు. ప్రజలు ఇచ్చిన అధికారాన్ని ప్రజల కోసం కాకుండా కార్యాలయాలు కట్టుకునేందుకు ఉపయోగించుకోవాలని ఏనాడూ ఆలోచించలేదు. టీడీపీ ఏనాడూ భూములు తీసుకుని ప్యాలెస్‌లు కట్టుకోలేదు. ప్రజలు అంటే మా నేతలు భయపడి పనిచేశారు. తెలుగుజాతిలో టీడీపీ ఒక భాగం. తెలుగుదేశం రాకముందు…తర్వాత అన్న పరిస్థితి ఉంది. ఒకప్పుడు తెలుగుజాతికి ఉనికి లేదు…మదరాసీలు అనేవాళ్లు…తెలుగువాళ్లకు గుర్తింపు తెచ్చి, ఆత్మగౌరవాన్ని చాటిచెప్పి, ఆత్మవిశ్వాసం నింపిన పార్టీ టీడీపీ. పార్టీకి 2 ఏళ్లకు ఒకసారి సభ్యత్వం ద్వారా వచ్చిన డబ్బులను కార్యకర్తల సంక్షేమానికి ఖర్చు చేస్తున్నాం. వైసీపీలాగా అక్రమ సొమ్ము తీసుకోవడం లేదు. రూ.160 కోట్ల మేర ఆన్‌లైన్‌ జూదగాళ్ల దగ్గర విరాళాల రూపంలో డబ్బులు తీసుకున్న వైసీపీ విలువల గురించి మాట్లాడుతోంది. ఆన్‌లైన్‌ జూదాన్ని అధికారికంగా ఒప్పుకున్నారు. అలాంటి నీచమైన పనులు చేయడం దుర్మార్గం. మేము తెలుగు ప్రజలపైనే ఆధారపడుతున్నాం. అందరూ ముందుకు వచ్చి తోచిన విధంగా పార్టీకి సాయం అందించాలి. టీడీపీ అభిమానులు, మద్దతుదారులు విరాళాలు ఇవ్వాలని కోరారు. కాగా, విరాళాలు ఇచ్చిన వారికి రసీదు కూడా అందిస్తారు. అమెరికా లాంటి దేశాల్లో రాజకీయ విరాళాలకు చట్టపరమైన అనుమతులు ఉన్నాయి. ఎన్‌ఆర్‌ఐలు కూడా విరాళాలు చెల్లించేందుకు అవకాశం ఉందని చంద్రబాబు తెలిపారు.
రంగులకు ఇచ్చిన ప్రాధాన్యత విద్యా ప్రమాణాలకు ఇవ్వలేదు
జగన్‌ పాలనలో రాష్ట్రంలో నష్టపోని వ్యక్త్తి లేరు. ఐదు కోట్ల మందిలో జగన్‌ ఒక్కడే బాగుపడ్డారు. రాష్ట్రాన్ని రివర్స్‌ గేర్‌ లో నడిపిస్తున్నారు. నా జీవితంలో ఎప్పుడూ చూడని ఫ్రస్టేషన్‌ ప్రజల్లో ఉంది. నేను ఎక్కడికి వెళ్లినా మహిళలు, చిన్నారులతో సహా వస్తున్నారు. రాష్ట్రంలో విద్యా ప్రమాణాలు పూర్తిగా పడిపోయాయి. ఇంగ్లీష్‌ ను నేర్చుకోవచ్చు…కానీ నాలెడ్జ్‌ను నేర్చుకోలేం. ప్రాథమిన విద్యనంతా మాతృభాషలో చదువుకుని తర్వాత ప్రొఫెషనల్‌ కోర్సుల్లో ఇంగ్లీష్‌ నేర్చుకుంటారు. జగన్‌ పాలనలో అంతా రివర్స్‌లో జరుగుతోంది. పాఠశాలలకు రంగులు కొట్టేదానికి ఇచ్చే ప్రాధాన్యత విద్యాప్రమాణాలకు ఇవ్వడం లేదు. నేడు ప్రపంచ వ్యాప్తంగా పెద్దస్థానాల్లో ఉండే తెలుగువాళ్లు కూడా ప్రభుత్వ స్కూళ్లు, ఎయిడెడ్‌ స్కూళ్లలో చదువుకున్నవారే. కానీ ఇప్పుడు అంతటి ప్రమాణాలు స్కూళ్లలో లేవు. స్కూళ్లు అందుబాటులో ఉంటేనే చదవగలుగుతారు.
రూ.2000, రూ.500, రూ.200 నోట్లు కూడా రద్దు చేయాలని గతంలో చెప్పాను. దీని వల్ల ఎన్నికల్లో పంపకాలు ఆగిపోతాయి. పంపకాలు ఆగిపోతే అభివృద్ధి, సంక్షేమానికి ప్రాధాన్యం వస్తుంది….ఇది కూడా పేదరికం లేని దేశంగా మారడానికి అవకాశం కల్పిస్తుంది. పబ్లిక్‌, ప్రైవేట్‌, పార్టనర్‌ షిప్‌ ద్వారా రోడ్లు, టెలికాం రంగం అభివృద్ధి చెందింది. పీ4 పథకం ద్వారా ప్రజలను పేదరికం నుండి పైకి తీసుకురావచ్చు. ప్రతి ఇంటిపై కూటమి జండాను కట్టాలి. స్వచ్ఛందంగా ప్రజలు వచ్చి మా పోరాటంలో కలిసి సహకరించాలి. తణుకు నిడదవోలు, పి.గన్నవరం, అమలాపురంలో పవన్‌తో కలిసి ప్రచారంలో పాల్గొంటామని చంద్రబాబు చెప్పారు.
ఫేక్‌ లెటర్లతో వైసీపీ ఫేక్‌ ప్రచారం
రాష్ట్ర ప్రజలు గెలవాలి… రాష్ట్రం నిలబడాలి. రాష్ట్రాన్ని కాపాడుకోవాలనే ధ్యేయంతో 3 పార్టీలు కూటమిగా ఏర్పడి ప్రజల ముందుకు వచ్చాయి. రాష్ట్రాన్ని కాపాడుకోవడంలో ప్రజల భాగస్వామ్యం ఉండాలి. కేంద్ర, రాష్ట్ర బీజేపీ నేతలతోనూ సమన్వయం చేసుకుని ముందుకు వెళతాం. వైసీపీ ఓడిపోతుందన్న భయంతోనే హెరిటేజ్‌ పత్రాలను సీఐడీ తగలబెట్టింది. రియల్‌ సినిమా రాబోతోంది…వాస్తవం అర్థమై ఇవన్నీ చేస్తున్నారు. ఆన్‌ లైన్‌ ద్వారా నా పేరుతో ఫేక్‌ లెటర్లు విడుదల చేస్తున్నారు. సూపర్-6 పథకాలు రద్దు చేశామని సోషల్‌ మీడియాలో తిప్పారు. ఇవన్నీ 420, పేటిఎం బ్యాచ్‌ పనులు. ఇంకా ఎన్నో కుట్రలు, కుతంత్రాలు, ఫోన్‌ ట్యాపింగ్‌లు జరిగాయి.
నిత్యం అందరి ఫోన్లు ట్యాప్‌ చేస్తున్నారు. ప్రతి రోజూ తాడేపల్లి ప్యాలెస్‌లోకి కంటెయినర్లు వెళ్తున్నాయి. బయటి ప్రాంతాల నుండి సాయంత్రం సమయాల్లో వేరే మార్గంలో వస్తాయి. అక్రమ సొమ్మును లెక్కబెట్టడానికి మిషన్లు కూడా ఉన్నాయంటున్నారు. ఆ సొమ్మును ఇప్పుడు బయటకు తెచ్చి పంచుతున్నారు. టెక్నాలజీని చేతుల్లో పెట్టుకుని భూమి రికార్డులు కూడా తారుమారు చేస్తారు. గనుల రాయల్టీ వసూళ్ల బాధ్యతను ప్రైవేట్‌ వ్యక్తులకు జిల్లాల వారిగా అప్పగించారు. ప్రజల్ని తప్పుదోవ పట్టించి కొన్ని మీడియా సంస్థలు వ్యాపారం చేస్తున్నాయని చంద్రబాబు విమర్శించారు.
