- ప్రజానమ్మకాన్ని నిలబెట్టుకోవాలి
- ముఖ్యమంత్రి అనుభవం మనకు మార్గదర్శకం
- వ్యవస్థల బలోపేతానికి మీరు సహకరించాలి
- సాధించిన అధికారానికి అదే పరమావధి
- కలెక్టర్ల సదస్సులో డిప్యూటీ సీఎం పవన్‌ పిలుపు
అమరావతి (చైతన్య రథం): పరిపాలనాపరంగా రాష్ట్రంలో సమూల మార్పుకోసమే పూర్తి మెజారీతో ప్రజలు కూటమికి అధికారాన్ని కట్టబెట్టారని, వారి ఆశలు, అభిరుచులకు అనుగుణంగా పనిచేసే ప్రభుత్వానికి కలెక్టర్లు పూర్తిస్థాయిలో సహకరించాలని ఉప ముఖ్యమంత్రి, పంచాయితీ రాజ్‌ మంత్రి కొణిదెల పవన్‌ కళ్యాణ్‌ పిలుపునిచ్చారు. సోమవారం ముఖ్యమంత్రి నారా చంద్రబాబు అధ్యక్షతన రాష్ట్ర సచివాలయంలో జరిగిన కలెక్టర్ల సమావేశంలో ఆయన మాట్లాడుతూ ‘గత ప్రభుత్వం వ్యవస్థలను ధ్వంసం చేసింది. ఆ వ్యవస్థలను పురుజ్జీవింపచేసి బలోపేతం చేయడానికి ఎన్నో ఒడిదుడులు ఎదుర్కొని అధికారంలోకి వచ్చాం.
డా.బాబా సాహెబ్‌ అంబేద్కర్‌ రంచించిన బలమైన రాజ్యాంగాన్ని గత పాలకులు అన్ని విధాలుగా నిర్వీర్యం చేస్తూ ఐఏఎస్‌, ఐపీఎస్‌ వ్యవస్థను పూర్తిస్థాయిలో చిధ్రం చేశారు. ఎవరినీ పనిచేయకుండా చేశారు. ఇటువంటి పరిస్థితుల్లో ఎంతో అనుభవజ్ఞడైన రాష్ట్ర ముఖ్యమంత్రి నారా చంద్రబాబునాయుడు అనుభవం, ఆయన చేసే దిశానిర్థేశం, వారి సేవలు రాష్ట్రానికి ఎంతో అవసరం. వారి అపార అనుభవాన్ని, పరిపాలనా విధానాన్ని, దక్షతను నేర్చుకునేందుకు తనతోపాటు మంత్రివర్గం సిద్ధంగా ఉంది. 2047కల్లా భారతదేశం సూపర్ పవర్‌ కావాలనే లక్ష్యంలో భాగంగా వికసిత్‌ ఆంధ్రదేశ్‌ కూడా ముందుకెళ్లాలంటే జిల్లా కలెక్టర్లతోపాటు అన్ని వర్గాల ప్రజలు ప్రభుత్వానికి సహకరించాలి’ అని పవన్‌ కల్యాణ్‌ కోరారు.
చిత్తశుద్ధితో గ్రామాల అభివృద్ధి
రాష్ట్ర పంచాయితీ రాజ్‌, గ్రామీణాభివృద్ధి శాఖకు సంబంధించి ఈ ఏడాది ఒకేరోజు రాష్ట్రవ్యాప్తంగా 13,326 గ్రామ పంచాయితీల్లో ఉపాధి హామీ పథకం అమలుపై పలు తీర్మానాలు చేస్తూ గ్రామ పంచాయితీలను బలోపేతం చేసే దిశగా తమ ప్రభుత్వం అడుగులేస్తున్నట్లు తెలిపారు. అందుకు జిల్లా కలెక్టర్లు పూర్తిస్థాయిలో సహకరించాలని విజ్ఞప్తి చేశారు. 2014-19 మధ్య కాలంలో దాదాపు 10 వేల గ్రామ పంచాయితీల్లో ప్రారంభించిన ఘన వ్యర్థాల నిర్వహణ కార్యక్రమాన్ని ముందుకు తీసుకెళ్లాల్సిన అవసరముందన్నారు. పిఠాపురం నియోజక వర్గంలో గ్రే వాటర్‌ మేనేజ్మెంట్‌ విధానం ద్వారా లిక్విడ్‌ వేస్టు మేనేజ్మెంట్‌ విధానాన్ని అధునాత పద్ధతిలో పైలెట్‌ ప్రాజక్టుగా నిర్వహించేందుకు ప్రాధాన్యత ఇస్తున్నట్లు తెలిపారు. స్వచ్చభారత్‌ మిషన్‌, ఇతర పథకాల క్రింద నిర్మించిన వ్యక్తిగత మరుగుదొడ్లను ఓడిఎఫ్‌ ప్లస్‌ క్రింద నిర్వహించనున్నట్లు తెలిపారు.
జల్‌జీవన్‌ మిషన్‌ క్రింద ప్రతి గృహానికి సురక్షిత త్రాగునీటిని సరఫరా చేసేందుకు ఈనెల 15 నుంచి పల్స్‌ సర్వే నిర్వహించనున్నట్లు తెలిపారు. ఈ ఏడాది గ్రామ పంచాయితీల్లో 5 కోట్ల 40 లక్షల ట్యాప్‌ కనెక్షన్లను ఏర్పాటు చేయాలనే లక్ష్యాన్ని నిర్థేశించుకోవడం జరిగిందన్నారు. దీనావస్థలో ఉన్న గ్రామీణ రోడ్ల పరిస్థితులను మెరుగుపర్చడంతోపాటు దాదాపు 4,729 కి.మి. మేర కొత్త రోడ్లను ఏర్పాటు చేయాలనే లక్ష్యంతో ప్రభుత్వం ఉందన్నారు. రాష్ట్రంలో 29.23 శాతంమేర 37,431 చదరపు కి.మి. నోటిఫైడ్‌ అటవీప్రాంతం ఉందని, ఆ ప్రాంతానికి బయట 10,221 చదరపు కి.మి. పచ్చదనం విస్తరించి ఉన్న ప్రాంతంతోపాటు చెరువు తీరాలు, కొండ ప్రాంతాలు, పంచాయితీ భూములు, పలు సంస్థల భూముల్లో కూడా పచ్చదనం అభివృద్ధికి చర్యలు తీసుకోనున్నట్టు తెలిపారు. గుంటూరు, కర్నూలు, పశ్చిమ గోదావరి జిల్లాల్లో అటవీ ప్రాంతం తక్కువ ఉందని, ఆయా ప్రాంతాల్లో అటవీ ప్రాంతాన్ని విస్తరింపచేసేందుకు వ్యూహత్మకంగా చర్యలు చేపట్టనున్నట్లు తెలిపారు. అందుకుగాను అటవీ ప్రాంతాలను పరిరక్షించడం, ఆక్రమణలను తొలగించడం, చట్టవ్యతిరేక కార్యక్రమాలను నియంత్రించడం తదితర చర్యలు చేపట్టేందుకు జిల్లా కలెక్టర్లు పూర్తిస్థాయిలో సహకరించాలని ఉప ముఖ్యమంత్రి పవన్‌ కోరారు.
