అమరావతి(చైతన్యరథం): అమెరికా కాన్సలేట్‌ జనరల్‌ జెన్నిఫర్‌ లార్సన్‌ మంగళవారం రాష్ట్ర విద్య, ఐటీశాఖల మంత్రి నారా లోకేష్‌తో మర్యాదపూర్వకంగా భేటీ అయ్యారు. ఈ భేటీపై నారా లోకేష్‌ ఎక్స్‌లో స్పందిస్తూ… అమెరికా కాన్సులేట్‌ జనరల్‌తో సమావేశం సంతోషం కలిగించిందని తెలిపారు. భారతీయ అమెరికన్లలో తెలుగు ప్రజలు 14 శాతం మంది ఉన్నారని, వారు భారత్‌-అమెరికా మధ్య సంబంధాలను మరింతగా బలోపేతం చేశారన్న దాంట్లో తనకు ఎలాంటి సందేహం లేదని పేర్కొన్నారు. వారు తెలుగు సంస్కృతి, సంప్రదాయాల సొగసును అమెరికా గడ్డపై సుసంపన్నం చేశారని, మన వైవిధ్యాన్ని, వారసత్వాన్ని ఘనంగా చాటుతున్నారని లోకేష్‌ వివరించారు. ఈ బంధాన్ని మరింత విస్తరింపజేయడంలో ఏపీ మరింత కీలకపాత్ర పోషిస్తుందని భావిస్తున్నామని తెలిపారు.
