తెలుగు మహిళ రాష్ట్ర ప్రధాన కార్యదర్శి మూల్పూరి కల్యాణిని పోలీసులు అత్యంత దారుణంగా అరెస్ట్ చేశారు. కృష్ణా జిల్లా హనుమాన్ జంక్షన్ పోలీసులు తెల్లవారుజామున కల్యాణి ఇంటిని చేరుకోవడంతో కాసేపు ఉద్రిక్తత చోటుచేసుకుంది. పోలీసులను ఇంట్లోకి వెళ్లనివ్వకుండా కాస్సేపు కుటుంబసభ్యులు అడ్డుకున్నప్పటికీ కల్యాణి బెడ్రూంలోకి వెళ్ళిమరీ పోలీసులు అరెస్ట్ చేసారు. ఫిబ్రవరి 20న అధికార వైసీపీ, టీడీపీ నేతల మధ్య జరిగిన గొడవలో కల్యాణిపై రెండు కేసులు నమోదయ్యాయి. దీంతో పోలీసులు అరెస్ట్ చేయకుండా వుండేందుకు ఆమె ముందస్తు బెయిల్ కు యత్నించింది. కల్యాణి దాఖలు చేసుకున్న ముందస్తు బెయిల్ పిటీషన్ పై విచారణ కొనసాగుతుంది. అప్పట్నుంచి కల్యాణి అజ్ఞాతంలో వున్నారు.
కల్యాణి కోసం గాలిస్తున్న పోలీసులకు హనుమాన్ జంక్షన్ లోని నివాసంలో వున్నట్లు సమాచారం అందింది. దీంతో తెల్లవారుజామున పోలీసులు ఇంటిని ముట్టడించి కల్యాణిని అదుపులోకి తీసుకున్నారు. ఈ సమయంలో పోలీసులకు, కుటుంబసభ్యులకు మధ్య వాగ్వాదం జరిగింది. ఓ మహిళ బెడ్రూం లోకి చొరబడి అరెస్ట్ చేయడం ఏమిటంటూ కుటుంబసభ్యులు ఆందోళన వ్యక్తం చేసారు. కనీసం నైట్ డ్రెస్ కూడా మార్చుకునే అవకాశం ఇవ్వకుండా పోలీసులు అత్యంత దారుణంగా వ్యవహరించారని కల్యాణి కుటుంబసభ్యులు ఆరోపించారు. జగన్ పాలనలో మహిళలకు రక్షణ లేకుండా పోతోందని కుటుంబసభ్యులు తమ ఆవేదన వ్యక్తం చేశారు.
కృష్ణా జిల్లా గన్నవరం టిడిపి కార్యాలయం వద్ద చోటుచేసుకున్న ఘర్షణల కేసులో అప్పుడే టీడీపీ అధికార ప్రతినిధి కొమ్మారెడ్డి పట్టాభిరాంతో సహా 15 మందిని పోలీసులు అరెస్ట్ చేసారు. టిడిపి కార్యాలయంపై ఎమ్మెల్యే వల్లభనేని వంశీ వర్గీయులు, వైసిపి కార్యకర్తలు దాడికి పాల్పడినట్లు తెలిసి పట్టాభి అక్కడి వెళ్లారు. ఈ క్రమంలోనే దాడి సమయంలో పోలీసుల తీరును నిరసిస్తూ డిజిపి కార్యాలయానికి వెళ్లేందుకు ప్రయత్నించారు. దీంతో పట్టాభితో పాటు మరికొందరు టిడిపి నాయకులు, కార్యకర్తలను పోలీసులు అదుపులోకి తీసుకున్నారు. ఇదే ఘర్షణ కేసులో మరికొందరు టిడిపి నేతలపైనా పోలీసు కేసులు నమోదయ్యాయి. ఇలా మహిళా నాయకురాలు కల్యాణిపై కూడా పోలీసులు రెండు కేసులు నమోదు చేసారు. తాజాగా ఈ కేసుల్లో ఆమెను అరెస్ట్ చేయడం రాజకీయ అలజడి రేపుతోంది.
టీడీపీ మహిళా నాయకురాలు.. కల్యాణి అరెస్ట్ ను టీడీపీ అధినేత చంద్రబాబు ఖండించారు. తెలుగు మహిళ రాష్ట్ర ప్రధాన కార్యదర్శి ముల్పూరి సాయి కళ్యాణిపై తప్పుడు కేసు పెట్టిందే కాక.. బెడ్ రూంలోకి చొరబడి ఆమెను ఏదో ఉగ్రవాదిలా అరెస్టు చేసిన విధానం.. అత్యంత దారుణమని చంద్రబాబు అన్నారు. జగన్ ప్రభుత్వ దుర్మార్గాలను ప్రశ్నించిన మహిళపై హత్యాయత్నం కేసు పెట్టి ప్రతాపం చూపడం సిగ్గుచేటు అంటూ కల్యాణి అరెస్ట్ వీడియోను జతచేస్తూ చంద్రబాబు ట్వీట్ చేసారు.
టీడీపీ మహిళా నేత కల్యాణి అక్రమ అరెస్టును .. తెలుగుదేశం జాతీయ ప్రధాన కార్యదర్శి నారా లోకేష్ తీవ్రంగా ఖండించారు. ఒక మహిళ పట్ల ఇంత దారుణంగా వ్యవహరిస్తారా? అంటూ లోకేష్ ప్రశ్నించారు. కల్యాణి అరెస్ట్ చేసేటప్పుడు.. పోలీసులు వ్యవహరించిన తీరు.. పోలీసు వ్యవస్థకే కళంకం తెచ్చేలా ప్రవర్తించారని నారా లోకేష్ ఆగ్రహం వ్యక్తం చేశారు. వైసీపీ నేతల మెప్పు కోసమే తప్పుడు కేసులు పెట్టారని.. ప్రతీ ఒక్కరూ చట్టం ముందు నిలబడే రోజు దగ్గరలోనే ఉందని నారా లోకేష్ హెచ్చరించారు. కల్యాణికి, ఆమె కుటుంబానికి టీడీపీ అండగా ఉంటుందని నారా లోకేష్ హామీ ఇచ్చారు. ఇటు .. టీడీపీ మహిళా నాయకురాలు.. కల్యాణి అరెస్ట్ ను టీడీపీ రాష్ట్ర అధ్యక్షుడు అచ్చెన్నాయుడు ఖండించారు. జగన్ రెడ్డి మెప్పు కోసమే.. పోలీసులు ఇష్టారాజ్యంగా వ్యవహరిస్తున్నారని ఆగ్రహం వ్యక్తం చేశారు. ప్రశ్నించిన ప్రతిపక్ష నేతలనే లక్ష్యంగా చేసుకుని అణచివేతకు పాల్పడుతున్నారని అన్నారు. అక్రమంగా అరెస్ట్ చేసిన కల్యాణిని తక్షణమే విడుదల చేయాలని అచ్చెన్నాయుడు డిమాండ్ చేశారు.
