టిడిపి ప్రభుత్వం అధికారంలోకి వచ్చిన తర్వాత మార్కెటింగ్, నిల్వ సౌకర్యం కల్పించి టమోటా రైతులను ఆదుకుంటామని తెలుగుదేశం పార్టీ జాతీయ ప్రధాన కార్యదర్శి నారా లోకేష్ హామీ ఇచ్చారు. యువగళం పాదయాత్ర సందర్భంగా మంత్రాలయం నియోజకవర్గం మాధవరం శివార్లలో మహిళారైతు సిద్దాలింగమ్మ యువనేత లోకేష్ ను కలిసి టమోటా పంటను చూపి గోడు వెళ్లబోసుకున్నారు. తమకు 3ఎకరాల పొలం ఉంటే ఎకరాలో టమోటా, రెండెకరాల్లో చెరకు వేశాను. ఎకరా టమోటా పంటకు రూ.70వేలు ఖర్చయితే 10వేలు రాబడి వచ్చింది. కిలో 6 రూపాయలు పలుకుతోంది. కూలీ ఖర్చులు కూడా రాకపోవడంతో పంటను చేలోనే వదిలివేశాను.
గత ఏడాది రెండెకరాల్లో మిర్చి పంట వేస్తే 2.5లక్షల రూపాయల పెట్టుబడి అయింది. వాగువచ్చి పంట కొట్టుకుపోతే ప్రభుత్వం ఒక్క రూపాయి పరిహారం ఇవ్వలేదు. టిడిపి ప్రభుత్వ హయాంలో పంట నష్టం జరిగితే రూ.70వేల పంటల బీమా సొమ్ము వచ్చింది. ఏటికేడు నష్టాలతో అప్పులు పెరిగిపోతున్నాయి తప్ప లాభం లేదు.ప్రభుత్వం సాయం అందించకపోతే వ్యవసాయం చేయడం కష్టమని తెలిపింది. సిద్ధాలింగమ్మ సమస్య పై లోకేష్ సానుకూలంగా స్పందించారు. టమోటా రైతులను ఆదుకోవడానికి కెచప్ ఫ్యాక్టరీలు పెడతానన్న జగన్ పత్తా లేకుండా పోయారు.
పంటలబీమాకు ప్రభుత్వం ఇన్సూరెన్స్ కంపెనీ పెడుతుందని చెప్పి అన్నదాతలను నట్టేట ముంచాడు. రైతులు పంటనష్టపోతే కనీసం పరిశీలించి అంచనావేసే నాథుడే లేడు.టిడిపి ప్రభుత్వం అధికారంలోకి వచ్చిన తర్వాత మార్కెటింగ్, నిల్వ సౌకర్యం కల్పించి టమోటా రైతులను ఆదుకుంటాం. పంట పెట్టుబడులను తగ్గించి వ్యవసాయాన్ని లాభసాటిగా మారుస్తామని లోకేష్ హామీ ఇచ్చారు.
