- దివ్యాంగులపట్ల ప్రభుత్వానకి మానవతాకోణం
- దీర్ఘకాల అనారోగ్యమైతే.. పింఛను రూ.15వేలు
- దేశంలో ఎక్కడాలేని సంక్షేమ సహాయమిది..
- ప్రతి అర్హుడికీ పింఛను ఇవ్వాలన్నదే లక్ష్యం
- అందుకు, అనర్హులు పింఛన్లు వదులుకోవాలి
- వృద్ధుల జీవన ప్రమాణాల పెంపునకు డిజిటల్‌ లిటరసీ
- విభిన్న ప్రతిభావంతుల సంక్షేమంపై సమీక్షలో చంద్రబాబు
అమరావతి (చైతన్య రథం): విభిన్న ప్రతిభావంతుల విషయంలో ప్రభుత్వం మానవీయ కోణంలో వ్యవహరిస్తుందని ముఖ్యమంత్రి చంద్రబాబు నాయుడు అన్నారు. దివ్యాంగులను ప్రత్యేకంగా చూడాల్సిన అవసరముందన్న కారణంతో అధికారం చేపట్టిన తొలి నెలలోనే పింఛన్‌ రూ. 3వేల నుంచి ఒకేసారి రూ.6 వేలకు పెంచామన్నారు. అదేవిధంగా దీర్ఘకాలిక ఆనారోగ్యంతో బాధపడుతూ మంచానికే పరిమితమైనవారికి దేశంలో ఎక్కడాలేని విధంగా రూ.15 వేలు ప్రతినెలా పింఛను రూపంలో ఇస్తున్నామన్నారు. అర్హులెవ్వరికీ పింఛను అందడం లేదన్న బాధ ఉండకూడదని, ముఖ్యంగా దివ్యాంగుల విషయంలో ప్రతి ఒక్క అర్హుడికీ పింఛన్‌ ఇవ్వాలని ముఖ్యమంత్రి స్పష్టం చేశారు. దీనిపై అధికారులు మాట్లాడుతూ గత ప్రభుత్వంలో తప్పుడు సర్టిఫికేట్లతో దివ్యాంగుల కోటాలో పింఛన్‌ పొందిన ఘటనలు ఉన్నాయని.. ఈ విషయంలో పెద్దఎత్తున ఫిర్యాదులు ఉన్నాయని వివరించారు.
ఈ అంశంపై తనవద్దా స్పష్టమైన సమాచారం ఉందని సీఎం చంద్రబాబు అంటూ.. అర్హులకు, బాధితులకు పింఛన్‌ ఇవ్వాలన్న తమ విధానాన్ని దుర్వినియోగం చేసి.. పింఛన్లు పొందడం సరికాదన్నారు. వైద్యుల నుంచి తప్పుడు సర్టిఫికెట్లతో కొంతమంది దివ్యాంగుల పేరుతో పింఛన్లు తీసుకోవడాన్ని అరికట్టాలని ఆదేశించారు. అనర్హులు ఎవరైనా తప్పుడు పద్దతిలో పింఛన్లు పొందుతుంటే స్వచ్ఛందంగా వదులుకోవాలని సీఎం స్పష్టం చేశారు. పింఛన్ల అంశంలో ప్రత్యేకంగా గ్రామసభలు పెట్టి అర్హులకు పింఛన్లు ఇవ్వడంతో పాటు… అనర్హులను తొలగించాల్సిన అవసరముందన్నారు. దీనిపై కార్యాచరణ సిద్ధం చేయాలని ఆదేశాలిచ్చారు. అనర్హులు దివ్యాంగుల పేరుతో పింఛను పొందడం అంటే అర్హులకు అన్యాయం చేయడమే అని అభిప్రాయపడ్డారు. ప్రభుత్వం నిజమైన లబ్ధిదారులకు సాయం చేసే విషయంలో రాజీపడబోదని… ఇదే సమయంలో బోగస్‌ పింఛన్లు కూడా కొనసాగించేది లేదని సీఎం అన్నారు.
సీనియర్స్‌ సిటిజన్స్‌కు డిజిటల్‌ లిట్రసీ
గ్రామాల్లో ఉండే వృద్ధులకు పింఛన్‌ ఇవ్వడంతో పాటు…. వారికి ఇతరత్రా ఏం చెయ్యవచ్చనేది కూడా స్టడీ చేయాలని సీఎం అధికారులకు సూచించారు. గ్రామాల్లో వృద్ధులకు డిజిటల్‌ లిట్రసీ ద్వారా వారు సులభంగా సేవలుపొందే అవకాశాన్ని కల్పించాలన్నారు. దీనికోసం వృద్ధులు, ఆయా ఏజెన్సీలతో మాట్లాడి కార్యాచరణ రూపొందించాలని సూచించారు. ప్రస్తుతం రాష్ట్రంలో 39 లక్షల మంది సీనియర్‌ సిటిజన్స్‌కు పింఛన్లు ఇస్తున్నామని… వారికి గ్రామాల్లో అవకాశాలు సృష్టించే కార్యక్రమాలు చేపట్టాలన్నారు. పింఛన్లతో సోషల్‌ సెక్యూరిటీతో పాటు గౌరవం ఇచ్చామన్నారు. వృద్ధులకు పింఛన్‌ ఇచ్చి వదిలేయడం కాకుండా వారి జీవన ప్రమాణాలను ఎలా పెంచవచ్చనే విషయంలో ఆలోచనలు చేసి కార్యక్రమాలు చేపట్టాలన్నారు. దివ్యాంగుల కోసం స్పోర్ట్స్‌ సెంటర్‌ ఏర్పాటుకు విశాఖలో 30 ఎకరాలు కేటాయించాలని సీఎం ఆదేశించారు.
కేంద్ర ప్రభుత్వం దాదాపు రూ.200 కోట్లతో ఈ సెంటర్‌ మంజూరు చేసిందని… అయితే వైసీపీ ప్రభుత్వ హయాంలో పనులు జరగలేదని, ఆ ప్రాజెక్టును ముందుకు తీసుకువెళ్లాలని సీఎం అన్నారు. సింగిల్‌గా ఉండే ట్రాన్స్‌జెండర్స్‌కు రేషన్‌ కార్డులు ఇవ్వాలన్నారు. పిల్లల్లో చిన్న వయసులోనే ఆరోగ్య సమస్యలు కనిపెట్టేందుకు పరీక్షలు చేయాలని…. ఇలాంటి కార్యక్రమం సమర్థవంతంగా చేపడితే వారు భవిష్యత్‌లో దివ్యాంగులు అవ్వకుండా అరికట్టవచ్చని సూచించారు. దీనికోసం ప్రత్యేక కార్యక్రమం చేపట్టాలని ముఖ్యమంత్రి అన్నారు. దివ్యాంగులకు ఇచ్చే వీల్‌ చైర్స్‌, ట్రై సైకిల్స్‌ సోలార్‌ సిస్టంతో నడిచే విధంగా రూపొందించాలని సీఎం చంద్రబాబు నాయుడు సూచించారు.
