అమరావతి: ఎన్నికల ముందు ఇచ్చిన హామీ మేరకు చంద్రబాబు ప్రభుత్వం పెన్షన్లను పెంచగా, ఏపీ వ్యాప్తంగా సోమవారం ఉదయం పంపిణీ ప్రారంభమయింది. దీంతో పెరిగిన పింఛన్లు అందుకున్న వృద్ధులు, వికలాంగులు, వితంతువులు, ఇతరులు హర్షం వ్యక్తం చేస్తున్నారు. పెన్షన్ల పంపిణీపై మంత్రి నారా లోకేష్‌ ‘ఎక్స్‌’ (ట్విట్టర్‌) వేదికగా స్పందించారు. ఈ రోజు అవ్వాతాతల కళ్లల్లో నేను చూసిన ఆనందం, చిరునవ్వు నా జీవితాంతం గుర్తుంటుంది. ప్రజా నాయకుడికి, పరదాల నాయకుడికి మధ్య ఉన్న తేడా ఈ రోజు ప్రజలకు అర్థమైంది. మాట మార్చుడు లేదు.. మడమ తిప్పుడు లేదు.. విడతల వారీ డ్రామాలు లేవు.. అడ్డమైన నిబంధనలు అసలే లేవు.. ఇచ్చిన హామీ ప్రకారం పెద్ద కొడుకుగా పెన్షన్‌ రూ.4 వేలు చేశారు చంద్రన్న. మూడు నెలల బకాయిలతో కలిపి రూ.7 వేల పెన్షన్‌ ఇంటి వద్దనే అందజేశారని లోకేష్‌ ట్వీట్‌ చేశారు.
