అమరావతి(చైతన్యరథం): సినీ నటుడు, హిందూపురం ఎమ్మెల్యే నందమూరి బాలకృష్ణ 64వ పుట్టినరోజు సందర్భంగా టీడీపీ అధినేత చంద్రబాబు సోమవారం శుభాకాంక్షలు తెలిపారు. విభిన్న పాత్రల్లో నటిస్తూ తెలుగు సినిమా రంగంలో అన్‌స్టాపబుల్‌ హీరో అనిపించుకున్న అగ్రహీరో అంటూ బాలయ్యపై పొగడ్తలు కురిపిస్తూ ఎక్స్‌ (ట్విట్టర్‌) వేదికగా చంద్రబాబు శుభాకాంక్షలు చెప్పారు. ‘‘తెలుగు సినిమా రంగంలో అన్‌ స్టాపబుల్‌ అనిపించుకున్న అగ్రహీరో.. హిందూపురం శాసనసభ్యులు.. నా ఆత్మీయుడు నందమూరి బాలకృష్ణకు హృదయపూర్వక జన్మదిన శుభాకాంక్షలు. సినీ, రాజకీయ రంగాలలో తిరుగులేని ప్రజాదరణతో నిండు నూరేళ్ళూ ఆనంద, ఆయురారోగ్యాలతో వర్థిల్లాలని మనసారా కోరుకుంటున్నాను’’ అంటూ చంద్రబాబు ఎక్స్‌లో పోస్ట్‌ చేశారు. టీడీపీ నేతలు, కార్యకర్తలు, బాలయ్య అభిమానులు ఈ ట్వీట్‌ను తెగ వైరల్‌ చేస్తున్నారు. టీడీపీ అధినేత పెట్టిన ట్వీట్‌ను రీట్వీట్‌ చేస్తూ పలువురు అభిమానులు గతంలో చంద్రబాబుతో బాలయ్య దిగిన ఫొటోల్ని ట్విట్టర్‌లో షేర్‌ చేస్తున్నారు.
ముద్దుల బాలా మావయ్యకు పుట్టిన రోజు శుభాకాంక్షలు: లోకేష్‌
హిందూపురం టీడీపీ ఎమ్మెల్యే, సినీ నటుడు నందమూరి బాలకృష్ణ జన్మదినం సందర్భంగా టీడీపీ జాతీయ ప్రధాన కార్యదర్శి, ఆయన అల్లుడు నారా లోకేశ్‌ శుభాకాంక్షలు తెలిపారు. నా ముద్దుల బాలా మావయ్యకు జన్మదిన శుభాకాంక్షలు అంటూ లోకేశ్‌ ట్వీట్‌ చేశారు.
గాడ్‌ ఆఫ్‌ మాసెస్‌ బాలకృష్ణకి జన్మదిన శుభాకాంక్షలు: అచ్చెన్నాయుడు
టీడీపీ రాష్ట్ర అధ్యక్షుడు అచ్చెన్నాయుడు కూడా బాలకృష్ణకు ఎక్స్‌ వేదికగా విషెస్‌ తెలిపారు. తండ్రి స్వర్గీయ నందమూరి తారకరామారావు అడుగుజాడల్లో నడుస్తూ అటు హిందూపూర్‌ ఎమ్మెల్యేగా, బసవతారకం క్యాన్సర్‌ ఆసుపత్రి చైర్మన్‌గా, సినిమా హీరోగా ఏది చేసినా సమాజసేవే పరమావధిగా అడుగులు వేస్తూ ప్రజల గుండెల్లో గాడ్‌ ఆఫ్‌ మాసెస్‌గా తనదైన ముద్ర వేసుకున్న నటసింహం నందమూరి బాలకృష్ణకి హృదయపూర్వక జన్మదిన శుభాకాంక్షలు అంటూ అచ్చెన్నాయుడు ట్వీట్‌ చేశారు.
అన్నింటా విజయాలు సాధించాలి: పురందేశ్వరి
సినీనటుడు, ఎమ్మెల్యే నందమూరి బాలకృష్ణ జన్మదినం సందర్భంగా ఆయన సోదరి, రాష్ట్ర బీజేపీ అధ్యక్షురాలు పురంధేశ్వరి శుభాకాంక్షలు తెలిపారు. పుట్టినరోజు శుభాకాంక్షలు బ్రదర్‌! మీ కోరికలన్నీ నెరవేరి, మీరు కలలుగన్న అన్నింటా విజయాలు సాధించాలని కోరుకుంటున్నా. నీపై ఎల్లప్పుడూ దేవుడి ఆశీర్వాదాలు ఉండాలి అని పురంధేశ్వరి తన ట్వీట్‌లో పేర్కొన్నారు.
టీడీపీ జాతీయ కార్యాలయంలో బాలకృష్ణ జన్మదిన వేడుకలు
విశ్వవిఖ్యాత నటసార్వభౌమ నందమూరి తారకరామారావు తనయుడు, హిందూపురం ఎమ్మెల్యే, పేదల పెన్నిధి, సేవాతత్పర హృదయుడు నటరత్న నందమూరి బాలకృష్ణ జన్మదిన వేడుకలను మంగళగిరిలోని టీడీపీ జాతీయ కార్యాలయంలో సోమవారం ఘనంగా నిర్వహించారు. టీడీపీ పొలిట్‌బ్యూరో సభ్యుడు వర్ల రామయ్య కేక్‌ కట్‌ చేసి ఏపీ నాటక అకాడమీ చైర్మన్‌ గుమ్మడి గోపాలకృష్ణ, సినీ నిర్మాత, దక్షిణ భారత నిర్మాతల సంఘ అధ్యక్షుడు కాట్రగడ్డ ప్రసాద్‌కు తినిపించారు. అందరికీ స్వీట్లు పంచి పెట్టారు. ఈ కార్యక్రమంలో నేతలు మాట్లాడుతూ బాలకృష్ణ సేవలను కొనియాడారు. ఎమ్మెల్యేగా బాలకృష్ణ హయాంలో హిందూపురం మరింత అభివృద్ధి చెందాలని ఆకాంక్షించారు. సమాజ హితమైన సినిమాలతో బాలకృష్ణ మరింత పేరు తెచ్చుకోవాలని ఆకాంక్షించారు. బాలకృష్ణ సేవలు చిరస్థాయిగా నిలవాలని కోరుకున్నారు. ఈ కార్యక్రమంలో ఏపీ మహిళా కమిషన్‌ మాజీ అధ్యక్షురాలు నన్నపనేని రాజకుమారి పాల్గొని బాలయ్యకు జన్మదిన శుభాకాంక్షలు తెలిపారు. ఈ కార్యక్రమంలో.. టీడీపీ రాష్ట్ర అధికార ప్రతినిధి సయ్యద్‌ రఫీ, కాపు మల్లికార్జున యాదవ్‌తో పాటు పలువురు టీడీపీ నాయకులు, కార్యకర్తలు పాల్గొని బాలయ్య జిందాబాద్‌ అంటూ నినాదాలు చేశారు. బాలయ్య జన్మదినవేడుకల కేక్‌ కటింగ్‌తో టీడీపీ కార్యాలయంలో సందడి వాతావరణం నెలకొంది.
