- కుంభ రవిబాబును ఏజెంట్‌గా అక్రమ మైనింగ్‌
- విచ్చలవిడిగా గంజాయి స్మగ్లింగ్‌, అక్రమ వ్యాపారాలు
- రాష్ట్ర ఎస్సీ, ఎస్టీ కమిషన్‌ మాజీ సభ్యుడు నరహరి వరప్రసాద్‌ విమర్శ
అమరావతి: రాష్ట్రంలో గత నాలుగు సంవత్సరాల 10 నెలల కాలం నుంచి సైకో జగన్మోహన్‌ రెడ్డి అరాచకాలు, విధ్వంసాలు గిరిజనులకు శాపంలా మారాయని రాష్ట్ర ఎస్సీ ఎస్టీ కమిషన్‌ మాజీ సభ్యుడు కొండారెడ్డి నరహరి ప్రసాద్‌ మండిపడ్డారు. ప్రభుత్వ సలహాదారు సజ్జల రామకృష్ణారెడ్డి పాల్పడుతున్న కార్యకలాపాలు మన్యం జిల్లాలో గిరిజనులను కలవరపెడుతున్నాయని ఒక ప్రకటనలో నరహరి వరప్రసాద్‌ ఆగ్రహం వ్యక్తం చేశారు. మన్యం జిల్లాలో అక్రమ మైనింగ్‌ పేట్రేగిపోతోంది. సజ్జల మైదాన ప్రాంతం నుంచి గిరిజన వైసీపీ నాయకుడైన కుంభ రవిబాబును తన ఏజెంట్‌ గా నియమించుకుని అధికారిక పదవులు ఇచ్చి ఆయన ద్వారా తన అక్రమ మైనింగ్‌ను యథేచ్ఛగా నిర్వహిస్తున్నాడని ఆరోపించారు. గిరిజన జాతిని అభివృద్ధి పథంలో నడిపించడానికి గిరిజనులను అన్ని రంగాల్లో అభివృద్ధి పరిచి వారి ఉన్నత స్థితిని మెరుగుపరచడానికి అధికారక పదవులు ఇస్తే ఆ పదవులను అనుభవిస్తూ సజ్జల రామకృష్ణారెడ్డికి ఊడిగం చేస్తూ గిరిజన జాతికి ద్రోహం చేస్తున్నాడని ఎమ్మెల్సీ కుంభ రవిబాబుపై ఆగ్రహం వ్యక్తం చేశారు. వైసీపీ పాలనలో గిరిజనుల అభివృద్ధిపై చర్చకు సిద్ధమా అని సవాల్‌ విసిరారు.
చెరసాలల్లో మగ్గుతున్న గిరిజన యువత
అమాయక గిరిజన యువత గంజాయి కేసుల్లో చిక్కుకుంటే గిరిజన ఎమ్మెల్సీ కుంభా రవిబాబు ప్రేక్షక పాత్ర పోషిస్తున్నాడని మండిపడ్డారు. ఈ దుర్మార్గ వైసీపీ ప్రభుత్వంలో సుప్రీంకోర్టు జీవో నెం 3 ను కొట్టివేస్తే కనీసం ఆప్పీలుకు వెళ్లలేదని వైసీపీ ప్రభుత్వ తీరును తప్పుబట్టారు. గిరిజన యువతని దృష్టిలో ఉంచుకుని వారికి ఉపాధి ఉద్యోగ అవకాశాలు చూపించి వారి జీవనోపాధిని మెరుగుపరిచే సదుద్దేశంతో అప్పటి ప్రభుత్వం జీవో నెంబర్‌ 3 ని తీసుకువచ్చింది. దాని ఆసరాతో ఎంతో మంది యువత లబ్ధి పొందారు. కానీ ఈ దుర్మార్గ వైసీపీ ప్రభుత్వంలో నయవంచక ప్రభుత్వ సలహాదారు చెరలో చిక్కుకుని అమాయక గిరిజన యువత తీవ్ర ఇబ్బందులు పడుతున్నారు. మన్యం జిల్లాలోని అమాయక గిరిజన యువత వేరే గత్యంతరం లేక వైసీపీ పెద్దలు నిర్వహిస్తున్న గంజాయి స్మగ్లింగ్‌ తరలింపుల్లో చిక్కుకుని పోలీసు నిర్బంధాలలో, చెరసాలలో మగ్గిపోతున్నారని, వారికి బెయిలు కూడా మంజూరు కావడం లేదని ఆవేదన వ్యక్తం చేశారు. కోడి కత్తి కేసులో శ్రీనుకు ఇప్పటివరకు కనీసం బెయిలుకు నోచుకోలేదు దానికి కారణం జగన్‌ రెడ్డి కుట్ర కాదా అని ప్రశ్నించారు. కోడి కత్తి శ్రీనుకు ఎలా అయితే అన్యాయం జరిగిందో విశాఖ మన్యంలో వైసీపీ నాయకుల అధ్వర్యంలో గంజాయి తరలింపు వ్యవహారంలో చిక్కుకున్న గిరిజన యువతకు కూడా అలాంటి అన్యాయమే జరుగుతోందన్నారు.
రాష్ట్రంలో ఎస్టీ కమిషన్‌ చైర్మన్‌గా, వెనువెంటనే ఎమ్మెల్సీగా నియమిస్తే వైసీపీ పెద్దల అడుగులకు మడుగులు ఒత్తుతూ గిరిజన జాతిని గాలికి వదిలేసిన కుంభా రవిబాబును గిరిజన ప్రజలు క్షమించరని నరహర ప్రసాద్‌ తీవ్రంగా విరుచుకుపడ్డారు. రాష్ట్ర ప్రజలందరూ నమ్మి ఓట్లేసిన జగన్‌ మోహన్‌ రెడ్డి రాష్ట్ర అభివృద్ధిని గాలికి వదిలేసి తాడేపల్లి ప్యాలెస్‌లో కూచుని తన బినామీలతో ఇసుక, మద్యం వ్యాపారాలను చేయిస్తూ డబ్బు దండుకుంటున్నాడు. జగన్‌ రెడ్డి అడుగులకు మడుగులొత్తులూ ఎమ్మెల్సీ కుంభ రవిబాబు తన అక్రమ మైనింగ్‌ వ్యాపారాలను నిర్వహిస్తూ అరకు ఫామ్‌ హౌస్‌ లో కూర్చొని అవినీతి డబ్బు కూడగడుతున్నాడని నరహరి వరప్రసాద్‌ ఆరోపించారు.
గిరిజన జాతి క్షమించదు
మైదాన ప్రాంతం నుంచి అధికారిక పదవులు పొంది తన సొంత ప్రయోజనాలకు వాడుకుంటూ గిరిజన జాతికి కుంభ రవిబాబు తీవ్ర అన్యాయం చేస్తున్నాడని, గిరిజనుల అభివృద్ధి కోసం రాష్ట్రంలోని ఒక్క జిల్లాలోనైనా సమీక్ష నిర్వహించారా అని ప్రశ్నించారు. గిరిజన జాతికి తీవ్ర అన్యాయం చేస్తున్న ఎమ్మెల్సీ కుంభ రవిబాబు తక్షణమే రాజీనామా చేస, గిరిజనులకు క్షమాపణ చెప్పాలని నరహరి వరప్రసాద్‌ డిమాండ్‌ చేశారు.
