- బయో ఇంధన రంగంలో రిలయన్స్‌ భారీ పెట్టుబడులపై మంత్రి లోకేష్‌ హర్షం
- ఏపీ ప్రజలు, పారిశ్రామికవేత్తల్లో విశ్వాసం పెరిగిందని సంతోషం
- స్పీడ్‌ ఆఫ్‌ డూయింగ్‌ బిజినెస్‌కు రిలయన్స్‌ పెట్టుబడులే నిదర్శనమని ఉద్ఘాటన
- రిలయన్స్‌ అధినేతలు ముఖేష్‌, అనంత్‌ అంబానీలకు కృతజ్ఞతలు తెలిపిన మంత్రి లోకేష్‌
అమరావతి (చైతన్యరథం): రాష్ట్రంలో ప్రజాప్రభుత్వం అధికారంలోకి వచ్చిన తొలి ఐదునెలల్లోనే రిలయన్స్‌ ఎనర్జీ సంస్థ బయో ఇంధన ప్రాజెక్టులో రూ.65వేల కోట్ల మేర పెట్టుబడులు పెట్టేందుకు ముందుకు రావడం ఆనందంగా ఉందని రాష్ట్ర విద్య, ఐటి, ఎలక్ట్రానిక్స్‌ శాఖల మంత్రి నారా లోకేష్‌ అన్నారు. రాష్ట్ర సచివాలయంలో ముఖ్యమంత్రి చంద్రబాబునాయుడు సమక్షంలో బయో ఇంధన ప్రాజెక్టుకు సంబంధించి రిలయన్స్‌ ప్రతినిధులు, ఏపీ ప్రభుత్వ ఉన్నతాధికారుల మధ్య మంగళవారం అవగాహన ఒప్పందం జరిగింది. ఈ సందర్భంగా మంత్రి లోకేష్‌ మాట్లాడుతూ… తాను ముంబయిలో రిలయన్స్‌ చైర్మన్‌ ముఖేష్‌ అంబానీ, రిలయన్స్‌ ఎనర్జీ అధినేత అనంత్‌ అంబానీతో చర్చలు జరిపిన 30 రోజుల్లోనే ఒప్పందం జరగడం చారిత్రాత్మకమైన ఘట్టమన్నారు. రాష్ట్రంలో అమలవుతున్న స్పీడ్‌ ఆఫ్‌ డూయింగ్‌ బిజినెస్‌ విధానాలకు ఈ ఒప్పందం ఊతమిస్తుందని చెప్పారు.
ఇప్పటివరకు ఉత్తరప్రదేశ్‌లోని బారాబంకీ బయోఫ్యూయల్‌ ప్రాజెక్టు వేగవంతంగా అమలైందని, రాష్ట్రంలో రిలయన్స్‌ ఏర్పాటుచేయబోయే ప్రాజెక్టు ఆ రికార్డును బద్దలు కొడుతుందని తెలిపారు. డిసెంబర్‌ 28న ప్రకాశం జిల్లా కనిగిరిలో తొలి బయో ఇంధన ప్రాజెక్టుకు శంకుస్థాపన జరుగుతుందని, రాబోయే మూడేళ్లలో రాష్ట్రవ్యాప్తంగా 500 ప్లాంట్ల ఏర్పాటు పూర్తిచేస్తారని చెప్పారు. తొలిదశ ప్రాజెక్టు వచ్చే ఏడాది డిసెంబర్‌ 28నాటికి (ఏడాదిలో) పూర్తిచేస్తామని రిలయన్స్‌ ఎనర్జీ ఏపీ ప్రతినిధి ప్రసాద్‌ తెలిపారు. దీనిపై మంత్రి లోకేష్‌ స్పందిస్తూ… రిలయన్స్‌ బయో ఇంధన ప్రాజెక్టుకు ఏపీ ప్రభుత్వం తరపున అవసరమైన పూర్తి సహాయ, సహకారాలు అందిస్తామని చెప్పారు. రిలయన్స్‌ తీసుకున్న చారిత్రాత్మక నిర్ణయం ఏపీ ప్రజలతోపాటు పారిశ్రామికవేత్తల్లో విశ్వాసాన్ని పెంపొందిస్తుందన్నారు. ఐదేళ్లలో 20 లక్షల ఉద్యోగాలు కల్పించాలన్న తమ ప్రభుత్వ లక్ష్యంలో భాగస్వాములు అవుతున్నందుకు రిలయన్స్‌ అధినేతలు ముఖేష్‌ అంబానీ, అనంత్‌ అంబానీలకు మంత్రి లోకేష్‌ కృతజ్ఞతలు తెలిపారు.
