- ప్రభుత్వం చేస్తున్న మంచిని ప్రజలకు చెప్పాలి
- సంక్షేమ పథకాలను ప్రజల్లోకి తీసుకెళ్లాలి
- కార్యకర్తల్లో నాయకత్వ పటిమ పెంపొందిస్తాం
- క్రమశిక్షణ తప్పితే ‘జీరో టాలరెన్స’
- యూనిట్ ఇన్చార్జిలకు టీడీపీ అధినేత చంద్రబాబునాయుడు దిశానిర్దేశం
మంగళగిరి (చైతన్యరథం): ప్రతి సాధారణ కార్యకర్తలోనూ నాయకత్వ పటిమను పెంపొందించడమే లక్ష్యంగా శిక్షణా తరగతులు నిర్వహిస్తున్నామని, కార్యకర్తలే పార్టీకి అసలైన బలం అని ముఖ్యమంత్రి, టీడీపీ అధినేత నారా చంద్రబాబునాయుడు స్పష్టం చేశారు. శనివారం మంగళగిరిలోని టీడీపీ కేంద్ర కార్యాలయంలో యూనిట్ ఇన్చార్జిలతో ఆయన ‘కాఫీ కబుర్లు’ పేరిట ముచ్చటించారు. పార్టీ శ్రేణులకు అనేక విషయాలపై దిశానిర్దేశం చేశారు ఈ సందర్భంగా చంద్రబాబు మాట్లాడుతూ… ‘పార్టీ భావజాలాన్ని ప్రతి ఒక్కరూ క్షుణ్ణంగా అర్థం చేసుకోవాలి. కూటమి ప్రభుత్వం చేపడుతున్న మంచి పనులను, సంక్షేమ పథకాలను ప్రజల్లోకి బలంగా తీసుకెళ్లాలి. మనం చేసే మంచిని మనం చెప్పుకోకపోతే ప్రత్యర్థుల తప్పుడు ప్రచారాన్ని ప్రజలు నమ్మే ప్రమాదం ఉందన్నారు. చిన్నపామునైనా పెద్ద కర్రతో కొట్టాలి అన్న చందంగా… గొడ్డలి పార్టీ పన్నే కుట్రలను ఎప్పటికప్పుడు తిప్పికొట్టాలి. డీఎస్సీ పరీక్షల నిర్వహణపై ఆ పార్టీ దుష్ప్రచారం చేసేందుకు ప్రయత్నిస్తే, మనం వాస్తవాలను సమర్థవంతంగా వివరించాం. అందుకే నేడు రిక్రూట్ అయిన ఉపాధ్యాయులే స్వయంగా గొడ్డలి పార్టీ తీరును నిలదీస్తూ ఆందోళనకు దిగారు’ అని పేర్కొన్నారు.
అభివృద్ధి-సంక్షేమమే మా మార్గం
రాష్ట్రంలో ఎన్ని ఆర్థిక ఇబ్బందులు ఉన్నప్పటికీ దెబ్బతిన్న వ్యవస్థలను గాడిలో పెడుతూ అభివృద్ధి, సంక్షేమాలను సమతుల్యంగా తీసుకెళ్తున్నామని వివరించారు. పారదర్శకంగా వ్యవహరించి నిజం చెప్తే ప్రజలే మనకు తోడుగా నిలుస్తారనడానికి భోగాపురం విమానాశ్రయ నిర్మాణ పనులే నిదర్శనమని గుర్తు చేశారు. ‘సాధారణ కార్యకర్తకైనా, అగ్రనాయకుడికైనా పార్టీయే అత్యున్నతమైనది. నియోజకవర్గాల్లో జరుగుతున్న పరిణామాలను నేను నిరంతరం పర్యవేక్షిస్తున్నాను. కార్యకర్తలను పట్టించుకోకపోయినా, పార్టీ సూత్రాలకు వ్యతిరేకంగా నడుచుకున్నా ‘జీరో టాలరెన్స’ అమలు చేస్తాం. యూనిట్, క్లస్టర్ ఇన్చార్జిలు, మండల అధ్యక్షులకు తగిన గౌరవం దక్కేలా చూసే బాధ్యత నాది’ అని చంద్రబాబు భరోసా ఇచ్చారు. ప్రజాప్రతినిధులు, నాయకుల ప్రవర్తన ఓటింగ్పై ప్రభావం చూపుతుందని, రాబోయే ప్రతి ఎన్నికల్లోనూ ప్రతి బూత్ పరిధిలోనూ గతంలో కంటే ఎక్కువ ఓట్లు సాధించేలా పనిచేయాలని పిలుపునిచ్చారు.
