- 13 వేల 326 గ్రామ పంచాయితీల్లో ఒకేరోజు గ్రామ సభలు
- రెండు రోజులు ముందే దండోరాతో ప్రచారం చేయండి
- ఉపాథి హామీ పనిదినాల కల్పనపై అవగాహన కల్పించాలి
- 2024-25లో చేపట్టే పనులకు గ్రామసభల ఆమోదం
- లక్ష్యం నెరవేరాలంటే ప్రజలు, అధికారులు మనసుపెట్టాలి
- గ్రామ సచివాలయాల సిబ్బందీ భాగస్వాములవ్వాలి
- సమష్టి కృషితో దేశంలో అగ్రగామిగా నిలుద్దాం
- ఉపాధి పనుల నాణ్యత విషయంలో రాజీపడొద్దు
- ఉప ముఖ్యమంత్రి కె పవన్‌కళ్యాణ్‌ పిలుపు
- జెడ్పీ సీఈవోలు, డీపీవోలు, డ్వామా పీడీలతో వీడియో కాన్ఫరెన్స్‌
అమరావతి (చైతన్య రథం): రాష్ట్రవ్యాప్తంగా 13 వేల 326 గ్రామ పంచాయితీల్లో ఆగస్టు 23న ఒకేరోజు గ్రామసభలను నిర్వహించనున్నట్టు రాష్ట్ర ఉప ముఖ్యమంత్రి, పంచాయితీరాజ్‌, గ్రామీణాభివృద్ధి మంత్రి కె వపన్‌కళ్యాణ్‌ వెల్లడిరచారు. గ్రామసభలపై సోమవారం రాష్ట్ర సచివాలయం నుంచి ఆయన జిల్లా పరిషత్‌ సీఈవోలు, డీపీవోలు, డ్వామా పీడీలు, ఎంపిడీవోలు తదితర అధికారులతో వీడియో కాన్ఫరెన్స్‌ నిర్వహించారు. గ్రామ సభలు విజయవంతానికి తీసుకోవాల్సిన చర్యలపై దిశానిర్దేశం చేశారు. వీడియో కాన్ఫరెన్స్‌లో పవన్‌కల్యాణ్‌ మాట్లాడుతూ పంచాయితీరాజ్‌, గ్రామీణాభివద్ధి శాఖల్లో పనిచేయడమంటే గ్రామీణ ప్రాంతాల్లోని రైతులు, నిరుపేద కూలీలకు సేవ చేయడంగా తాను నమ్ముతున్నానన్నారు. పంచాయితీరాజ్‌ వ్యవస్థలో గ్రామ పంచాయితీ నుంచి జిల్లా పరిషత్‌ వరకూ పటిష్టంగా ఉన్నప్పుడే అనుకున్న అభివృద్ధి సాధించగలుగుతామని తద్వారా మహాత్మాగాంధీ కలలుగన్న గ్రామ స్వరాజ్యం సాధించగలుగుతామన్నారు. దానిలో భాగంగానే ఈనెల 23న రాష్ట్రవ్యాప్తంగా ఒకేరోజు 13వేల 326 గ్రామ పంచాయితీల్లో గ్రామసభలు నిర్వహించడం ద్వారా ప్రజలకు పలు అంశాలపై అవగాహన కల్పించడం జరుగుతుందుని తెలిపారు.
ఉపాధిహామీ పధకంలో ప్రతి కుటుంబానికి ఏడాదిలో 100 రోజుల పనిదినాలు కల్పనపై అవగాహన, కూలీల హక్కులపై అవగాహన కల్పించాల్సిన అవసరం ఉందన్నారు. పథకం సద్వినియోగానికి పనుల వివరాలు గ్రామ సభలో అర్ధమయ్యే రీతిన వివరించాలని సూచించారు. గ్రామ సభ సమాచారాన్ని కనీసం రెండు రోజులు ముందే దండోరాతో ప్రజలందరికీ తెలియజేయడం ద్వారా గ్రామసభ హాజరీ పెంచాలని స్పష్టం చేశారు. అదేవిధంగా డీపీవోలుల గ్రామసభ నిర్వహణపై గ్రామాల్లో సిబ్బందికి పూర్తి అవగాహన కల్పించాలన్నారు. 2024-25 ఆర్ధిక సంవత్సరంలో చేపట్టనున్న ఉపాధిహామీ పనులకు సంబంధించి గ్రామసభలో చర్చించి ఆమోదం తీసుకోవాలన్నారు. ఉపాధిహామీ పథకంలో చేపట్టే పనులు పేద కూలీలకు, రైతులకు, గ్రామానికి ఉపయోగపడేలా నాణ్యతా ప్రమాణాలకు అనుగుణంగా ఉండాలని డిప్యూటీ సీఎం పవన్‌ సూచించారు.
నిర్లక్ష్యాన్ని ఉపేక్షించేది లేదు
ఉపాధిహామీ పథకం అమలుకు సంబంధించి కొంతమంది డ్వామా పీడీలు గ్రామాలను సందర్శిచడం లేదని, పని ప్రదేశాలను తనిఖీ చేయడం లేదని, సోషల్‌ ఆడిట్‌ సభలకు హాజరుకావడం లేదని, కిందిస్థాయి అధికారులపై నియంత్రణ లేదనే కొన్ని వాస్తవాలు తన దృష్టికి వచ్చాయని పవన్‌ కళ్యాణ్‌ అన్నారు. క్లస్టర్‌స్థాయిలో పనిచేసే ఏపీడీలు పని ప్రదేశాలకు వెళ్లడంలేదనే ఫిర్యాదులు వస్తున్నాయని, ఇకమీదట అలాంటి విధానాలను మార్చుకోవాలని సూచించారు. మండలస్థాయిలో పథకం అమలులో పూర్తి బాధ్యత వహించాల్సిన ఎంపీడీవోలు ఇది మనపని కాదన్నట్టు వ్యవహరించడం, కేవలం సంతకాలకే పరిమితం కావడం, పని ప్రదేశంలో మస్టర్లు తనిఖీ చేయకపోవడం వంటి ఫిర్యాదులు వస్తున్నాయని, అలాంటి వారిని ఎంతమాత్రం ఉపేక్షించేది లేదని స్పష్టం చేశారు. పనికి సంబంధించిన రిజిష్టర్లు, వర్క్‌ఫైల్స్‌ చాలా మండలాల్లో సరిగ్గా నిర్వహించడం లేదని, ఇక మీదట ఎంపిడిఓలు పూర్తి బాధ్యతాయుతంగా వ్యవహరించాలని.. మండలస్థాయిలో జరిగే అవకతవకలకు వారే బాధ్యత వహించాల్సి ఉంటుందని పవన్‌ హెచ్చరించారు.
బాధ్యతలు సక్రమంగా నిర్వర్తించండి
ఉపాధిహామీ పథకం అమలుకు సంబంధించి ఏపీఓలు, ఇసిలు, టిఏలు తమ బాధ్యతలను సరిగా నిర్వర్తించడం లేదని చాలా ఫిర్యాదులు వస్తున్నాయని అలాంటి వారిని ఉపేక్షించేది లేదని హెచ్చరించారు. గ్రామస్థాయిలో పనిచేసే అధికారులు బోగస్‌ అటిండెన్సు సహా పనికిరాకుండా హాజరు వేయడం, పనిచేయకుండా చేసినట్టు చూపడం, తక్కువ పనిచేసి ఎక్కువ పని నమోదు చేయడం వంటి అవకతవకలు చేస్తున్నట్టు గమనించామని.. అలాంటివి ఇకముందు సహించబోమన్నారు. పథకం అమలులో పారదర్శకత, జవాబుదారీతనం పెంచాల్సిన సోషల్‌ ఆడిట్‌ విభాగంలోనూ అవినీతి జరుగుతుందని ఫిర్యాదులు వస్తున్నాయని, నిఘా విభాగంపైనే నిఘా పెట్టాల్సిన అవసరం వచ్చిందంటే.. పరిస్థితులు ఎంత దిగజారాయో అర్ధమవుతోందన్నారు. అవినీతి ఏ స్థాయిలో జరిగినా క్షమించేది లేదని ఫీల్డు అసిస్టెంట్‌ స్థాయినుండి పీడీ వరకూ సోషల్‌ ఆడిట్‌ గ్రామస్థాయి ఆడిటర్‌ నుంచి రాష్ట్రస్థాయి డైరెక్టర్‌ వరకూ ఎవరినీ ఉపేక్షించేది లేదని స్పష్టం చేశారు.
అదే సమయంలో బాధ్యతాయుతంగా సమర్ధవంతంగా పనిచేసే అధికారులు, సిబ్బందిని గుర్తించి వారిని ప్రోత్సహిస్తామన్నారు. ఇకమీదట ఉపాథి హామీ పథకాన్ని సమర్ధవంతంగా అమలు చేసేందుకు మనమందరం సమష్టిగా కలిసి పనిచేసి.. గ్రామాల అభివృద్ధి ద్వారా గ్రామ స్వరాజ్యాన్ని సాధిద్ధామని ఉప ముఖ్యమంత్రి పవన్‌ కళ్యాణ్‌ ఆకాంక్షించారు. సమావేశంలో రాష్ట్ర పంచాయితీ రాజ్‌ మరియు గ్రామీణాభివృద్ధి శాఖ ముఖ్య కార్యదర్శి శశి భూషణ్‌ కుమార్‌ మాట్లాడుతూ సోషల్‌ ఆడిట్‌ పబ్లిక్‌ హియరింగ్‌కు డ్వామా పీడీలు విధిగా హాజరుకావాలని ఆదేశించారు. ఈనెల 23 నుంచి జరిగే ప్రత్యేక గ్రామ సభల్లో గ్రామాల్లో సీసీ రోడ్లు, డ్రైన్లు, రీచార్జి పిట్‌ల ఏర్పాటుపై ప్రత్యేక దృష్టి సారించాలన్నారు. వీడియో కాన్ఫరెన్స్‌లో రాష్ట్ర పంచాయితీరాజ్‌ మరియు గ్రామీణాభివృద్ధి శాఖ సంచాలకులు కృష్ణతేజ్‌, ఈఎన్సీలు బాలూ నాయక్‌, సంజీవరెడ్డి, వాటర్‌షెడ్‌ డైరెక్టర్‌ పీవీఆర్‌ఎం రెడ్డి, అదనపు కమిషనర్‌ సుధాకర్‌ రావు, జాయింట్‌ కమినర్‌ శివప్రసాద్‌ రెడ్డి తదితరులు పాల్గొన్నారు.
